အဆုံးအစမရှိ အံ့သြတုန်လှုပ်သွားခြင်း
ဤရက်ပိုင်းအတွင်း ဝေ့ရှီ၏ နှလုံးသားထဲတွင် ခပ်ရေးရေးလေးသော အတွေးစတစ်ခုရှိနေခဲ့၏။အကယ်၍ တစ်နေ့တွင် ဤလောကကြီးထဲ၌ ရုတ်တရက် ရွမ်ရှောက်နန် မရှိတော့လျှင် သူမ ဘယ်လိုဖြစ်သွားခဲ့မလဲ။ပျော်ရွှင်ခြင်းက ပိုမည်လော နာကျင်ဝမ်းနည်းခြင်းက ပိုမည်လော။
အခြားယောက်ျားတစ်ယောက်အား ထပ်၍ ချစ်မိသွားမည်လော။ထိုယောက်ျားကရော ဘယ်လိုပုံစံမျိုးဖြစ်မည်နည်း။သာမာန်ဝန်ထမ်းလေး တစ်ဦးလား။ ဒါမှမဟုတ် ပန်းချီဆွဲတတ်သည့်သူတစ်ဦးလား။
နှစ်ဦးသား ဘယ်လို ဘဝမျိုးတွင် နေထိုင်ဖြစ်မည်နည်း။နှစ်ယောက် အတူတူနေထိုင်ဖြစ်ကြပြီး ချစ်စရာကောင်းသည့် ကလေးလေးတစ်ယောက် မွေးဖြစ်ကြမည်လား။ ဒါမှမဟုတ် မရေရာမသေချာသော ပန်းချီဆရာတစ်ဦး၏အိမ်မက်နောက်ကိုလိုက်ရင်း လောကတခွင် ရွက်လွှင့်ကြမည်လော။
မည်သို့ပင်ဖြစ်စေ အဘယ်သို့သောလူမျိုးနှင့်တွေ့ပြီး ဘယ်လိုဘဝမျိုးကို ဖြစ်သန်းနေခဲ့ပါစေ ဝေ့ရှီ၏ ဘဝအစိတ်အပိုင်းတစ်ခုက ပုပ်သိုးဆွေးမြေ့နှင့်နေပြီးဖြစ်၏။သူမ၏ ဘဝတစ်ခုလုံးက သစ်ပင်ကြီးတစ်ပင်ဖြစ်နေခဲ့လျှင် ခြောက်သွေ့သွားခဲ့ပြီးသော ရွက်ကြွေများအစား ရွက်နုများကနေရာယူကာ ထိုရွက်ကြွေများက အသစ်တဖန်တောက်ပလာနိုင်တော့မည်မဟုတ်သလိုမျိုးပင်ဖြစ်၏။
နောက်ဆုံးစာမေးပွဲ ပြီးဆုံးသွားပြီဖြစ်ကာ ယနေ့က နိုင်ငံခြားပညာသင်အခွင့်အရေးအတွက် ရေးဖြေစာမေးပွဲဖြေရမည့်နေ့ဖြစ်၏။စာမေးပွဲအချိန်က နေ့လည် ၂နာရီတွင်သတ်မှတ်ထားကာ မေးခွန်းများက တော်ဝင်ပန်းချီတက္ကသိုလ်မှထုတ်ထားသည့် မေးခွန်းများဖြစ်ကြောင်း ကြေညာထား၏။
ဝေ့ရှီက မနက်ပိုင်းတစ်ခုလုံး စာကြည့်တိုက်ထဲတွင်ရှိနေခဲ့ပြီး နေ့လည်စာကို ကျောင်းကန်တင်း၌သာ စားရန်ဆုံးဖြတ်လိုက်၏။ကျောင်းပိတ်ရက်လည်းဖြစ်သဖြင့် ခါတိုင်းနေ့များထက် လူနည်းနေ၏။ဝေ့ရှီက တိတ်ဆိတ်ပြီးထောင့်ကျသည့်နေရာတစ်ခုကိုယူပြီး 'ယန်ကျိုး'ဒေသလက်ရာ ထမင်းကြော်ကတစ်ဖက် စာအုပ်ကတစ်ဖက်။
YOU ARE READING
Alluring [ ဘာသာပြန် ]
浪漫绝色倾城 ဆိုတဲ့စကားလုံးက အရိုးရှင်းဆုံးဆိုရလျှင် 'မိန်းမောသွားလောက်တဲ့ထိစွဲလမ်းခြင်း' လို့အဓိပ္ပါယ်ရပါတယ်။လူတစ်ယောက်ကိုပဲဖြစ်ဖြစ် အရာဝတ္ထုတစ်ခုကိုပဲဖြစ်ဖြစ် မသိစိတ်ကနေရော အသိစိတ်ကပါ ရူးသွပ်သွားတဲ့အထိစွဲလမ်းခြင်းမျိုးပါ။