Cāi Cāi || ချိုက်ချိုက် || [ မြန်မာဘာသာပြန်] (Completed)

Chapter (31)

Chapter (31)

Act 5 : Avenue Q (3)

ယောင်ရင်၏ညဝတ်အင်္ကျီများမှာ အဆင်ပြေပြေမရှိဘဲ ဘောင်းဘီနှင့်အင်္ကျီအနားစများကို  အကြိမ်ပေါင်းများစွာ ခေါက်တင်ထားသည်။  ထို့နောက် သူ့လက်ကိုမြှောက်လိုက်၍ ခါးကို ပျင်းရိစွာဆန့်ထုတ်လိုက်ပြီး လှပသောညှပ်ရိုးများကို ပေါ်လွင်နေစေသည်။

ထန်ယီမင်၏အကြည့်များသည် သူ့အသားအရည်ပေါ်တွင် ခဏတာမျှကျရောက်သွားသော်လည်း လျင်မြန်စွာပင် ပြန်လည်ကွယ်ပျောက်သွားသည်။

" ခင်ဗျားရဲ့ ညဝတ်အင်္ကျီတွေက..."

"ဘာဖြစ်လို့လဲ?" ယောင်ရင်သည် သူဝတ်ဆင်ထားရသော ခေတ်မီသလိုလိုအကွက်အကွင်းများပါသည့် ညဝတ်အိပ်အဝတ်အစားများကို  ငုံ့ကြည့်လိုက်သည်။ " အဲ့ဒါတွေကို ဂျော့ခ်ပဲ သူ့ဗီရိုထဲကထုတ်ပေးလိုက်တာ. . . ပြောတာတော့ လျှော်ပြီးသားတွေတဲ့ "

ထိုသို့ပြောပြီးနောက် သူ့မျက်လုံးများ လက်ခနဲဖြစ်သွားပြီး အင်္ကျီကော်လံကို လက်ညိုးဖြင့်ဂရုတစိုက်ညှပ်လိုက်​ကာ နှာခေါင်းနားသို့ကပ်လိုက်ပြီး တွန့်ဆုတ်တွန့်ဆုတ်ဖြင့် အနံ့ခံနေပြန်သည်။ ထို့နောက် ယောင်ရင်က သက်ပြင်းချရင်း “မွှေးတော့မွှေးတယ်၊ ဆပ်ပြာနံ့ သင်းသင်းလေးလိုပဲ”

"ဟုတ်တယ် လျှော်ပြီးသားတွေ"  ထန်ယီမင်က ဆက်ပြော၏။  " ဟိုရက်ကပဲ အဆောင်ကို ရှောင်လွေ့လာလည်သေးတယ်လေ၊ အဲ့တော့ အထင်ကြီးစရာကောင်းအောင်လုပ်ဖို့ဆိုပြီး ဂျော့ခ်တစ်ယောက်တည်း အဆောင်အတွင်းပိုင်းကို အကြိမ်တော်တော်များများ သန့်ရှင်းရေးလုပ်ပြီး အမှိုက်ရှစ်အိတ်တောင် ထွက်လာတယ်။ သူ့အ၀တ်တွေအားလုံးလည်း လျှော်ပြီးသားနေမယ် "

"ဒါမျိုးပဲ ဖြစ်သင့်တယ်" ယောင်ရင်က ပခုံးတွန့်ပြလိုက်သည်။ "ဂိမ်းဆော့ဖို့ဆို ဂျင်းဘောင်းဘီကြီးနဲ့ ကြမ်းပြင်ပေါ်မှာထိုင်နေရတာ တစ်ကယ်အဆင်မပြေလို့ သူ့ညဝတ်အင်္ကျီတွေနဲ့ လဲဝတ်ထားရတာ"

ယမန်နေ့ညက Nintendo သည် အသစ်တစ်ခုဖြစ်သော Legend of Zelda ကို မိတ်ဆက်ပေးခဲ့၏။ ယောင်ရင်သည် ဂိမ်းထဲမှပစ္စည်းတစ်ခုကို တန်းဖိုးသုံးဆအမြင့်ဖြင့် အမြန်လုယူခဲ့ရပြီး ဂျော့ခ်နှင့်အတူ ဂိမ်းဆော့ရန် ဤနေရာသို့ အပြေးအလွှားရောက်လာခဲ့သည်။ သို့သော် အချိန်နောက်ကျနေပြီဖြစ်သောကြောင့် အိမ်မပြန်နေတော့ဘဲညဘက်အထိ ဂျော့ခ်နှင့်ကောင်းကောင်းဆက်ကစားရန် ရွေးချယ်လိုက်သည်။