Love Between Serpent Beastman & Cuttie Hamster

🐍💖ရှုရှုအား ချစ်ရကျိုးနပ်ခဲ့၏💖🐍/🐍💖ရႈရႈအား ခ်စ္ရက်ိဳးနပ္ခဲ့၏💖🐍

ထိုလူကြီးကမြွေကြီးတဲ့လား-2

(Unicode)

မြွေကြီးကကျားကြီးကို သူနဲ့ဝေးရာဆီ ခေါ်သွားပေးနေတာလား။ အဲ့ဒီမြွေကြီးက သူသေလောက်အောင်ကြောက်ခဲ့ရသည့် ယခင်ကမြွေကြီးလား။

ရှုရှု၏ဦးနှောက်ကလေးမှာ အလုပ်မလုပ်နိုင်တော့ပေ။ မှန်သလား၊မှားသလား မသေချာသည့်အတွက် ဆက်၍မတွေးတော့ရန်သာ ဆုံးဖြတ်လိုက်၏။ သူ၏ကိုယ်ထဲမှရှိသည့် စိတ်စွမ်းအင်စွမ်းအားအနည်းငယ်အားသုံးကာ သူမြန်မြန်လမ်းလျှောက်နိုင်ရန် ကြိုးစားကြည့်လိုက်၏။ ကံမကောင်းစွာပင် သူပို၍စိုးရိမ်မှုလွန်ကဲလာလေလေ...သူပို၍မလှုပ်နိုင်လေလေဖြစ်နေ၏။ နောက်ဆုံးတော့ သူသေ၊ကိုယ်သေ တိုက်ခိုက်နေကြသည့် ဧရာမသားရဲနှစ်ကောင်အား ဗလာသက်သက်စိုက်ကြည့်နေမိတော့၏။

သားရဲနှစ်ကောင်တိုက်ခိုက်သည့်အချိန် ကြာလာသည်နှင့်အမျှ အနိုင်ရမည့်သူအားခန့်မှန်းနိုင်လာ၏။ မြွေအကြီးကြီးမှာ တစ်ကိုယ်လုံးစုတ်ပြတ်ဒဏ်ရာရနေသော်လည်း ပို၍သန်မာပုံရပြီး ကျားကြီးအားသေသည်အထိ ညစ်ကာသတ်လိုက်၏။

ထိုအချိန်မှ ရှုရှုလည်း လှုပ်ရှားနိုင်တော့၏။

ခြေလက်လေးချောင်းလုံး တောင့်တင်းနေသော်လည်း ရှုရှုကဖြည်းဖြည်းချင်းထကာ လေးဘက်ထောက်၍ ကုပ်ကုပ်၊ကုပ်ကုပ်ဖြင့် ဝေးရာဆီသွားနေ၏။ အနည်းငယ်သွားပြီးနောက် သဘောကောင်းသည့်လူကြီး၏ကိုယ်အနံ့အား ရှုရှုခံစားမိလိုက်၏။

ထိုလူကြီးကော ဒီနေရာမှာရောက်နေတာလား။

ရှုရှုက ဆက်မသွားတော့ပဲ အံကိုကြိတ်ကာ ထိုလူကြီးအားရှာရန် သားရဲနှစ်ကောင်ရှိရာဆီပြန်သွားလိုက်၏။

ဧရာမကျားကြီးမှာ သေဆုံးနေပြီး မြွေကြီးမှာလည်း မြေကြီးပေါ် မလှုပ်မယှက်လဲကျနေ၏။ သို့သော် မြွေကြီး၏ကိုယ်မှာ ထွက်သွားချင်ဟန်ဖြင့် လှုပ်ရှားလိုက်သော်လည်း မလုပ်နိုင်ခဲ့ပေ။ ရှုရှု၏ချဥ်းကပ်လာခြင်းအား သိရှိပုံပေါ်ပြီး မြွေကြီး၏မျက်လုံးအစုံက ရှုရှုပေါ်ကျရောက်လာ၏။

ရှုရှုမှာ မြေကြီးပေါ်ဒူးထောက်နေရင်း တစ်ကိုယ်လုံးတုန်ယင်သွားနေလေ၏။ သွားများမှာလည်း တကပ်ကပ်အသံထွက်သည်အထိ တုန်ယင်နေပြီး နားရွက်ပွပွအစုံမှာလည်း ထောင်တက်နေကာ သူ၏လက်သည်းလေးများပင်ထွက်နေ၏။ ရှုရှု​က သူ့အားပျော်ရွှင်စေသည့် သဘောကောင်းသည့်လူကြီး၏အနံ့အား ရှာဖွေနေသည့်အတွက် မြွေကြီးကြောင့်ထွက်ပြေးချင်သော်လည်း ကိုယ်ကိုကိုင်းကာအနံ့ခံလိုက်၏။