သုံးနှစ်ကြာပြီးနောက်
ရွမ်ရှောက်နန်က 'ရိထျန်း'လုပ်ငန်းစုရုံးချုပ်အဆောက်အဦး၏ အစည်းအဝေးခန်းမထိပ်တွင်ထိုင်နေကာ ဌာနအသီးသီးမှတင်ပြလာသည့်အချက်အလက်များကို နားထောင်နေသည်။တစ်ကမ္ဘာလုံးဆိုင်ရာ ဘဏ္ဍာရေးအရှုပ်အထွေးများပြီးဆုံးပြီးနောက် ယခုနှစ်၏အကျိုးအမြတ်များက ယခင်နှစ်၏ရလဒ်များနှင့် မခြားမနားသာဖြစ်နေသောကြောင့် သူ၏မျက်နှာတစ်ခုလုံး တင်းမာပြီးတည်နေလေသည်။
ဌာနပေါင်းစုံရှိအကြီးအကဲများက ရွမ်ရှောက်နန်၏အေးစက်တင်းမာနေသည့်မျက်နှာကိုကြည့်ပြီး သူတို့ကိုယ်တိုင်လည်း အေးစိမ့်နေသည့်ချွေးစေးများထွက်လာရ၏။တင်ပြနေသည့်သူကလည်း တင်းမာလွန်းနေသည့်အခြေအနေကိုရိပ်မိနေကာ တင်ပြချက်များက ကတုန်ကယင်ဖြစ်နေတော့၏။
အစည်းအဝေးတစ်ဝက်တွင် ရွမ်ရှောက်နန်၏ဖုန်းမြည်လာခဲ့၏။လွန်ခဲ့သည့်နှစ်နှစ်မှစပြီး သွားလေရာတိုင်း အချိန်တိုင်း၌ ရွမ်ရှောက်နန်က ဖုန်းနှစ်လုံးကို သယ်သွားပြီး တစ်လုံးကိုသာ ၂၄နာရီစလုံးဖွင့်ထားခဲ့ကာ အစည်းအဝေးလုပ်နေသည့်အချိန်မျိုး၌ပင် မပိတ်ထားခဲ့။ထို့အပြင် ထိုဖုန်းနံပါတ်ကိုသိပြီး ဆက်သွယ်၍ရသည့်သူကလည်း တစ်ယောက်တည်းသာရှိ၏။
ရွမ်ရှောက်နန်က ချက်ချင်းကောက်ယူဖြေဆိုလိုက်ပြီး တစ်ဖက်လူအား ညင်ညင်သာသာလေးမေးလိုက်၏။
"နိုးလာပြီလား?..ထမင်းရော စားပြီးပြီလား?.."
တစ်ဖက်က ဖုန်းပြောရင်း အခြားတစ်ဖက်က ရလဒ်များကိုတင်ပြနေသည့်သူအား ခဏရပ်လိုက်ရန် မျက်လုံးဖြင့်အချက်ပြလိုက်၏။
တစ်ခန်းတစ်ခုလုံး အသံတစ်စိုးတစ်စိမျှမထွက်တော့ဘဲ တိတ်ဆိတ်သွားခဲ့ကာ အကြောင်းမသိသေးသောအသစ်ရောက်ထားသည့်ဝန်ထမ်းနှစ်ဦးက တစ်ဖက်သို့တိုးကပ်သွားရင်း စီနီယာကျသည့်ဝန်ထမ်းကို လှမ်းမေးလိုက်၏။
"ဒါက ဘယ်သူ့ရဲ့ဖုန်းမလို့ လူကြီးမင်းရွမ်ရဲ့ အရမ်းအလေးပေးနေတာလဲဟင်...စကားပြောတာတွေကအစ ပြောင်းသွားတယ်နော်.."
YOU ARE READING
Alluring [ ဘာသာပြန် ]
Romance绝色倾城 ဆိုတဲ့စကားလုံးက အရိုးရှင်းဆုံးဆိုရလျှင် 'မိန်းမောသွားလောက်တဲ့ထိစွဲလမ်းခြင်း' လို့အဓိပ္ပါယ်ရပါတယ်။လူတစ်ယောက်ကိုပဲဖြစ်ဖြစ် အရာဝတ္ထုတစ်ခုကိုပဲဖြစ်ဖြစ် မသိစိတ်ကနေရော အသိစိတ်ကပါ ရူးသွပ်သွားတဲ့အထိစွဲလမ်းခြင်းမျိုးပါ။