ချစ်သူ့စကား ရင်နှင့်ကြားစေ

part(57)

Unicode

မြေတွေလိုက်ကြည့်ရင်း....မိုးဦးအကြိုက်တွေ့သည့်မြေရလာခဲ့ပြီ။ ဒေါ်စောနုတို့အမျိုးဝမ်းကွဲ​တွေရဲ့မြေပါပဲ။ လိုသလောက်အကျယ်ရလာသည့်အပြင် ရွာနဲ့မဝေး။ ဒါကြောင့် မိုးဦးက ရွာထဲတွင်အိမ်အတွက် မြေ နေရာမဝယ်တော့ဘဲ အခင်းထဲတွင် အိမ်ကောင်းကောင်းတစ်လုံးဆောက်မည်ဟုစီစဥ်သည်။ ရွာနဲ့က အလွန်ဆုံးသွားရမှ ငါးမိနစ်ခန့်သာ။

ဒီနေရာကိုကြိုက်ပြီဆိုတာနဲ့ ချက်ချင်းဝယ်ဖို့လုပ်ကြရသည်။ မိုးဦးက ဝယ်ယူသည့်မြေကို ပြင်ရအုံးမည်။
လီလီစိုက်ဖို့ဆိုရင် မြေအရင်ပြင်ရမည်။ စက်တင်ဘာမှာစိုက်ဖို့အတွက် ခုကထဲကသွက်သွက်လုပ်ထားရမည်။
ရာသီမရွေးစိုက်လို့ရသည်ဆိုပေမဲ့ စက်တင်ဘာက စိုက်လို့အကောင်းဆုံးလဖြစ်သည်တဲ့။

နေရောင်ကြိုက်သည့်ပန်းဆိုပေမဲ့ အမိုးလုပ်ပေးရမည်။ အေးတဲ့မြေကြိုက်ပေမဲ့ ရေဝပ်မခံ။ ဒါကြောင့် ပန်းမစိုက်ခင် ပြင်ဆင်စရာရှိတာတွေပြင်ဆင်ရမည်။ ဒါ့အပြင် နေဖို့ရာအတွက်အိမ်ကိုလဲ ခပ်မြန်မြန်ဆောက်ရမည်။

မိုးဦးက ကျွန်း သို့မဟုတ် ပျဥ်းကတိုးနှင့်သစ်သားအိမ်တောင့်တောင့်ဆောက်ချင်တာ။ ရေချိုးခန်း အိမ်သာနဲ့ မီးဖိုခန်းကိုတော့ အုတ်နဲ့ပဲဆောက်မည်။ အိမ်မကိုသစ်အိမ်လေးနေချင်သည်။ သစ်ရှာရမည်။ ကျွန်း ပျဥ်းကတိုးရှိရောရှိသေးပါရဲ့လား။ သစ်ကရှာတာတော့ရှားရမည်။ လိုသလောက်ရနိုင်ပါ့မလားရယ် ရင့်တာရပါ့မလားရယ်ပေါ့။
အိမ်ဆောက်ဖို့သစ်ဝယ်မှ ခက်နေတာ။
တစ်တောလုံးအပြောင်ရှင်းရတာကမခက်။

ဦးလေးသန်း ဖိုးကျော်နဲ့ အဒေါ်စောနုတို့ကတော့ တစ်ရက်မှမနား​ကြ။အားလုံးကူညီကြတာ။ မိုးဦးလဲမနားပါ။ ဒေါ်စောနုအမျိုးတွေနဲ့ တစ်ချို့ရွာကလူကြီးတစ်ချို့လဲ လိုတာအကုန် ကူညီကြသည်။ လီလီပန်းစိုက်မည်ဆိုတော့ တစ်ရွာလုံးစိတ်ဝင်စားကြသည်။ ဒါ့အပြင် မိုးဦးကငွေကိုထိုက်သင့်သလောက်သုံးနေတော့ ပိုပြီးစိတ်ဝင်စားသည်။ ငွေသုံးပုံကအစ တောသူတောင်သားနှင့် မိုးဦးကွာခြါးပါသည်။ မြေကြိုက်ပြီဆို စျေးမဆစ်။သစ်ကြိုက်တာတွေ့ရင် စျေးမဆစ်သူ။
သော်ကတော့ ကို့ သဘောသာ။ ကို လုပ်သမျှ အားလုံးခေါင်းညိမ့်ရုံပါပဲ။