شاعر لعيون القصيد

البارت 21

طلعت شموخ برا المستشفى وكانت تعدل الشماغ الي براسها لانها لبسته على السريع وبنفس الوقت ما تبي تذكر حيدر في ذاك الليلة وعشان ما يربط الامور فبعضها ويقفطها
ولكن تدري بنفس الوقت ان مستحيل يعرفها ولو كل شيء واضح قدامه لانه هو مو حاط بباله ولو نقطة ان شموخ هي عيون القصيد مستبعدها كليا
نزل حيدر من الدرج وشافها واقفة عند المراية وتعدل في شماغها
وتقدم وهو يقول :انا متيسر
شموخ لفت له وابتسمت ابتسامة خفيفة تبي ترجع تشكره لكن ما تدري كيف
حيدر عرف وش الي تبي تقوله وقال قبلها :ادري بتقولين ما قصرت تشكريني مرة ثانية لكن برجع اقولتس ما سويت الا واجبي وامتس هي بمقامة امي
شموخ ضحكت :زين قلت الي ابي اقوله ما ضل شيء
حيدر ابتسم لانه واخيرآ شاف ضحكتها وللحين شكلها وهي خابيفة على امها بعيونه :ما بغينا نشوف سنونتس
شموخ رجعت ضحكت وبعدها ناظرت الجمس الي كانو الخرفان ورا وفرطت ضحك:والحين وش بتسوي مع خوياك هذول!؟؟
حبدر ناظر لهم ودخل يده بشعره وهو يضحك:والله كنت جايبهم لكم
شموخ:صدق؟
حيدر:اييه اجل ليه ادق عليكم الباب
شموخ :والله اني من اللبكة ما عرفت اشلون جيت ومتى وكيف
حيدر:معذورة وانا اخوتس معذورة
ابتسمت شموخ من كلمة اخوي وفرحها انه هو ما يفكر فيها ولا يحبها هو بدا عيون القصيد ما تبي يكمل معها هي كشموخ تبيه يكمل بحبه لها كعيون القصيد وقالت بعشوائية:هاه جاهز للسباق!؟
حيدر سكت يفكر وهو فعلا جاهز لكن يدري هي فرصة وحدة بعدها مافي ثاني:تقريبآ جاهز
شموخ:انزين متى موعدنا!؟
حيدر يفكر:بأذن الله بعد العيد
شموخ ابتسمت :تم
حيدر ضحك :اشوفتس مستانسة اكثر مني !؟
شموخ رفعت حاجبها بضحكة:اييه والله اكذب لو اقولك منيب مستانسة
حيدر سكت للحظات وهو يناظر فيها وبعدها قال :انا اتيسر اجل باخذ الخرفان المزرعة وان شاء الله يصير كل خير
شموخ :الله معك
ركب حيدر سيارته وعيون شموخ ترااقبه ب حب يوضح بين عيونها الكل يلاحظه معاد حيدر الي ما فكر فيها ابد وذا دليل ان حبه لعيون القصيد صاادق وكل فكره وباله كان بالسباق وكل ما يقرب اليوم الموعود ينقبض قلب حيدر بالفرحة والضيق انه يخسر لكن داري ان ذا المرة غيير لانه تدرب وااجد

بغرفة صقر وعهد
عهد مثل عادتها قبل النوم لازم تسوي شغلة وتخلصها وكانت اليوم تخيط زر ثوب صقر الي نعساان ومحتري دلال تجي ويناام وراه شغلل
وعهد مصدية بوجهها عنه :ترا ما بتجيي اكيد نامت ذي تدري فيها ساهية فاهية خلني انا اهمز لك
صقر منسدح ويتثاوب :لا بتجي صح ساهية فاهية لكن دلين ما تناام ان ما همزت لي تصحى من عز نومها عشاني
عهد خلصت وقامت رجعت كل شيء مكانه وهي صادة نظرها من ثقته وهالمرة صقر ناظر لها ورسم فباله علامات استفهام وشبلاها عهد زعلانه ومادة بوزها ما حط بباله ابد من دلين وقال :عهد
عهد لفت له وهي محتريته يتكلم
صقر :وشبلاتس؟
عهد ما تكملت وجت جلست طرف السرير :ما فيني شيء لكن انا ابي اهمز لك مو بس تبي دلين تهمز لك
صقر ضحك وقال :طيب يالله همزي لي اشوف
عهد ابتسمت وتقدمت قعدت عنده ومدت يدها تهمز رجوله وصقر ما تكلم رغم انها ما تعرف تهمز زي دلين ابدد لكن ما حب يكسر بخاطرها
وجت دلال وهي زي كل مررة متأخررة :اسفة اسفة والله تويي خلصت شغلي وجيت
عهد لفت له :اي اشغال لا يكون قلبتي المطبخ وانتي تاكليين والله يا ويلتسس يا دلين لو قلبتيهاا اذبحتتس هااه
دلال جت قعدت :معلييتس ما قلبتهاا بس انكب عصير ومسحتهم
عهد :الله لا يوفق عدوينتس يا دلييين دارية ما مسحتيي زي الناس
دلال :لا مسحتت وغسلته بعد وان مو مصدقةة روحي شوفي
عهد كملت تهمز:ان رحت وشفت الارض مسكر من العصير والله يا ويلتس
دلال تقعد وهي رافعة حاجبها باستغراب :انتي وشبلاتس تهمزين لاخوي !؟
عهد :رجلي رجلي وشفيهاا لو همزت له ولا ما يعرف يهمز احد غييرتس؟
دلال :كملي ما قلنا شيء بس غريبة
عهد :لفي وجهتس بس لفيي ولا تخزيني
دلال :من زيينتس اخز فيتس
ولفت وجهها لاخوها وهي تقول :اقول اخوي وشصار على الهامستر الي بغيته منك !؟؟
صقر الي كان توه مغمض ومو معهم ابدد ومتعود على هواشهم قال بفهاوة من النوم:هاه؟؟؟
دلال :لا تقوولي نسييت قلت لك ابيي هامستر ذا العيد بدل العيديية ادريي نااسي وما بتجيب لي
صقر صحصح من تحلطمها :وش ذا هامستر والله معرفه
دلال اخذت جواله من فوق الدرج :لحظة اورييك بس
وعهد وصقر يناظروها محتريين وش تطلع لهم
دلال ابتسمت وهي توريهم :شوفو ذاا
قطبت حواجبها عهد من الي شافته :من جد جدتس تبين فاار!؟؟؟
دلال :انتي اصص ولا كلمةةة،"ولفت لصقر ببتسامة" هاه شقلت اخويي بتجيب ليي
صقر اخذ الجوال منها يتفرج عليهم :بسم الله وشذاا؟؟؟؟؟
دلال :هامستر، هنتارو ،فار ،اي شيء تبي تقوله بس المهم اني ابيه
صقر بضحكة:بسيييطة نروح المزرعة وبقفط لتس فار منه يا كثررهم بالمزرعة
دلال :صقرر تكفى لا تطقطق والله انيي صاادقة
عهد :واهوو صادق وش تبين بالفاار يا كثر الفيران بالديرة
دلال بصراخ : مهووووب فااار والله هاذا هامستر حيوان اليف الكل يشترييه
صقر رجع لها الجوال ورجع تسدح:يصير خير
دلال صدت:يعني ما بتجييب ليي
عهد :الله تعرفي تترجمين كلامه مين غششك بالله !؟؟
دلال ناظرت عهد وبعدها رجعت تقول :تككفى تكفى صقرر خلاص انت بس جييب لي هو وصدقني بعدها ما عااد بطلب ولاااا شيء
صقر :ما قلت ما اجيب بس قلت يصير خير
دلال سكتت وهي تدعي ان يجيب لها وكملت تهمز له وبعد دقاايق غفي صقر
ودلال وعهد همزو له لين نام وبعدها قامت دلال ترجع غرفتها تنام وعهد قامت من مكانها وراحت سدحت جنب صقر الي كان توه نايم و واضح التعب من شكله وابتسمت لشكله وهيي تحس تعششق صقر النايم تحب تتأمل فيه برااحتها
وحطت يدها تحت راسها بهيمان وقالت:صقر!
صقر كان توه نايم كان يسمع لكن وهو نايم يعني ما يحس انه من الواقع يحس وكنه ذا الصوت من الحلم
ابتسمت عهد ابتسامه حب خليط مع ابتسامة ندم من الي سوته : ادري اني جرحتك ،.وجرحتك حيل وكسرت فيك حب كنت بانيه من سنيين ،صديتك وانا ماني بدارية انك ارق على قلبي مني
تنهدت تنهيدة من القلب :وماني بمخفية اني حبيتك وحبك صحاني على جهلي للحب، احبك يا صقر والله احبك بس ودي يرجع الزمن وما اجرحك واصدك  "وابتسمت وهي تتذكر طيبه وحنيته" الحب وشهو من دون صقر!؟؟ مثل الليل بدون القمر
وتقدمت منه وطبعت بوسة خفييفة بخده :احبك حب ماني بمخفيه وان خفيته والله ان عيوني تفضحني،. الصدر يستر القلب والعيون تفضحه
ورجعت ببتسامة وهي تتأمله ب حب وغمضت عيونها ببطئ
ونامت
وصقر كان يسمع الواقع لكن كان يعيشه حلم وهو مو بداري انه واقع ،وعهد نامت بعد ما عيشت صقر بحلم ما يزوره دايم