ဝိဉာဉ်ကူးပြောင်းခဲ့ပြီးနောက် သောက်တလွဲတွေဖြစ်ကုန်ပြီ!

37

Unicode

“ရောက်ပြီ..”

ရင်းဆုယဲ့က သူ့ရင်ခွင်ထဲက အိပ်ချင်မူးတူးဖြစ်နေတဲ့ ကောင်ငယ်လေးကို နူးညံ့ညင်သာစွာ သတိပေးလိုက်တယ်။

“နောက်ဆုံးတော့ ရောက်ပြီပေါ့..!”

ရောက်ပြီလို့ အသံကြားလိုက်တာနဲ့ ရွှယ်ယို့ရှန်းလည်း ငိုက်မျဉ်းနေရာမှ ချက်ချင်းနိုးလာခဲ့တယ်။ မျက်ဝန်းတွေကို အကျယ်ဆုံး ဖွင့်လိုက်ရင်း သူ့ဝတ္ထုဇာတ်ကြောင်းထဲက အရမ်းအရေးပါတဲ့ နေရာတစ်ခုဖြစ်လာမယ့် နိမိတ်ဆိုးကြမ္မာငင်ရေကန်ရဲ့ သဘာဝရှုခင်းတွေကို သေသေချာချာ ပြူးပြဲကြည့်လိုက်တယ်။

ကြည်လင်နေတဲ့ကန်ရေ၊ လေညင်းနဲ့အတူ ယိမ်းနွဲ့နေတဲ့ ကြာပန်းပွင့်ကြီးတွေ၊ ပြီးတော့ အကောင်သေးသေးလေးတွေနဲ့ ငှက်ကလေးတွေကလည်း ရေကန်အနီးတစ်ဝိုက်မှာ အနားယူနေကြသလို ရေသောက်နေကြလေရဲ့။ အရမ်းတိတ်ဆိတ်အေးချမ်းပြီး ရှုမငြီးဖွယ်ရာ မြင်ကွင်းပါပဲ။

ရေကန်ပတ်ပတ်လည်ကို မြူခိုးတွေနဲ့ ရစ်ပတ်လွှမ်းခြုံထားပြန်တော့ နဂိုလှပပြီးသား မြင်ကွင်းက ရစ်မူးမိန်းမောဖွယ်ရာ နတ်သမီးတိုင်းပြည်သဖွယ် စိတ်ကူးယဉ်ဆန်နေတော့တယ်။

ရွှယ်ယို့ရှန်းကတော့ ဒီနေရာရဲ့ ရှုခင်းတွေကို အသက်ရှူမှားလောက်အောင် ရေးဖွဲ့ထားခဲ့တာက အဓိကဇာတ်လိုက်နဲ့ သူ့ရဲ့ အချစ်လေးတွေ ချိန်းတွေ့နိုင်အောင် ရည်ရွယ်ထားခဲ့တယ်ဆိုတာ ဘယ်တော့မှ ဝန်ခံမှာမဟုတ်ဘူး။ ပြီးတော့ ဒီရေကန်နဲ့ ပက်သက်ပြီး များပြားလှတဲ့ ဇာတ်ကွက်တွေ ထပ်မံထည့်သွင်းထားခဲ့သေးတယ်။ ဥပမာပြောရရင် အန္တရာယ်တွေ ပတ်ပတ်လည် ဝန်းရံနေတာမျိုးပေါ့။

ကံမကောင်းချင်တော့ နိမိတ်ဆိုးကြမ္မာငင်ရေကန်ကို အဓိကဇာတ်လိုက် ရောက်မလာသေးတဲ့အတွက် ရေကန်ရဲ့ အလှတရားက ပြီးပြည့်စုံတဲ့ မိန်းမောဖွယ်ရာအခြေအနေမျိုး မဖြစ်သေးဘူး။

တခြားဟာတွေ အသာထားဦး.. သူ့အတွက် ဒီနေရာကို အလှလေးတစ်ယောက် ခေါ်လာဖို့ဆိုတာလည်း လုံးဝမဖြစ်နိုင်ဘူးလေ။ အဲ့အစား ဝိဉာဉ်ကူးပြောင်းလာတဲ့ ဒီအစ်ကိုကြီးက ဗီလိန်ဇာတ်ကောင်ရင်းဆုယဲ့နဲ့ ဒီရေကန်ကို အရင်ဆုံး ရောက်လာရသတဲ့။ သေသေချာချာတွေးကြည့်ရင် ဘယ်လိုကြီးမှန်းကို မသိဘူး။ တစ်ခုခု ထူးဆန်းနေသလိုပဲ.. ဟမ့်..!