Alluring [ ဘာသာပြန် ]

Chapter 20

ပျော်ရွှင်ခြင်းအား အဓိပ္ပါယ်ဖွင့်ဆိုရလျှင်

ရွမ်​ရှောက်နန်၏ ​ပျော်ရွှင်​နေသည့်အချိန်များက သိပ်မကြာလိုက်ပါ။​ဆေးရုံမှဆင်းသည်နှင့် ​ဖြေရှင်းရန် စောင့်ကြို​နေသည့်အလုပ်ကိစ္စများက တစ်ပုံတစ်ပင်ကြီးဖြစ်သည်။

​ဝေ့ရှီက ​ကျောင်းပိတ်ရက်များအတွင်းသို့ ​ရောက်​​နေပြီဖြစ်ကာ ရွမ်​ရှောက်နန်က သူ၏ ဗီလာတွင် လာ​ရောက်​ပြောင်း​နေပါရန် အကြိမ်ကြိမ်​တောင်းဆိုသည့်တိုင် မ​ပြောင်း​ရွေ့။ ရွမ်​ရှောက်နန်၏မျက်နှာကို ​ထောက်ပြီး Alluring တွင်လည်း ဆက်ပြီးအလုပ်မလုပ်ဖြစ်​တော့​ပေ။

သို့​သော် ထို​နေရာမှရ​နေသည့်ဝင်​ငွေများမရှိ​တော့လျှင် သူမ၏ ကျူရှင်လခနှင့်​နေစရိတ်များအပြင် ​စျေးကြီးလွန်းလှသည့် ပန်းချီဆိုင်ရာသုံးကိရိယာများအတွက်ပါ ​ငွေ​ရေး​ကြေး​ရေးပြဿနာရှိလာနိုင်မည်ဖြစ်သည်။

ရွမ်​ရှောက်နန်က သူမကို လိုရမယ်ရသုံးရန် ဘဏ်ကဒ်တစ်ခု​ပေးလိုက်သော်လည်း သူ၏ဗီလာထဲရှိ အံဆွဲထဲ၌သာ ပြန်ထည့်ထား​ပေးခဲ့သည်။သူ၏​စေတနာကို နားလည်ပါသည့်တိုင် သူမကိုယ်၌ကိုယ်က 'လိုရမယ်ရ' ဆိုသည့်စကားလုံးနှင့် အသားမတည့်ခြင်း​ကြောင့် ယူမသုံးရခြင်းလည်းဖြစ်ပါလိမ့်မည်။ဤအရာက မာနကြီးကာစိတ်ကြီးဝင်ခြင်းမျိုးမဟုတ် နှစ်ရှည်လများစွာကျင့်သုံး​ခဲ့​သော အကျင့်​ကြောင့်ဟုသာ​ဆိုရမည်။အခြားတစ်ခုအ​နေဖြင့် ​ပြောရလျှင် မိမိကိုယ့်ကိုယုံကြည်အားကိုးခြင်းမျိုးဖြစ်ကာ သူနှင့်သူမ ကြားရှိ ကွာခြားချက်များကို ပို၍​တွေး​တောမိ​လေ သူမအဖို့ ကိုယ့်ကိုကိုယ် ပို၍အားကိုးရန် ကြိုးစားမိ​လေဖြစ်၏။

​နောက်ပိုင်း ရူ​​ဖေးကို သူမ​တွေးထားသည့်အရာများကို​ပြောပြတိုင်း ရူ​ဖေးက အ​ရေးတယူလုပ်ပြီးပင် နားမ​ထောင်​ပေး​တော့​ပေ။

"နင်က သူ့အတွက်နဲ့ နိုင်ငံခြားကို​တောင်ပညာသင်ဖို့မသွားခဲ့တာ​လေ... နင့်ကို ​စောင့်​ရှောက်​ပေးရမှာက သူ့ရဲ့တာဝန်ပဲဟာ..ပြီး​တော့ သူ မတတ်နိုင်တာလည်း မဟုတ်ဘူး​လေ..ဘာလို့များ ကိုယ့်ကိုကိုယ်ခက်ခဲ​အောင်လုပ်​နေတာလဲ ​ဝေ့ရှီ.."