Cāi Cāi || ချိုက်ချိုက် || [ မြန်မာဘာသာပြန်] (Completed)

Chapter (80)

Chapter (80)
Act 10: Singing In the Rain (5)
ကျွန်တော်နဲ့ထန်ယီမင်က အခန်းဖော်တွေမဟုတ်ဘူး၊ ကျွန်တော်တို့က အတူနေဆက်ဆံရေး

ရှန်းချိုက်က သူ့အား 'ဆရာထန်' ဟုခေါ်လိုက်ချိန်တွင် ထန်ယီမင်၏နှလုံးသားမှာ ချက်ချင်းဆိုသလို  တုန်လှုပ်သွားတော့သည်။ ခေါင်းတစ်ခုလုံးကို နှင်းစက်များပါဝင်သော လေအေးအေးများက လွှမ်းခြုံထားသော်လည်း ထန်ယီမင်၏ကျောဘက်တွင်တော့ အေးစိမ့်စိမ့်ချွေးတစ်လွှာ ဖြစ်လာခဲ့သည်။

ထန်ယီမင် ရှင်းပြချင်လိုက်သော်လည်း တကယ်တမ်းသူ့တွင် ရှင်းပြစရာနေရာမရှိသည်ကို တွေ့လိုက်ရသည်။

ယောင်ရင်က သူ့ကို လိုက်ခဲ့သော်လည်း သူကတော့ငြင်းခဲ့သည်။ လွန်ခဲ့သည့်ငါးနှစ်ကတည်းက သူတို့အချင်းချင်း အဆက်အသွယ်မရှိကြပေ။ သူတို့နှစ်ဦးမှာ ရိုးရိုးသားသားဖြစ်သော်လည်း ရှန်းချိုက်၏ ငြိမ်သက်လွန်းသောမျက်ဝန်းများကို တွေ့လိုက်သောထန်ယီမင်ကတော့ ထိုအချင်းအရာအတွက် နားမလည်နိုင်လောက်အောင် အထိတ်တလန့်ခံစားလိုက်ရသည်။

သို့သော် ယောင်ရင်ကတော့ သူ၏ကံဆိုးမိုးမှောင်ကျမှုကြီးကို ကိစ္စကြီးကြီးမားမားမဟုတ်ဟုမြင်သောကြောင့် “မင်းတို့နှစ်ယောက်က တကယ်ပဲ အခန်းဖော်တွေလား” ဟု မေးလာသည်။

ရှန်းချိုက်သည် ထန်ယီမင်ဆီမှအကြည့်လွှဲလိုက်ကာ အဝေးကိုလှမ်းကြည့်လိုက်ရင်း ထန်ယီမင်လမ်းလျှောက်လာသည့်နေရာမှ ကျန်ရစ်ခဲ့သော နှင်းခြေရာကွက်လပ်များကိုသာ စိုက်ကြည့်နေခဲ့သည်။ တဖွဲဖွဲကျဆင်းနေသော ဆီးနှင်းပမာဏသည် ပိုမိုပြင်းထန်လာပြီး မြေပြင်ပေါ်တွင် ဆီးနှင်းအလွှာများ ဖြစ်လာစေကာ ထိုသူလျှောက်လာသောလမ်းတစ်လျှောက် နှင်းခြေရာများ ကျန်နေခြင်းသာ။

ရှန်းချိုက်သည် ထိုရှုပ်ထွေးနေသောခြေရာများကိုသာ စိုက်ကြည့်နေခဲ့ပြီး တခြားနေရာသို့ကြည့်ရန် ငြင်းဆန်နေခဲ့သည်။

“ကျွန်တော်က ဆရာထန်ရဲ့အိမ်ကို ငှားထားတာပါ၊ အဲ့ဒါကြောင့် သူက ကျွန်တော့်အခန်းဖော်ဆိုတာထက် ကျွန်တော့်ရဲ့အိမ်ရှင်ပေါ့” ထို့နောက်ခဏရပ်လိုက်ပြီး ထန်ယီမင်ကိုမေးလိုက်၏။ "ဟုတ်တယ်မှတ်လား ဆရာထန်"