Cāi Cāi || ချိုက်ချိုက် || [ မြန်မာဘာသာပြန်] (Completed)

Chapter (47)

Chapter (47)

Act 6: The Little Prince (9)
လာမယ့်သောကြာနေ့မှာ ကိုယ့်နှုတ်ဆက်ပွဲအတွက် သီချင်းပွဲတော်ရှိတယ်. . . ကိုယ့်ဧည့်သည်အနေနဲ့ မင်းလာလို့ရမလား??

လူပျိုဖော်၊ အပျိုဖော်ဝင်စအရွယ်တွင် နွေဦးအချစ်ဟုခေါ်သော အလွန်ရှင်းလင်းသည့်အမည်တစ်ခုရှိလေသည်။

ရုပ်ပိုင်းဆိုင်ရာဖွံ့ဖြိုးမှုများနှင့်အတူ ယောက်ျားလေးများနှင့်မိန်းကလေးများ၏ နွေဦးခံစားချက်လေးများ ပွင့်လန်းလာကြပြီး ဤနွေဦးရာသီလေးသည် ချိန်းတွေ့ကြရန် အသင့်တော်ဆုံးရာသီဖြစ်၏။

ဟွားဝူအကအကယ်ဒမီသည် ခြောက်နှစ်ကြာသည့် ပရော်ဖက်ရှင်နယ်အနုပညာကျောင်းတစ်ခုဖြစ်သည်။ ရှန်းချိုက်သည် ပုံမှန်အထက်တန်းကျောင်း၏ ဒုတိယနှစ်နှင့်ညီမျှသည့် ပဉ္စမနှစ်တွင်သင်ယူနေခြင်းဖြစ်ကာ နောက်ခြောက်လလောက်တွင် သူတို့အားလုံးသည် ပြင်းထန်သောအနုပညာစာမေးပွဲကြီးကို  ရင်ဆိုင်ရမည်ဖြစ်သည်။ အနုပညာစာမေးပွဲ  ဝင်ခွင့်အကြောင်းကြားစာကို လက်ခံရရှိပြီးနောက် ယဉ်ကျေးမှုအတန်းများအတွက် အကြိုစမ်းသပ်မှုအတန်းများသို့ ပြောင်းရွှေ့ရလေသည်။ ထို့ကြောင့် အတန်းဖော်များအားလုံး အတူတကွပြန်တွေ့ရန်မှာ အလွန်ခက်ခဲနေ၏။

ရလဒ်အနေဖြင့် လူတိုင်း၏စိတ်ထဲ၌ ပဉ္စမနှစ်၏နောက်ဆုံးလအနည်းငယ်သည် ဘွဲ့ရာသီတစ်ခုကဲ့သို့ ကုန်ဆုံးနေလေသည်။ ဘဝကြီးက အမြဲအလျင်စလိုဖြစ်နေတတ်သဖြင့် သူတို့ပြန်ဆုံတွေ့ရမည့်အချိန်မှာ လာမည့် ၁၀ နှစ် ဒါမှမဟုတ် နှစ်၂၀ လောက်အကြာ အတန်းပြန်လည်ဆုံဆည်းပွဲ၌ ဖြစ်နိုင်၏။

ဤအခြေအနေများကြောင့် အတန်းတစ်ခုလုံး၏စိတ်သည် အပြောင်းအလဲများဖြစ်နေခဲ့ပြီး ငယ်ရွယ်သောအချစ်လေးများသည် အတန်းဖော်များတစ်လျှောက် ပျံ့နှံ့စပြုလာတော့သည်။ မပွင့်လန်းသေးသော ချစ်ခြင်းမေတ္တာအဖူးအပွင့်လေးများသည်ပင် တိတ်တဆိတ် ပွင့်လန်းလာခဲ့၏။

ချန်ဇီရန်၌ မျက်လုံးနှင့်နား အများအပြားရှိပြီး ရှန်းချိုက်ကိုသတင်းကြေညာနေတော့သည်။