ဒီစေ့‌စပ်ကြောင်းလမ်းမှုကို ဖျက်သိမ်းပေးဖို့တောင်းဆိုတယ် (mm trans)

Chapter-12( အမှတ်တရလက်ဆောင်လဲလှယ်ခြင်း/အမွတ္တရလက္ေဆာင္လဲလွယ္ျခင္း)

#unicode

ရှီယန်ချင်းက လော့အိမ်တံခါးရှေ့သို့ ရောက်လုနီးပြီဖြစ်တာကြောင့် လော့ဖေးသည် အိမ်ထဲမှာထိုင်ကာ သူ့မျက်နှာထားအားပြုပြင်နေရင်း သူ့ကိုယ်သူ တိုးတိုးလေး ကြွေးကြော်လိုက်လေသည်။
"ငါက ဒီနေ့ ရှီယန်ချင်းရဲ့ သတို့သမီးလောင်းပဲ။"

ဤအချိန်တွင်တော့ လော့မိသားစု၏ခြံဝန်းရှေ့တွင် ပွဲကြည့်သူအမြောက်အများရပ်နေကြလေပြီဖြစ်သည်။ တစ်ချို့သောလူများဆို သူတို့လက်ထဲတွင် လယ်ယာသုံးပစ္စည်းများကိုင်ထားလျက်ပင်။ ကြည့်ရသည်မှာ သူတို့သည် ပျော်စရာလေးတွေကို အရင်ဝင်ပါပြီးမှ လယ်သွားလုပ်ကြမည့်ပုံပင်ဖြစ်သည်။

ရှီယန်ချင်းက ယနေ့တွင် လက်ထပ်မည်မဟုတ်တာကြောင့် လော့မိသားစုသည် 'ရှီ' သို့မဟုတ် ပျော်ရွှင်မှုဟူသော စကားလုံးကို ဖော်ပြထားခြင်းမရှိသေးပေ။ သို့သော်လည်း လော့အိမ်၏ အဝင်ဝတွင်တော့ ထုံးတမ်းအစဉ်အလာများအရ ဗျောက်အိုးကြိုးအရှည်ကြီးကို ချိတ်ဆွဲထားလေသည်။ စည်းကားနေသည့် လူထုကို ဧည့်ခံဖို့အတွက်လည်း ခြံဝန်းငယ်ထဲတွင် မြေပဲနှင့် အစေ့အဆံ နှစ်ပန်းကန်ရှိနေသေးသည်။ ထို့ကြောင့် အရင်ကလော့မိသားစုနှင့် ရင်းနှီးဖူးသော လူများ သို့မဟုတ် စိတ်ဝင်စားဖွယ်တို့ကြောင့် ဆွဲဆောင်ခံလိုက်ရသောလူများသည် မင်္ဂလာရှိသော စကားများဖြင့် လာကြလေတော့သည်။

လော့ရိသည် ရှီယန်ချင်းလာနေသည်ကို မြင်လိုက်ရပြီးနောက် ရုတ်တရတ် ထရပ်လိုက်ပြီး အိမ်ထဲသို့ လှမ်းအော်ပြောလိုက်လေသည်။
"အာ့ကောရေ! ရှီကောလာနေပြီဗျို့!"

လော့ကျီသည် အိမ်ဘေးတွင် ဗျောက်အိုးများကို မီးညှိလိုက်လေသည်။ အိမ်တံခါးတွင် လေထဲ၌ကျယ်လောင်သောပေါက်ကွဲသံများထွက်လာတော့သည်။ ဒီကဗျောက်အိုးများသည် ရှီယန်ချင်းမှာရှိသည့်ဟာထက် ပိုကျယ်ပြီး ပိုရှည်လေသည်။ ဤသည်မှာလည်း ဒေသဆိုင်ရာအလေ့အထတစ်မျိုးဖြစ်သည်။ လက်ဖွဲ့ကိုလက်ခံမည့်အိမ်မှဗျောက်အိုးများသည် လက်ထပ်ခွင့်တောင်းသူ၏ဟာထက် နှစ်ဆပိုရှည်ရမည်ဖြစ်သည်။ အဓိပ္ပာယ်မှာတော့ တစ်စုံတစ်ခုလာခဲ့ပြီး ထွက်သွားပြီဟုဆိုလိုတာဖြစ်သည်။