အမျိုးသားခုနစ်ယောက်ကို ချစ်ခွင့်ပန်ရမယ်တဲ့..! ဘယ်လိုလုပ်ရမလဲ..? [ 2 ]

235

Unicode

Zero : “Oh My God!”

ခြူးမုယွင် : “……..”

Zero : “ဇီးပန်းအလှကို ရှုစားမယ်ဆိုတာ ဘာကြီးလဲ..? အဲ့တာက….. ရှု… ရှုစားမလို့………..” ဘာကိုရှုစားမယ်ဆိုတာ သူ မပြောရဲဘူး..!

ခြူးမုယွင်က သက်ပြင်းဖွဖွချလိုက်သည်။ : “ကြည့်ရတာ ‘မနာလိုခြင်း’ကို ငါတို့ လျော့တွက်မိခဲ့ပုံပဲ..”

သူ၏လှည့်ကွက် ကျရှုံးသွားကတည်းက ရန်ချန်းဟာ သတိရှိနေပြီး ထောင်ချောက်ထဲ ခုန်ဆင်းလာမည်မဟုတ်မှန်း ခြူးမုယွင် အတပ်သိလိုက်၏။ ပုံမှန်ဆိုလျှင် လူစည်ကားမှုကို ရှောင်ရှားရန် ချက်ချင်း ထွက်သွားမိမည်ပင်။ လက်ရှိအခြေအနေအရ သူသာ တခြားလူများရှေ့ ကိုယ်ယောင်ပြမိလျှင် ဇီးပန်းရောင်ဝါတောင်ကြီး ပေါက်ကွဲထွက်သွားပေလိမ့်မည်။

မော့ကျိုးရှောင်၊ ရှန်ရွှိန်ယန်းနှင့် လင်းရွှမ်တို့အားလုံး သူ့အကြောင်းသိနေပြီး ရှဲ့ချင်းလန်သည်လည်း သူ အသက်ပြန်ရှင်လာနိုင်ကြောင်း သိထားပြီးသားဖြစ်၍ တစ်ချက်ကြည့်လိုက်ရုံဖြင့် သူ့ကို တန်းသိသွားလိမ့်မည်။ ထိုအချိန်ရောက်လျှင် ဇီးပန်းရောင်ဝါတောင်ပေါ်၌ ဇီးပန်းပွင့်များ ရှုစားရတော့မည်မဟုတ်ဘဲ ကောင်းကင်ပေါ်မှ မီးရှူးမီးပန်းများကိုသာ ရှုစားကြရလိမ့်မည်။

အင်း… ကောင်းကင်ပေါ်က မီးရှူးမီးပန်းဆိုတာ သူ လေပေါ်ပျံတက်ပြီး ပေါက်ကွဲထွက်သွားလို့လေ..!

သို့သော် သည်အတိုင်း ထွက်သွားရန်လည်း အဆင်မပြေ။ ရန်ချန်းက သူ့ကို အလွတ်ပေးမှာမဟုတ်သလို အကယ်၍ ယဲ့ကျန့်ဟန်၏ အကူအညီဖြင့် ထွက်သွားနိုင်ခဲ့လျှင်ပင် ရန်ချန်း ဘယ်လိုတုန့်ပြန်လာမလဲဆိုတာ ခန့်မှန်းရခက်လှသည်။

သို့နှင့် ခြူးမုယွင်၏ စိတ်ထဲတွင် သံသယတချို့ ပေါ်ထွက်လာခဲ့လေသည်။

ဒီကိစ္စကို အမြန်ဆုံး အတည်ပြုမှဖြစ်မယ်။ မဟုတ်ရင် ပြဿနာတက်သွားလိမ့်မယ်..!

ရန်ချန်းက ကိစ္စအားလုံးကို သိနေတယ်ဆိုပါစို့။ အဲ့တာဆို သူ ဘယ်လိုသိသွားတာလဲ..? ပြီးတော့ အားလုံးသိနေတာတောင် ဘာမှမပြောဘူးဆိုတော့ ဘာတွေကြံစည်နေတာလဲ..?