ဝိဉာဉ်ကူးပြောင်းခဲ့ပြီးနောက် သောက်တလွဲတွေဖြစ်ကုန်ပြီ!

123

Unicode

“သတ်.. သတ်ပစ်လိုက်ပြီ..?!”

ထိုမြင်ကွင်းကို မြင်လိုက်ရတဲ့လူတိုင်း ရင်းဆုယဲ့ရဲ့ ရုတ်တရက်ဆန်တဲ့ အပြုအမူကြောင့် မျက်လုံးကျွတ်ကျလုမတက် အံ့ဩထိတ်လန့်သွားကြတယ်။ အထူးသဖြင့် ဝေရိခေါ်လာသောလူတွေက လူသားဘုရင်အသစ် အခုလို လူသတ်လိမ့်မယ်လို့ မထင်မှတ်ထားခဲ့ဘူး။

သူတို့ဘာမှမတတ်နိုင်ခင် သူတို့ရဲ့ခေါင်းဆောင်က အသတ်ခံလိုက်ရပြီ။ လူတိုင်း မှင်သက်သွားပြီး မျက်နှာပျက်ယွင်းသွားကြတယ်။ နောက်တော့ သတ္တိအနည်းငယ်ရှိတဲ့ လူတချို့က အကြောက်တရားကို ထိန်းချုပ်ပြီး ပြင်းထန်လွန်းတဲ့ ဖိအားအောက်မှာ ရင်းဆုယဲ့ရဲ့ လူမဆန်တဲ့လုပ်ရပ်အပေါ် စတင်စွပ်စွဲကြတော့တယ်။

သူတို့ရဲ့စိတ်ထဲမှာ ရင်းဆုယဲ့ သတိလစ်နေတဲ့တစ်လျှောက် ဝေရိက ကြိုးစားပမ်းစားနဲ့ သူတို့ကို ဦးဆောင်ပြီး အရှုပ်အထွေးတွေကို ဖြေရှင်းပေးခဲ့တဲ့အတွက် မချီးမွမ်းရင်တောင် အသိအမှတ်ပြုသင့်ပါတယ်လို့ တွေးနေကြလေတယ်။

သို့ပေမယ့် ရင်းဆုယဲ့ သတိပြန်ရလာတဲ့အချိန် အရာအားလုံးကို လျစ်လျူရှုလိမ့်မယ်လို့ ဘယ်သူထင်ထားခဲ့မှာလဲ?

ရင်းဆုယဲ့က အသိအမှတ်မပြုတဲ့အပြင် ဘာမဟုတ်တဲ့ စကားအနည်းငယ်ကြောင့် သူတို့ရဲ့ခေါင်း‌ဆောင်ကို ဒီအတိုင်း သတ်ပစ်လိုက်တယ်။ ထိုအခြင်းအရာက သူတို့ကို လက်မခံနိုင်အောင် ဖြစ်သွားစေတယ်။ ထို့ကြောင့် ရင်းဆုယဲ့အား မကျေမနပ် ပြောဆိုကြတော့တယ်။

“မင်းက လူသားဘုရင် မဟုတ်ဘူးလား..? ဒီလိုမျိုး မဆင်မခြင် လူသတ်လို့မရဘူးလေ..”

“ကျုပ်တို့ခေါင်းဆောင်က ဘာအမှားမှ မလုပ်ခဲ့ဘူး.. သူ့ကို ဘာလို့သေဒဏ်ပေးလိုက်တာလဲ..?”

“ကြီးမြတ်သော ဘုရင်အဆင့်ကို ရောက်နေပြီဆိုရင်တောင် ခင်ဗျားကို ဘုရင်အသစ်အဖြစ် မတင်မြှောက်ရသေးဘူး.. စွမ်းအားသုံးပြီး ထောင်လွှားနေတာ တစ်လောကလုံးကို မျက်လုံးထဲ မထည့်တော့ဘူးလား..!”

***

တစ်ယောက်က ရှေ့ထွက်ပြောလိုက်တာနဲ့ ကျန်လူတွေလည်း မျက်စိစုံမှိတ် လိုက်ပြောကြတော့တယ်။ တဖြည်းဖြည်းနဲ့ သူတို့ရဲ့ စကားတွေက ရုန့်ရင်းကြမ်းတမ်းလာခဲ့တယ်။