အမျိုးသားခုနစ်ယောက်ကို ချစ်ခွင့်ပန်ရမယ်တဲ့..! ဘယ်လိုလုပ်ရမလဲ..? [ 2 ]

241

Unicode

ရန်ချန်း သူ့ကို ဘာလို့အပြင်မှာထားခဲ့မှန်း ခြူးမုယွင် သိသည်။

သူတို့နှစ်ဦး ပွင့်ပွင့်လင်းလင်း စကားပြောဖြစ်ပြီးနောက် ပြန်လည်ပေါင်းစည်းရန် အခွင့်အရေးများစွာ ရခဲ့ပါသော်ငြား ရန်ချန်းသည် ထိုသို့မလုပ်ခဲ့ပေ။

ယမန်နေ့ညက သူတို့ အရက်မူးသွားတာ ဖြစ်နိုင်သည်။ အချိန်ရပ်တန့်သွားသလို ခံစားခဲ့ရတာလည်း ဖြစ်နိုင်သည်။ နှစ်ယောက်သား သာယာစိတ်များဖြင့် စိတ်ကြွသွားတာ ဖြစ်နိုင်သည်။ သို့သော် ခန္ဓာကိုယ်၏ ကျေနပ်သာယာမှုအောက်တွင် စိတ်ဝိဉာဉ်က ဗလာကျင်းနေခဲ့၏။

ရန်ချန်းက သူနှင့် ခုတင်တစ်လုံးတည်းတွင် အတူမအိပ်ချင်ပေ။ အဘယ်ကြောင့်ဆိုသော် အတူအိပ်စက်ခြင်းက ချစ်တင်းနှောရတာထက် ပိုပြီး ကြောက်စရာကောင်းလွန်းသည်။ အတူအိပ်ရင်း ပွေ့ဖက်မိချိန်တိုင်း ခန္ဓာကိုယ်က သက်သောင့်သက်သာ ဖြစ်လာပြီး ထင်ယောင်ထင်မှား အတွေးများ ပေါ်လာနိုင်ပေသည်။

တစ်ဦးကိုတစ်ဦး နက်နက်ရှိုင်းရှိုင်း ချစ်မြတ်နိုးလေသယောင်၊ သူတို့၏ အသက်ရှူသံများ စည်းချက်ညီလာသယောင်၊ ခန္ဓာကိုယ်အပူချိန်က ထပ်တူကျလာသယောင်၊ နောက်ဆုံး နှလုံးခုန်သံပင် တစ်ချိန်တည်း ဖြစ်တည်လာသယောင်..

အနှီခံစားချက်များဟာ စိတ်ဝိဉာဉ်ကို ပျော်ရွှင်ကြည်နူးမှုများဖြင့် ပြည့်လျှံသွားစေနိုင်၏။

သို့သော် အရာအားလုံးက အတုအယောင်များသာ၊ တစ်ဖက်သတ် စိတ်ကူးယဉ်အတွေးများသာ။ အိပ်ရာနိုးလာသည်နှင့် ဗလာကျင်းနေသော စိတ်ဝိဉာဉ်ကို ပိုမို ဗလာကျင်းသွားစေလိမ့်မည်။ လေညင်းသဖွယ် စိတ်ကူးယဉ်အိပ်မက်က ခန္ဓာကိုယ်အတွင်းပိုင်းအထိ ထိုးဖောက်ဝင်ရောက်ကာ အနူးညံ့ဆုံးသော၊ ထိလွယ်ရှလွယ်သည့် ခံစားချက်များကို ထိုးနှက်ပစ်လိမ့်မည်။

သို့ဖြစ်ရာ ရန်ချန်းသည် ရှေ့ဆက်မတိုးရဲခဲ့ပေ။

ခြူးမုယွင်အနေဖြင့် ထိုခံစားချက်များကို နားလည်သော်ငြား ရှန်ရွှိန်ယန်းကတော့ နားမလည်နိုင်ခဲ့ပေ။ သူ၏ စိတ်ထဲတွင် အရာအားလုံး ရှုပ်ထွေးနေတော့သည်။