Flying Gulls Never Land [ဘာသာပြန်]

28- DO ME A FAVOR

SCROLL DOWN FOR ZAWGYI

UNICODE

CH28 - DO ME A FAVOR

ဖြစ်စဥ်ဖြစ်ပွားရာနေရာတစ်ခုလုံးကား ဟစ်အော်သံ ၊ ငိုကြွေးသံတို့ဖြင့် ပဲ့တင်ခတ်ကာ ပရမ်းပတာအခြေအနေမျိုးပင် ။ ထို့ပြင် လုံ့လဝီရိယရှိလှသော သတင်းသမားတို့၏  ဓာတ်ပုံရိုက်သံတဖျတ်ဖျတ်ကလည်း မရပ်မနားအဆက်မပြတ်ထွက်ပေါ်လာလျက် ။

"မင်း..မင်းတို့ အဆင်ပြေရဲ့လား ? "

မလှမ်းမကမ်းတစ်နေရာမှနေ၍ မော့ချိုးကလှမ်းပြောလိုက်ခြင်း ။ အလျင်စလိုပြေးလာရသောမော့ချိုးမှာ အသားအရောင်ဖြူဖတ်ဖြူရောင်ဖြစ်နေရုံသာမက မျက်ဝန်းအစုံတို့မှာလည်း ကြောက်ရွံ့မှုများနှင့် ပြည့်နှက်နေလျက် ။

"ကျွန်တော်တို့အဆင်ပြေပါတယ်...အာ့"

အမြန်ခြေကုန်သုတ်ပြေးလာရခြင်းကြောင့်ပေလား သို့မဟုတ် ဖြစ်ပျက်ခဲ့သည့်အရာများကပင် သူ့ကိုမနှစ်မြို့ဖြစ်စေခြင်းကြောင့်လားတော့မသိ ။ ရိတကျွမ့်မှာ စကားပြောနေရင်းပင် အော့အန်ချင်သလိုဖြစ်လာတော့သည် ။ သို့သည့်တိုင် ရိတကျွမ့်က မော့ချိုးအား လက်ဝှေ့ယမ်းပြကာ သူအဆင်ပြေကြောင်း ၊ ဤသည်မှာကိစ္စကြီးမဟုတ်ကြောင်း အချက်ပြနေသေးသည် ။

"ဘာတွေ ဖြစ်ကုန်ကြတာလဲ ? "

တစတစပြန်လည်စုဝေးလာပြီဖြစ်သော လှေကားထစ်များပေါ်ရှိ လူအုပ်ကြီးကို အားစိုက်ကြည့်ရင်း မော့ချိုးက မေးလာတော့သည် ။

လုဖုန်းအနေနှင့်လည်း ယခုလေးတင် ဖြစ်ပျက်ခဲ့သည့်အရာများကို နားလည်သဘောပေါက်လိုလှသည် ။

လုဖုန်း သူ့နောက်ကျောဘက်ရှိ မြင်ကွင်းကိုကြည့်ရန် ကိုယ်ကိုလှည့်လိုက်သည် ။ အချိန်ခဏတာမျှသာရှိသေးသည် ။ ရှန့်မင်အော်ကား ယခင် လုဖုန်းတွေ့မြင်ခဲ့သောနေရာမှ ပျောက်ကွယ်သွားခဲ့လေပြီ ။ လုဖုန်းမတ်တပ်ရပ်ကာ ဟိုဟိုသည်သည်ရှာနေမိ၏ ။ နောက်ဆုံး အတော်အတန်ဝေးကွာလှသောထောင့်တစ်နေရာတွင် တိုးဝင်ပျောက်ကွယ်သွားတော့မည့် ရှန့်မင်အော်၏နောက်ကျောဘက်ကို မြင်လိုက်ရသည့်အချိန်အထိ ။