Loving My Brother #1: Thrale's Stupidity

Chapter 65:

Thraleʼs POV

Nakahiga ako habang iniisip kung paano ko makikita si Arella. Gusto ko na siyang makita. Gustong bumawi sa kaniya sa panahong wala ako sa tabi niya. Alam ko talagang buhay siya, iyon ang sinasabi sa akin ng aking puso, nararamdaman ko. Kapag nakita ko na ito, sisiguraduhin ko na walang makakasakit dito. Poprotektahan ko dahil hindi ko nagawa iyon sa kaniya noong sa tatay niya.

Ngayon ko gagawin kapag nakita ko na siya kaya sana malaman na ni Gio kung saan nakatira si Arella. Iyon nalang ang hinihintay ko. Napagpasyahan kong pumunta sa bahay nila Gio para malaman kung may bagong balita sa paghahanap niya kay Arella.

Pagbaba ko ay nakita ko si Anissa. Niyakap ko ito at nagpaalam sa kaniya na aalis muna ako. Maglalakad na sana ako nang bigla niyang tawagin ang aking pangalan.

“Thrale.”

Napalingon ako sa kaniya at hinihintay ang susunod niyang sasabihin.

“Mag-ingat ka.” Nakangiting sabi nito.

Nginitian ko siya saka ipinagpatuloy ang paglalakad. Nakapasok na ako sa aking kotse. Naalala ko ang mukha ni Anissa, parang may nais itong sabihin pero hindi niya na tinuloy pa. Ano kaya iyon? Napabuntong hininga na lamang ako. Babawi nalang ako sa kaniya pagkatapos ng aking ginagawa, kapag nahanap ko na si Arella.

Mabilis kong pinaandar ang aking kotse papunta sa bahay nila Gio. Habang nagmamaneho ako biglang tumaginting ang aking selpon. Tiiningnan ko, may tumatawag at si Gio 'yon kaya mabilis kong sinagot.

“Napatawag ka?”

“Good news, pumunta ka rito sa bahay.”

“Okay.” Sagot ko at binaba ang tawag.

Mabilis kong pinaandar ang kotse. Kung minamalas ka nga naman, trapiko pa kung kailan malapit na ako sa bahay nila Gio. Saka pa ako naipit, nakakainis. Wala akong nagawa kun’di ang maghintay sa loob ng kotse at kung kailan uusad itong mga sasakyan. Tumaginting muli ang selpon ko, nakita kong may mensahe galing kay gio.

From: Gio

Nasaan ka na?

Huminga ako nang malalim bago tumugon dito.

To: Gio

Malapit na ako sa inyo kaso naipit ako sa traffic. Kainis.

Napangiti ako nang makitang umuusad na. Mabilis kong pinaandar ang aking kotse. Mabilis akong nakarating sa tapat ng bahay nila Gio at agad na bumaba. Nakapasok sa loob ng bahay nila. Dumiretso ako sa kaniyang kwarto dahil alam kong nandoon siya.

Narating ko ang silid nito, walang katok katok, binuksan ko ito agad. Nakita ko siyang seryosong nakatingin sa kaniyang laptop, hindi man lang naramdaman ang presensya ko sa kaniyang likuran. Mahina talaga ang pakiramdam nito. Tinignan ko rin ang kaniyang ginagawa sa laptop. Naghahanap ito sa google map.

“Any updates?” Agad siyang napaigtad. Marahil nagulat siya sa aking boses.

“Kanina ka pa?” Tanong niya sa akin.

“Medyo, bakit?”

Umiling ito sa akin at may pinakita na address.

"Anong mayroon diyan?”

“Diyan nakatira sa address na iyan ang hinahanap mong si Arella.” Seryosong sagot niya sa akin.

“Puntahan natin ngayon.”

Tumango naman siya sa aking sinabi. Binalik niya muna ang google map sa kaniyang laptop bago patayin. Napansin ko ang wallpaper niya sa computer, babaeng nakatalikod at parang pamilyar sa akin iyon.