လုယူခြင်း
အသက်ရှင်သန်ရာဘဝ ဆိုသည်မှာကား အဘယ်နည်း။အချိန်တော်တော်များများကို နာကျင်မှုများဖြင့် ဖြတ်သန်းစေရင်း ဘဝသင်ခန်းစာအဖြစ် ထိုအရာကို ဖြေရှင်းရခြင်းသာဖြစ်၏။
ဥပမာ ငတ်မွန်ခေါင်းပါးခြင်း...ဆင်းရဲခေါင်ခိုက်ခြင်း...နေထိုင်စရာမရှိဘဲ အိမ်ခြေမဲ့နေခြင်း..စသည် စသည်...
ရွမ်ရှောက်နန် ဖုန်းခေါ်လာသည့်အချိန်တွင် ဝေ့ရှီနှင့်ရူဖေးက အလုပ်ပြီး၍ အိမ်ပြန်တော့မည်ဖြစ်သည်။ရွမ်ရှောက်နန် အသစ်ဝယ်ပေးထားသည့် မီးလင်းနေသည့်ဖုန်းမျက်နှာပြင်မှ သူ၏နာမည်ကို လှမ်းကြည့်လိုက်၏။အရင်ဖုန်းက သူကိုယ်တိုင်ရိုက်ခွဲလိုက်ပြီးဖြစ်သဖြင့် အသစ်တစ်လုံးကို ဝမ်တုန်းရန်မှတဆင့် ကျောင်းသို့ တိုက်ရိုက်လာပေးသွားခြင်းဖြစ်၏။
နောက်ဆုံးပေါ်ဖုန်းဖြစ်သဖြင့် စျေးကြီးမည်မှာမဆန်းပေ။ဖုန်းလက်ခံရရှိကတည်းက Contact ထဲတွင် နာမည်များထည့်ထားပြီးဖြစ်ကာ ရွမ်ရှောက်နန်၏ လက်ကိုင်ဖုန်းနံပါတ်၊ ရုံးဖုန်းနံပါတ်၊ အိမ်ဖုန်းနံပါတ်၊ အတွင်းရေးမှူးဖုန်းနံပါတ်၊ driver ဖုန်းနံပါတ်အပြင် သူ၏လက်ထောက်ဖုန်းနံပါတ်ပါ ပါသေးသည်။
ဖုန်းက အဆက်မပြတ်ကိုမြည်နေဆဲဖြစ်သဖြင့် ကံကြမ္မာကို မျှော်ကိုးရင်း ဝေ့ရှီဖုန်းဖြေရန် ကြိုးစားလိုက်၏။
"ဝေ့ရှီ...ကိုယ် မင်းကိုလွမ်းနေတာ..."
ကောင်းလိုက်လေခြင်း။ရိုးရှင်းသောစကားတစ်ခွန်းတည်းဖြင့် ဆိုလိုချင်သည့်အဓိပ္ပါယ်အားလုံးကို ဖော်ပြနိုင်၏။ဝေ့ရှီက တစ်ဖက်ရှိ ရွမ်ရှောက်နန်၏ မေးခွန်းပြန်မထုတ်အောင်အကြပ်ရိုက်လိုက်နိုင်သည့်အတွက် ကျေနပ်နေမည့်အမူအရာကြီးကို မြင်ယောင်မိလိုက်၏။
"အရမ်းနောက်ကျနေပြီ...အိမ်ပြန်တော့မလို့..."
သေခြင်းတရားဆီသို့ မတိုးဝင်လိုသလို ရရာရကြောင်းရုန်းကန်ချင်မိသေး၏။
"မင်းမေမေရဲ့အရိုးပြာလေ...နေရာကောင်းကောင်းလေးတစ်ခုရှာပြီး အေးအေးချမ်းချမ်းအနားယူခိုင်းသင့်တယ်လို့မထင်ဘူးလား"
YOU ARE READING
Alluring [ ဘာသာပြန် ]
Romance绝色倾城 ဆိုတဲ့စကားလုံးက အရိုးရှင်းဆုံးဆိုရလျှင် 'မိန်းမောသွားလောက်တဲ့ထိစွဲလမ်းခြင်း' လို့အဓိပ္ပါယ်ရပါတယ်။လူတစ်ယောက်ကိုပဲဖြစ်ဖြစ် အရာဝတ္ထုတစ်ခုကိုပဲဖြစ်ဖြစ် မသိစိတ်ကနေရော အသိစိတ်ကပါ ရူးသွပ်သွားတဲ့အထိစွဲလမ်းခြင်းမျိုးပါ။