စစ်ဘက်ဆိုင်ရာတိုင်ပင်ခံ မျိုးဆက်များ

Chapter 15.11/15.12

အခန်း ၁၅ သူပုန်ခေါင်းဆောင် (အပိုင်း ၁၁)

ကုယွင်က ခေါင်းယမ်းပြီး အေးအေးဆေးဆေး တိုတိုတုတ်တုတ် အစီအစဥ်တစ်ခု ပြောပြလိုက်သည်။ "နောက်ဆုတ်စရာတော့ မလိုပါဘူး။ ကျွန်မ အခု စုလင်းကို သေသေချာချာ ရှင်းပြဖို့ အဲ့နေရာကို သွားလိုက်မယ်။ ဒီမှာ ရှိနေတဲ့ မင်းရဲ့လောင်စာတွေထဲက တော်တော်များများကို စုလင်းရှိတဲ့ နေရာကို ပို့ဖို့ မင်းရဲ့လက်ရွေးစင် စစ်သည်ငါးထောင်ထဲက တစ်ထောင်ထည့်ပေးလိုက်၊ ကျွမတို့ စုလင်းရှိတဲ့ အရှေ့ဘက်ကုန်းမြင့်ကို သွားနေချိန်မှာ တခြားလူတွေက လောင်စာတွေ ဆက်ဖြန်းရမယ်၊ ဒါပေမယ့် မြေကြီးပေါ်ကို မဖြန်းနဲ့တော့။ သစ်ပင်ပေါ်ကို တက်ပြီး ထိပ်ဖျားနေရာတွေကိုပဲ ဖြန့်လိုက်၊ သစ်ပင်ထိပ်တွေကို မီးရှို့ပြီးတာနဲ့ သုံးလီအကွာအထိ ချက်ခြင်း ပြန်ဆုတ်ရမယ်၊ စစ်သည်တွေ ပုန်းအောင်းဖို့ အကြီးဆုံး အတောင့်ဆုံးသစ်ပင်တွေ ရှာပြီး အပေါ်ကို တက်နေလိုက်ကြ၊ ‌ရေစီးကြောင်းကို စောင့်ဆိုင်းပြီးမှ ဒုတိယအကြိမ် ပြန်တိုက်ခိုက်ဖို့ ဆင်းလာရမယ်!"

"ဟုတ်ကဲ့!" လက်ထောက်ယုက စစ်သည်များ ချက်ချင်း တပ်ဖြန့်စေလွှတ်လိုက်သည်။ ကုယွင်က လမ်ရှောင်းကို လောင်စာဆီ သယ်ဆောင်ရန် တာဝန်လွှဲပေးလိုက်ပြီး စုလင်းရှိရာသို့ ပြေးသွားလိုက်သည်။

စစ်သည်ငယ်တစ်ဦးက ကုန်းမြင့်ပေါ်တွင်ရပ်နေပြီး စူးရှသောမျက်လုံးများဖြင့် အနီးပတ်ဝန်းကျင်မှ လှုပ်ရှားမှုများကို စူးစမ်း စောင့်ကြည့်နေသည်။ ထိုအချိန်တွင် အဝေးမှ နေပြီး သူတို့ရှိရာဘက်ဆီသို့ ဦးတည်လာနေသော လူတစ်စုကို မြင်လိုက်ရသောကြောင့် ချက်ခြင်း သတိဖြင့် ဂရုတစိုက် ထပ်ကြည့်လိုက်သည်။ သေသေချာချာ ကြည့်ရှုပြီးနောက် သူက စုလင်းရှိရာဘက်သို့ ပြေးသွားလိုက်ပြီး "စစ်သေနာပတိချုပ်ကို သတင်းပို့ပါတယ်၊ ရှေ့ပြေးတပ်သား တစ်ထောင်ကျော်က ဒီနေရာကို ရွေ့လျားလာပါတယ်"

စုလင်းက သူ့လက်ထဲက မြေပုံကြမ်းကို ပြန်ချလိုက်ပြီး ခေါင်းကို မော့လိုက်သည်။ သူက မျက်ခုံးများကို တင်းတင်းကျပ်ကျပ် စုကျုံလိုက်ပြီး သူ့အသံက ကြောက်ခမန်းလိလိ တင်းမာနေကာ "ခေါင်းဆောင်က ဘယ်သူလဲ"