ဝိဉာဉ်ကူးပြောင်းခဲ့ပြီးနောက် သောက်တလွဲတွေဖြစ်ကုန်ပြီ!

89

Unicode

“မဟုတ်ဘူး၊ မဖြစ်နိုင်ဘူး၊ ကျုပ်က ဟော်လင်းယွင်ရဲ့သားမဟုတ်ဘူး..!”

အမှိုက်ဖြစ်သွားပြီဆိုတဲ့ ရက်စက်လွန်းတဲ့ အမှန်တရားကြောင့် အသိစိတ်လွတ်နေခဲ့တဲ့ ရင်းဝူရွှမ်ခမျာ သူ့ရဲ့ပတ်ဝန်းကျင်မှာ ဘာဖြစ်လို့ဖြစ်နေကြမှန်း သတိမပြုမိခဲ့ဘူး။ အလင်းတန်းတစ်ခုက သူ့ရဲ့ခန္ဓာကိုယ်ထဲကို ရုတ်တရက် ဝင်ရောက်လာပြီး ဟော်လင်းယွင်နဲ့ သွေးချင်းဆက်သွယ်မှုကို ခံစားလိုက်ရတော့မှ အခြေအနေတွေကို သတိပြုမိလိုက်တော့တယ်။

အစောပိုင်းကတော့ သူက ရင်းမင်ရဲ့သားအရင်းမဟုတ်ဘူးဆိုတဲ့ စကားကို စိတ်ထဲမထားခဲ့ဘူး။ သိသာစွာပဲ ရွှယ်ယို့ရှန်းဆိုတဲ့ ကလေးငယ်က ရင်းဆုယဲ့ရဲ့ ဘက်တော်သားဖြစ်တာကြောင့် သူ့အကြောင်းကို သွားပုတ်လေလွင့်လျှောက်ပြောနေတာလို့ ထင်နေခဲ့တယ်။ သို့သော်ငြား ထူးဆန်းတဲ့ အလင်းတန်းကြောင့် ဟော်လင်းယွင်နဲ့ သွေးသားဆက်စပ်မှုကို ခံစားလိုက်ရတဲ့အချိန် ရင်းဝူရွှမ်လည်း ထိတ်လန့်တုန်လှုပ်သွားရပြီး ထအော်လိုက်မိတယ်။

“ပါးစပ်ပိတ်ထား..!”

ရင်းမင်တစ်ယောက် စိတ်မထိန်းနိုင်လောက်အောင် ဒေါသူပုန်ထနေချေပြီ။

ဟော်လင်းယွင်နဲ့ ချန်းရုန်ယန်က နှစ်ပေါင်းများစွာကြာအောင် သူ့ကို လှည့်စားခဲ့ရုံတင်မကဘူး၊ သူတို့ရဲ့ သားဖြစ်သူကိုလည်း ပြုစုစောင့်ရှောက်ခိုင်းခဲ့တယ်..! ဒီ ‘ဦးထုပ်စိမ်း’ကြီးကတော အရမ်းကြီးမားလွန်းသွားပြီ..! ဒီမျိုးမစစ် ခွေးဇာတ်ခင်းတဲ့ဟာတွေကတော့..!

အစတုန်းက ဒီကိစ္စကြီးတစ်ခုလုံးကို ရင်းဆုယဲ့ ဖန်တီးထားတာလို့ ရင်းမင်က သံသယဝင်နေခဲ့တယ်။ သူနဲ့ ဟော်လင်းယွင်ကို ရန်တိုက်ပေးပြီး ရင်းမိသားစုနဲ့ ဟော်မိသားစုကို လက်စားချေချင်နေတာလို့ပေါ့။ သို့သော်ငြား တချို့လုပ်ကြံဖန်တီးလို့မရတဲ့ အကြောင်းအရာတွေ ပါဝင်လာခဲ့ချေပြီ။

ရွှယ်ယို့ရှန်းရဲ့ စွမ်းရည်က ရှေးဟောင်းစာအုပ်တွေထဲက ရေးသားချက်တွေနဲ့ တူညီနေတာကို အသာထားဦး။ ဒီကလေးပြုလုပ်ခဲ့တဲ့ သွေးသားစစ်ဆေးနည်းက တချို့စက်ပစ္စည်းတွေလို ယန္တရားပညာနဲ့ အတုလုပ်လို့ရတဲ့ အရာမျိုးမဟုတ်ဘူး။ ဒီအခြေအနေအထိ အမှားအမှန်မခွဲခြားနိုင်သေးရင် သူ့ရဲ့ဘဝတစ်ခုလုံးဟာ အလကားအချိန်ကုန်ခဲ့ရသလို ဖြစ်သွားတော့မှာပေါ့..!