ဝိဉာဉ်ကူးပြောင်းခဲ့ပြီးနောက် သောက်တလွဲတွေဖြစ်ကုန်ပြီ!

188 Extra

Unicode

မှန်မျက်နှာပြင်ပေါ်မှာ သွားတန်းဖြူဖြူ၊ နှုတ်ခမ်းရဲရဲလေးနဲ့ ကြီးကျယ်ခမ်းနားတဲ့ ဝတ်ရုံတစ်ထည်ကို ဝတ်ဆင်ထားတဲ့ လူငယ်လေးတစ်ဦးရဲ့ နူးညံ့သိမ်မွေ့တဲ့ အသွင်အပြင်လေးကို ဖော်ပြလျက်ရှိတယ်။ ရွှယ်ယို့ရှန်းမှာ ဒီမျက်နှာနဲ့ အသားကျနေတာတောင် အံ့ဩမှင်သက်ရတုန်းပဲ။ နည်းနည်းလေး ဝတ်စားပြင်ဆင်လိုက်ရုံနဲ့ သူ့ရဲ့ချောမောမှုကို တစ်ဆင့်မြှင့်တင်နိုင်လိမ့်မယ်လို့ လုံးဝမထင်ထားဘူး။

ကမ္ဘာပေါ်က အမျိုးသမီးတွေတင်မကပဲ တချို့ယောက်ျားတွေပါ ဝတ်စားပြင်ဆင်ချင်ကြတာ အံ့ဩစရာမရှိတော့ပါဘူး။ လက်စသတ်တော့ ဒါကြောင့်ကိုး..!

မှန်ထဲမှာ ရွှယ်ယို့ရှန်းက ခရမ်းရင့်ရင့်ဝတ်ရုံရှည်ကို ဝတ်ဆင်ထားတာကြောင့် ကလေးဆန်တဲ့ အသွင်အပြင်မျိုး လုံးဝမရှိတော့ဘူး။ အင်္ကျီလက်ဝကျယ်မှ ထူးခြားဆန်းကြယ်တဲ့ ရွှေရောင်အနားကွပ်တွေနဲ့ ဆန်းပြားတဲ့ အဆင်တန်ဆာတချို့က ဝတ်ဆင်ထားသူကို တင့်တယ်ကြော့ရှင်းတဲ့ ခံစားချက်မျိုး ပေးစွမ်းနေလေတယ်။ ခါးအထိရှည်တဲ့ မဟူရာဆံနွယ်တွေကို ခပ်မြင့်မြင့် စည်းနှောင်ထားပြီး လက်ရာမြောက်တဲ့ ခေါင်းစည်းသရဖူကို ဆင်မြန်းထားတာကြောင့် သူ့ရဲ့ပုံစံက ကလေးဆန်မနေတော့ဘဲ တည်ကြည့်မြင့်မြတ်တဲ့ မိစ္ဆာဘုရင်တစ်ပါးအသွင် ပြောင်းလဲသွားတယ်။

“အခမ်းအနား စတော့မယ်.. သွားကြရအောင်..!”

ရင်းဆုယဲ့က မျက်ဝန်းထဲက ငေးမောမှင်သက်နေမှုကို အမြန်ဖိနှိပ်လိုက်ပြီး ရွှယ်ယို့ရှန်းဆီကို ညာလက်ကမ်းလိုက်တယ်။ အကြင်သူရဲ့ လက်ဖဝါးလေးကို သူ့ရဲ့လက်ထဲ အပ်နှင်းပေးပါလို့ ရည်ညွှန်းနေသလို၊ စင်မြင့်ထက်ကို ခေါ်ဆောင်သွားခွင့်ပြုဖို့ တောင်းဆိုနေခဲ့တယ်။ ရင်းဆုယဲ့လည်း အဝတ်အစားလဲပြီးဖြစ်တယ်။ သူလည်း ရွှယ်ယို့ရှန်းလိုပဲ၊ ရွှေရောင်အနားကွပ် ပန်းကနုတ်တွေနဲ့ စီခြယ်ထားတဲ့ ခရမ်းရင့်ရင့်ဝတ်ရုံရှည်ကို ဝတ်ဆင်ထားတယ်။ ဒါပေမဲ့ ရွှယ်ယို့ရှန်းရဲ့ မိန်းမောမှင်သက်ဖွယ် အလှတရားနဲ့ယှဉ်ရင် ရင်းဆုယဲ့ရဲ့ပုံစံက အနည်းငယ်မှေးမှိန်နေသလို ထိန်းသိမ်းထားဟန်ပေါ်တယ်။ ရွှေရောင်ဆံနွယ်တွေကိုလည်း ပုံမှန်အတိုင်းသာ စည်းနှောင်ထားပြီး ရွှယ်ယို့ရှန်းနဲ့ဆင်တူ နဖူးစည်းအဆင်တန်ဆာ ဆင်မြန်းထားရုံမှအပ တခြားအဆင်တန်ဆာတွေ ဆင်မြန်းထားခြင်း မရှိပါဘူး။ ဆင်တူဝတ်ဆင်ထားတဲ့ အမျိုးသားနှစ်ယောက်က ‘နှစ်လွှာပေါင်းမှ တစ်ရွက်ဖြစ်တဲ့ စွယ်တော်ရွက်ပမာ’ တစ်သားတည်း လိုက်ဖက်ညီနေတော့တယ်။