“ကိုကို့ရဲ့ ကလေးတွေအတွက် ဂုဏ်ပြုလက်ဆောင် ရော့ ဖွင့်ကြည့်ကြ ”
ဆောင်းည ပေးလိုက်သည့် လက်ဆောင်ထုတ်လေးတွေကို အသီးသီး အလုအယက်ဖောက်ကြည့်နေသည့် ကလေးသုံးယောက်က မနေ့ကမှ ဆယ်တန်းအောင်စာရင်းထွက်ထားကြသည့် တက္ကသိုလ်ကျောင်းသားကျောင်းသူလောင်းတွေ။ သို့ပေမယ့် ဆောင်းညနဲ့ဆို အမြဲတမ်း ကလေးသူငယ်တွေသာဖြစ်နေဆဲ ။ မေမေတို့ပေးတဲ့မုန့်ဖိုးတွေကဆောင်းညအတွက် ပိုလျှံနေတာမို့ ဒီလက်ဆောင်ဝယ်ဖို့ သူအထူးအလည် မစီစဥ်ခဲ့ရ။ ကလေးသုံးယောက် မကြာခင် တက္ကသိုလ်တက်ရတော့မှာမို့ဆောင်းည သူလက်ဆောင်အဖြစ်ရွေးပေးတဲ့ ပစ္စည်းကိုသေချာပေါက်ကြိုက်ကြမှာမလွဲ မသွေ။
“ဟင် ကိုကို ဒါက ဖုန်း ဖုန်းမဟုတ်လားဟင် ”
“ညီမလေး သဘောကျရဲ့လား ”
“အင်း အရမ်းပဲ အား မေမေရေ ကိုကိုက သမီးကို ဖုန်းဝယ်ပေးတယ် ကြည့်ပါဦး ”
လက်ရှိ ခေတ်စားနေတဲ့ Touch Screenဖုန်းကို ညီမလေး သဘောကျနေတာ ဆောင်းညသတိထားမိသည်။ ဒါကြောင့် ဂုဏ်ပြုလက်ဆောင်အဖြစ် နောက်ဆုံးထွက် မော်ဒယ်မြင့် ဖုန်းအမျိုးအစားကိုမှ ရွေးဝယ်လာပေးခဲ့သည်။ ညီမလေးအတွက်စဥ်းစားမိတော့မှ ယူရီရယ်နှင့် အိုင်ဗန်အတွက်ကပါ မပါမဖြစ်ပေါ့။ ကောင်လေးနှစ်ယောက်ကတော့ ဖုန်းကိုတလှည့် သူ့ကိုတလှည့်ကြည့်ပြီး အံ့သြနေဆဲ။
“အစ်ကို ဒါစျေးအရမ်းကြီးမှာနော် ”
ယူရီရယ့်စကားကို အိုင်ဗန်ကလည်းထောက်ခံသည်။
“ဟုတ်တယ် ဒီလိုတလုံးတောင် အများကြီးပေးရတာ ကျွန်တော်တို့အတွက်ရောဆို အစ်ကို တော်တော်ကုန်ခဲ့မှာပေါ့”
“ကိုယ့်ညီတွေ ညီမတွေအတွက်ပဲဟာ ဘာဖြစ်လဲ အစ်ကိုက မင်းတို့အတွက်ဆို ဒီထက်မက ကုန်ရလည်း ဘာမှမဖြစ်ဘူး ”
“ဒါပေမယ့် ကျွန်တော်မယူချင်ဘူး အစ်ကို ဒီအတိုင်းပဲ အစ်ကို့စေတနာကို လက်ခံမယ်လေ ဖုန်းကတော့ အစ်ကိုပြန်ယူထားပါလား ”
တည်တည်ငြိမ်ငြိမ်ငြင်းဆိုနေသည့် အိုင်ဗန့်ရဲ့ ပုံစံကို ဆောင်းည မထူးဆန်းမိ။ ဒီကောင်လေးက နဂိုကတည်းက အနေတည်သလို မာနလည်း အလွန်ကြီးသည်။ ဘယ်လောက်ပဲ နှစ်တွေကြာခဲ့ပါစေ အိုင်ဗန်က ယူရီရယ်နှင့်မတူစွာ သူ့ကို သိပ်မခင်ဟု ဆောင်းည တွေးထင်မိသည်။ သူတို့စကားဝိုင်းထဲ ပြန်ရောက်လာသော ပိုးပိုးက အိုင်ဗန့်စကားကို ကြားတော့ အပြင်းအထန်ကန့်ကွက်သည်။
YOU ARE READING
ကန္တာရချယ်ရီ(BL)
Teen Fictionနှလုံးသားမြေအလွှာမှာပျိုးတဲ့ပန်းမို့ မွှေးရနံ့ကြွယ်ကာသင်းရင် မေတ္တာတရားလို့သာခေါင်းစဥ်တပ်ချင်ပါရဲ့ ႏွလုံးသားေျမအလႊာမွာပ်ိဳးတဲ့ပန္းမို႔ ေမႊးရနံ႕ႂကြယ္ကာသင္းရင္ ေမတၱာတရားလို႔သာေခါင္းစဥ္တပ္ခ်င္ပါရဲ႕
