အိမ် အောက်ထပ်သို့ ဆင်းသွားချိန် ထမင်းစားခန်းမှ စကားပြောသံများကို နေသူရိန်မင်းခန့် ကြားလိုက်ရသည်။
ဦးနေမင်းခန့် စကားသံနှင့် မရှေးမနှောင်း ထွက်ပေါ်လာတာက မိန်းကလေး တစ်ယောက်၏ ခပ်သဲ့သဲ့ ရယ်မောသံ။ ခြေလှမ်းများ နီးလာလေ ထိုရယ်သံ၏ ပိုင်ရှင်ကို သူ ရင်းနှီးလာလေ ဖြစ်သည်။
ထမင်းစားခန်း အပေါက်ဝမှာ နေသူရိန်မင်းခန့် ခြေစုံ ရပ်လိုက်သည်။ အတွင်းမှ စကားသံနှင့် ဇွန်းသံ၊ ခက်ရင်းသံများ အဆက်မပြတ် ထွက်ပေါ်လာနေဆဲ။ တံခါးမကြီးကို နေသူရိန်မင်းခန့် တွန်းဖွင့်ကာ အခန်းတွင်းသို့ ဝင်လိုက်သည်။
အနောက်တိုင်း စတိုင်လ် ပြင်ဆင်ထားသော မနက်စာ ထမင်းဝိုင်းတွင် ဦးနေမင်းခန့်နှင့် အတူ ထိုင်နေသော သူက . . . ။
"အိုကားစံ"
"Aka . . သား နိုးလာပြီလား"
မပီသသော မြန်မာ စကားသံက ဂျပန်လေသံနှင့် အတူ ထွက်ပေါ်လာသည်။ နေသူရိန်မင်းခန့် ရှေ့က မိခင်ဖြစ်သူ ဟာနကိုသည် ပန်းနုရောင် ဇာဂါဝန်ရှည်လေးကို ဝတ်ထားပြီး ဆယ်ကျော်သက် မိန်းကလေး တစ်ယောက်လို နုဖတ်နေသည်။
ဘဲဥ သဏ္ဌာန် မျက်နှာဝိုင်းနှင့် ဝင်းမွတ်လွန်းသော ပါးပြင်များက ပန်းနုရောင် ခပ်သန်းသန်း။ နဖူးပေါ် ခွေကျနေသော ဆံပင်လိပ်နှင့် ခပ်တိုတို ညှပ်ထားသည့် ကုပ်ဝဲ ဆံပင်လေးက လှပခြင်းထက် ပိုသော ချစ်စရာကောင်းခြင်းကို ပုံပေါ်စေသည်။
"ကြည့်စမ်းပါဦး၊ မမြင်ရတာ ကြာတော့ မေမေ့သားက သိပ် ချောလာတာပဲ"
နေသူရိန်မင်းခန့် စားပွဲဝိုင်းဆီ လျှောက်သွားကာ မိခင်ဖြစ်သူ ဟာနကို၏ မျက်နှာချင်းဆိုင်က ခုံမှာ ထိုင်လိုက်သည်။ မိခင်က သူ့ကို ပြုံး ကြည့်၏။
"ဘယ်သူနဲ့ တူလို့ပါလိမ့်"
"ကိုယ်နဲ့ တူလို့ ဖြစ်မယ်"
ဦးနေမင်းခန့် အဖြေ။ ဘယ်လူးဘယ်ရီ ယိုကို ဓားထိပ်ဖြင့် လှမ်းယူကာ ပေါင်မုန့် မီးကင် တစ်ချပ်ပေါ် သုတ်လိမ်းရင်းမှ ပြောလာခြင်း ဖြစ်သည်။
YOU ARE READING
SUN { Season 1 }
RomanceChoose me or Lose me ? I don't want to be your second CHOICE ! Start Date : 4th Feb 2022 End Date : 4th Nov 2022
