Unicode
အခန်း - (၇၈)
ကျန်းချင်းယွင်က ရိုက်ကူးရေးရပ်ရန် ပြောလာချိန်တွင် ‘အင်တာဗျူးတော့ သွားပါပြီ’ဟူ၍ ကျောင်းဟုန် တွေးလိုက်မိသည်။
အနုပညာရှင်တစ်ယောက် နာမည်ကြီးလာသည်နှင့် ဆွေမျိုးသားချင်းများ စွပ်စွဲပြောဆိုတတ်သည်မှာ မထူးဆန်းတော့ပါချေ။ ဆွေမျိုးများ၏ အမြင်တွင် အနုပညာရှင်တစ်ယောက် နာမည်ကြီးလာခြင်းက ချမ်းသာကြွယ်ဝလာခြင်းနှင့် ထပ်တူကျနေသည်။ သို့ဖြစ်ရာ အနုပညာရှင်များ ချမ်းသာကြွယ်ဝလာလျှင် သူတို့၏ ဆွေမျိုးများကို အဘယ်ကြောင့် မကူညီနိုင်ရသနည်း။
ထို့ကြောင့် အနုပညာရှင်အများစုလည်း လူမြင်ကောင်းအောင် ထိုသို့သော ဆွေမျိုးများကို ပေးကမ်းရန်သာ တတ်နိုင်တော့သည်။ နဉ်ရှီကဲ့သို့ အပြစ်ပြောခံနေမည့်အစား တုံ့ပြန်ဖြေရှင်းတတ်သူက တကယ့်ကို ရှားပါးလွန်းပေသည်။
နဉ်ရှီက သတင်းထူးသတင်းဦးလေး မလိုချင်ဘူးလားဟု မေးလိုက်ချိန် ကျောင်းဟုန်၏ ပထမဆုံးတုံ့ပြန်မှုကား စိုးရိမ်မှုပင် ဖြစ်၏။ နဉ်ရှီပေးလာမည့် သတင်းက ပြဿာနာအကြီးကြီး ဖြစ်လာလိမ့်မည်ဟု ခံစားနေရလေသည်။ သို့သော် သတင်းလောကတွင် သတင်းကြောင့် ပွဲအကြီးကြီးဖြစ်တာက ပြဿနာမဟုတ်၊ ရေးစရာသတင်းမရှိမှာသာ ကြောက်ရသည်။ သို့နှင့် သူမလည်း ကင်မရာမန်းနှင့် အကြည့်ချင်းဖလှယ်ကာ နဉ်ရှီကို ခေါင်းညိတ်ပြလိုက်သည်။
“လက်ဆောင်ကြီးကြီးပေးတဲ့အတွက် ကျေးဇူးတင်ပါတယ်.. မစ်နဉ်..”
နဉ်ရှီ၏ မျက်နှာပေါ်တွင် အပြုံးလွင့်ပြယ်နေချေပြီ။ သူမက တစ်ခဏအသံတိတ်နေပြီးနောက် ပြောလာခဲ့သည်။
“ကျွန်မအမေရဲ့ သေဆုံးမှုက သတ်သေမှုမဟုတ်ဘူးလို့ သံသယရှိတယ်..”
ကျောင်းဟုန်ခမျာ လက်ထဲမှကော်ဖီခွက်ပင် ပြုတ်ကျလုမတတ် ဖြစ်သွားရသည်။ ယင်းကား သတင်းဦးသတင်းထူးကြီး မဟုတ်တော့၊ သတိကြီးကြီးထားသင့်သည့် အမှုကိစ္စဖြစ်နေသည်။ သူမ၏စိတ်ထဲ သတင်းတင်ရန်ပင် ကြောက်လာမိသည်အထိ။
“အဲ့တုန်းက ကျွန်မက အရမ်းငယ်သေးတယ်.. ရုတ်တရက်ပေါ်လာတဲ့ အဖေ့ရဲ့ သေတမ်းစာနဲ့ အမွေလွှဲပြောင်းစာကြောင့် အမေ အတော်ကြာအောင် ဒေါသထွက်နေခဲ့တာ.. ဘယ်တုန်းကမှ စိတ်ဓာတ်ကျနေတဲ့ အမူအရာမျိုး မရှိခဲ့ဖူးဘူး..” နဉ်ရှီက ကော်ဖီခွက်ကို ဖြည်းညင်းစွာ မွှေလိုက်သည်။ ဇွန်းနှင့် ကော်ဖီခွက်တိုက်မိသည့် အသံခပ်တိုးတိုးက ရင်ထိတ်ချောက်ချားဖွယ်။ “မစ်ကျောင်း အလုပ်အားရင် ကျွန်မနဲ့အတူ ရဲစခန်းလိုက်ခဲ့လို့ရပါတယ်..”
YOU ARE READING
နတ်ဘုရားမအဖြစ် ပြန်လည်ပေါ်ထွက်လာခြင်း
RomanceThis is not my own.. Totally Credited to original author.. .......... Title - Return of the Goddess Chapters - 106 Completed .........