အမျိုးသားခုနစ်ယောက်ကို ချစ်ခွင့်ပန်ရမယ်တဲ့..! ဘယ်လိုလုပ်ရမလဲ..? [ 2 ]

194

Unicode

ယဲ့ကျန့်ဟန်..!

ထိုအမျိုးသားကိုကြည့်ရင်း ခြူးမုယွင်၏ မျက်ဝန်းအိမ်ထဲတွင် အံ့ဩရိပ်များ ဖြတ်သန်းသွား၏။ ဖြစ်စဉ်တစ်ခုလုံးကို ချက်ချင်း ပြန်တွေးကာ မိနစ်တိုင်း၊ စက္ကန့်တိုင်းပါမကျန် ပြန်လည်ဆန်းစစ်၍ အမှားလုပ်မိသည့် နေရာကို ကြိုးစားရှာဖွေလိုက်သည်။

သို့သော် မည်သည့်နေရာမျှ အမှားအယွင်းမရှိ။

သူကိုယ်တိုင် ယဲ့ကျန့်ဟန်၏ စိတ်ဝိဉာဉ်အပိုင်းအစကို ကြိုတင်ဖယ်ထုတ်ထားပြီးသားဖြစ်ရာ မူလခန္ဓာကိုယ်နှင့် ဆက်နွယ်မှုမရှိဘဲ ပေါင်းစည်းနိုင်မည်မဟုတ်ပေ။

သို့သော် သူ၏အရှေ့မှ အမျိုးသားဟာ တကယ့်ကို ယဲ့ကျန့်ဟန်ဖြစ်နေသည်။

ဘယ်နေရာမှာ မှားယွင်းသွားတာလဲ..?

လက်ရှိအချိန်မှာတော့ သူလည်း နားမလည်သေးပေ။ ထို့ကြောင့် ဖြစ်ပျက်သမျှကို စောင့်ကြည့်ရန်သာ တတ်နိုင်တော့သည်။

တစ်ခဏမျှ အံ့အားသင့်ပြီးနောက် ခြူးမုယွင်၏ မျက်ဝန်းနက်နက်များသည် ပြန်လည်တည်ငြိမ်သွားပြီး စိတ်အေးလက်အေး ဟန်ပန်အမူအရာမျိုး ပြန်ဖြစ်သွား၏။

ယဲ့ကျန့်ဟန်မှာ ထိုမြင်ကွင်းကို စောင့်ကြည့်ရင်း ရင်ခုန်မြန်လာသလို ခံစားလိုက်ရသည်။ ထိုအမျိုးသား၏ မျက်နှာလေးသည် တကယ့်ကို ညှို့ဓာတ်ပြင်းကာ ဆွဲဆောင်နိုင်လွန်းပေသည်။

နောက်ဆုံးတော့ သူ ထိုအမျိုးသားကို ထိတွေ့နိုင်ခဲ့သည်။ ရေခဲကျောက်သဖွယ် ဖြူဆွတ်သော အသားအရေသည် သူထင်ထားသလို ချောမွေ့သော်ငြား အရမ်းမနူးညံ့ပေ။ ထိရှလွယ်သယောင် ထင်မှတ်ရသော်ငြား တကယ်တမ်းတွင် အားအင်အပြည့်ဖြင့်။ အားနည်းပျော့ညံ့သော အသွင်အပြင်အောက် ဖုံးကွယ်တည်ရှိနေသော စိတ်ဝိဉာဉ်၏ စွမ်းအားများပင်။

ယဲ့ကျန့်ဟန်သည် ဘာမှမရှင်းပြဘဲ သူ၏ လက်ချောင်းများဖြင့် ခြူးမုယွင်၏ ခန္ဓာကိုယ်ကို တစ်လက်မချင်း၊ ဖြည်းဖြည်းချင်း၊ တတိတိဖြင့် ဖျစ်ညှစ်ပွတ်သပ်နေလေ၏။

ဤကား စစ်တုရင်ကစားပွဲကဲ့သို့ပင်၊ ဖိအားများသော အခြေအနေမျိုးတွင် အရင်ဆုံး လှုပ်ရှားမိသူက သူ၏အတွေးကို ထုတ်ဖော်လျက်သား ဖြစ်သွားရလိမ့်မည်။ ကိုယ့်ဘက်က အရင်မလှုပ်ရှားဘဲ အားပြိုင်မှုကို ဆက်ထိန်းထားနိုင်သရွေ့ တစ်ဖက်လူ၏ စိတ်ကို အပြင်းအထန် လှုံ့ဆော်နိုင်လိမ့်မည်။ ဆွဲဆန့်ခံလိုက်ရသော သံချောင်းတစ်ချောင်းနှယ်၊ ကျိုးပျက်မသွားဘဲ ၎င်း၏ ချွန်ထက်မှုဖြင့် တစ်ဖက်လူကို တိုက်ခိုက်နိုင်စွမ်းသည်။