"ဒါဆို တကယ်ပေါ့...."
ကော်ဖီခွက်ချပေးရင်း ထပ်လို့အတည်ပြုပါတဲ့ သက်လျာကို ကိုကိုက ခေါင်းပဲငြိမ့်ပြပြီး အသံမထွက်လာတော့ သက်လျာကပဲ မေးခွန်းဆက်မေးရသည်။
"သူ့နာမည်ကဘယ်သူ၊ ပြီးတော့ အလုပ်အကိုင်၊ ဒါမှမဟုတ် သူကျောင်းတတ်နေတုန်းပဲလား။"
"နာမည်က Smith Amdarosa။ အလုပ်အကိုင်ကတော့ အားတဲ့အချိန် ဘောလုံးကန်တာပဲ။ မအားတဲ့အချိန်ဆိုတာက ကိုကို့အနားမှာ နေတဲ့အချိန်ကို ပြောတာ။"
"ဝိုးးးး...."
ကိုကို့မျက်နှာက တကယ်ကို မြူးကြွနေတာကြောင့် နားထောင်နေရတဲ့ သက်လျာပါ ပျော်ရွှင်လာရသည်အထိပင်။
"ဒါနဲ့ ဟိုကောင်လေးကို ကြည့်ရတာ တစ်မျိုးပဲ။"
"ကိုကိုနဲ့ ကျွန်တော့်လိုမျိုး တူညီတဲ့ခံစားချက်ကို ပြောချင်တာလား...ဟွန်း..."
ကိုကိုပြောတဲ့ ဟိုကောင်လေးဆိုတာ သော့်ကိုရည်ညွှန်းပြောသည်မှန်း သက်လျာသိပြီး တစ်မျိုးပဲဆိုသည့် အဓိပ္ပါယ်ကိုလည်း သက်လျာ သဘောပေါက်သည်။ ထိုကြောင့်အဆုံးသတ်မှာ လှောင်ထေ့ထေ့လေး ရယ်လိုက်မိတာ။
"မင်းရော..အခြေအနေ"
"ကျွန်တော့်ဘက်ကတော့ ပြောပြီးသွားပြီး၊ သိတဲ့အတိုင်း ကြည်သာချစ်နေတာက ကျွန်တော်တော့ ဟုတ်မနေဘူး။ သူဘယ်သူ့ကို ချစ်လဲ၊ ဒါမှမဟုတ် သူတကယ်ပဲ မချစ်တတ်သေးတာလား ဆိုတာကို ကျွန်တော်တော့ ဝေခွဲမရဘူး...အဲ့တာကြောင့် ကိုကို့ကို အကူညီတောင်းမလားလို့"
"သေချာတာကတော့ ကြည်သာ ချစ်နေတာက လာဗင်ဒါကိုသဘောကျတဲ့ သူပဲ။"
"ဟင် !!!"
ကိုကို့အပြောက ထူးဆန်းသည်၊ ပိုင်နိုင်လွန်းအားကြီးသည်။ ကြည်သာချစ်နေတာက လာဗင်ဒါကိုသဘောကျတဲဲ့သူမှန်း ကိုကိုဘယ်လိုသိလဲလေ။
အခုမှ ပြန်တွေ့ရတာ နာရီပိုင်းပဲရှိသေးတဲ့ ကိုကိုက အနီးကပ်နေခဲ့တဲ့ သက်လျာထက်ပိုပြီးတော့ ကြည်သာ့အကြောင်းကို သိနေသည်ဆိုတာကတော့ သက်လျာလက်မခံနိုင်။ ငယ်ငယ်ထဲက အတူရှိခဲ့သူမို့ ကြည်သာ့အကြောင်း သူသာ အသိဆုံးဖြစ်ရမည်။
