Unicode
အခန်း - (၈၂/၁)
ရဲစခန်းသို့ ဖုန်းခေါ်ပြီးချိန်တွင် နဉ်ရှီက အခြေအနေကို အတိုချုပ် ရှင်းပြလိုက်သည်။ သို့သော် အချက်အလက်အများကြီး မပြောပြဘဲ လုပ်ဖော်ကိုင်ဖက်တစ်ဦးက သူမဆီကို ရုတ်တရက် ဖုန်းခေါ်လာပြီး သူ့ကို တစ်စုံတစ်ယောက်က သတ်ချင်နေသည်ဟု ပြောလာကြောင်း ရိုးရိုးရှင်းရှင်း ပြောပြကာ ဖုန်းချလိုက်သည်။
တစ်ဖက်မှာလည်း ဖုန်းကိုင်သည့် ရဲဝန်ထမ်းသည် ထိုဖုန်းကောလ်ကို Prank call (နောက်ပြောင်ပြီး ဖုန်းခေါ်ခြင်း) ဟု ထင်ခဲ့သော်လည်း ထုံးစံအတိုင်း ဖုန်းခေါ်သူ၏ အချက်အလက်နှင့် နေရပ်လိပ်စာကို တည်ကြည်လေးနက်စွာ မေးခဲ့သည်။
ဖုန်းခေါ်သူက သူမကိုယ်သူမ ‘နဉ်ရှီ’ဟု ပြောလာပြီး အကူအညီတောင်းသူက ‘ကျူးမိုလီ’ ဖြစ်နိုင်သည်ဟု ကြားလိုက်ရသောအခါ ရဲဝန်ထမ်းလည်း ‘နာမည်လေး နောက်တစ်ခေါက်လောက် ပြန်ပြောပေးလို့ရမလား..?’ ဟူ၍ ပြန်မမေးဘဲ မနေနိုင်ခဲ့ပေ။
ဖုန်းခေါ်ဆိုသူက တိကျသေချာစွာ ပြန်ပြောလာချိန်မှာတော့ ရဲဝန်ထမ်းသည် နဉ်ရှီ တိုင်ကြားလာသော ဖုန်းနံပါတ်၏ အချက်အလက်များကို လျင်မြန်စွာ ရှာဖွေကြည့်လိုက်၏။ ဖုန်းနံပါတ်ကို မှတ်ပုံတင်ထားသူက ကျူးရှာ ဖြစ်နေသည်။ သို့သော် အနုပညာရှင်များက နာမည်အတု အသုံးပြုလေ့ရှိကြောင်း သတိရလိုက်သဖြင့် အချိန်မဆွဲရဲတော့ဘဲ ထိုအမှုကို ကျူးမိုလီနေသည့် ရပ်ကွက်၏ နယ်မြေရဲစခန်းသို့ ချက်ချင်း လွှဲပြောင်းပေးလိုက်တော့သည်။
“အချိန်နဲ့တပြေးညီ သတင်းပို့ပေးတဲ့အတွက် ကျေးဇူးတင်ပါတယ်.. ကျေးဇူးပြုပြီး ဆက်သွယ်လို့ရအောင် လုပ်ထားပေးပါ.. တစ်ခုခုသိရတာနဲ့ ချက်ချင်း ပြန်ဆက်သွယ်ပေးပါ့မယ်..” ဖုန်းချပြီးနောက် ရဲဝန်ထမ်းမှာ သူမ၏ မျက်နှာကို လက်ဖြင့် မကာမိဘဲ မနေနိုင်ခဲ့ပေ။ နဉ်ရှီ၏ ဖုန်းကို တကယ်ကြီး လက်ခံရရှိခဲ့ကြောင်း သူမ ပြောပြလျှင် မည်သူ ယုံကြည်နိုင်မည်နည်း။
နဉ်ရှီသည် ဖုန်းခေါ်ပြီးနောက် ထိုကိစ္စနှင့်ပတ်သက်၍ စိတ်ထဲမထားတော့ပေ။ အကယ်၍ ကျူးမိုလီ တကယ်အန္တရာယ်ရှိနေလျှင် သူမ ရဲတိုင်ပေးလိုက်ပြီးဖြစ်၍ အကူအညီပေးလိုက်သည်ဟု ဆိုနိုင်သည်။ အကယ်၍ သူမကို ထောင်ချောက်ဆင်ချင်နေလျှင် ရဲများ ထိုနေရာသို့ သွားနေပြီဖြစ်၍ ပြဿနာတစ်ခု ကျိန်းသေပေါက် ဖြစ်သွားလိမ့်မည်။
YOU ARE READING
နတ်ဘုရားမအဖြစ် ပြန်လည်ပေါ်ထွက်လာခြင်း
RomanceThis is not my own.. Totally Credited to original author.. .......... Title - Return of the Goddess Chapters - 106 Completed .........