စစ်ဘက်ဆိုင်ရာတိုင်ပင်ခံ မျိုးဆက်များ

Chapter 9.1

အခန်း ၉ ကောက်ကျစ်သော သူပုန်များ (အပိုင်း ၁)

အနောက်မြောက်မှ နယ်စပ်မြို့နှင့် မြို့တော်ကြား အကွာအဝေးက အမှန်တကယ်ပင် ဝေးကွာလှသည်။ စစ်တပ်က အလျန်အမြန်ချီတက်နေကြသော်လည်း အချိန်ဆယ့်တစ်ရက်ခန့်ကြာခဲ့သည်။ ကုယွင်က စုရန်၊ ဟန်ရှုနှင့် အခြားသူများကဲ့သို့ မြင်းစီးပြီး ဆယ်ရက်ကျော်ကြာအောင် ခရီးနှင်ခဲ့ကာ ညဘက်တွင်လည်း ပေါ့ပေါ့ပါးပါး တည်ဆောက်ထားသော ယာယီတဲငယ်လေးထဲတွင် အိပ်စက်အနားယူပြီး ရိက္ခာခြောက်ကိုသာ စားခဲ့သည်။ အစမှ အဆုံးတိုင် သူမက တကြိမ်မှ မညည်းညူသည့်မပြင် အရင်ကထက်ပင် ပိုပြီး တက်ကြွနေပုံရသည်။

လွန်ခဲ့သည့် ဆယ်ရက်အတွင်း သူမ၏ စွမ်းဆောင်မှုက စစ်တပ်ရှိ စစ်သည်အားလုံး၏ လေးစားမှုကို ရရှိခဲ့ရုံသာမက လို့မူဟိုင်၏အသိအမှတ်ပြုမှုကိုလည်း ရရှိခဲ့သည်။ ချင်းမိသားစုက ဟောင်ယွဲ့တွင် ချမ်းသာသောမိသားစုတစ်ခုဟု သတ်မှတ်ခံရသော်လည်း သူတို့မိသားစုမှ သမီးများ၏ ကြီးပြင်းလာမှုက နူးညံ့သိမ်မွေ့ခြင်းမရှိသလို အလွန်အကျွံ အလိုလိုက် ပြုစုခံထားရပုံလည်း မပေါ်ပေ။ စုလင်းက သူမကို ချစ်မိသွားသည်မှာ အံ့သြစရာ မဟုတ်တော့ပေ။

အနောက်မြောက်ဘက်သို့ ဝင်ရောက်လာချိန်မှစ၍ တောင်များနှင့် လယ်ကွင်းများက ချုံပုတ်များ၊ ချောက်များနှင့်ပြည့်နှက်နေပြီး နေရာတိုင်းတွင် ချောင်းများနှင့် မြစ်များကို မြင်တွေ့နိုင်သည်။ လေထု၏ စိုထိုင်းဆက သိသိသာသာ မြင့်မားလာပြီး အထူးသဖြင့် ယခု နွေရာသီရောက်နေပြီဖြစ်သည့်အတွက် ပူပြင်းသောလေကို သည်းမခံနိုင်တော့ပေ။

အဓိကလမ်းမကြီး၏ တစ်ဖက်တစ်ချက်စီတွင် ချုံပုတ်များ ထူထပ်နေပြီး တစ်ချက်မှ ကြည့်လိုက်လျှင် အစွန်းကိုတောင် မမြင်ရပေ။ အနောက်ဘက်တွင် နေက တဖြည်းဖြည်း ဝင်လာပြီး နာရီဝက်မပြည့်မီတွင် လုံးဝမှောင်သွားပေလိမ့်မည်။

ဟန်ရှုက မြေမျက်နှာသွင်ပြင်မြေပုံကို ပိတ်လိုက်ပြီး စုရန်ကို လှမ်းပြောလိုက်သည်။ "နောက်ထပ်မိုင်ခြောက်ဆယ်ဆိုရင် ပေ့ချန်ပဲ"