ပြန်လည်ရှင်သန်ခွင့်ရတဲ့ ဖုဘလော့ဂါလေးရဲ့ ချက်မယ် ပြုတ်မယ် အစီအစဉ်

Part 54

Unicode

အပိုင်း ၅၄ တည်ခင်းဧည့်ခံကျွေးမွေးသော အခမ်းအနား (၁)
လူထွားမျိူးနွယ်၏ ကြယ်သင်္ဘောက ကြယ်ပြာအင်ပါယာသို့ ညနေ ခြောက်နာရီတွင် ဆိုက်ရောက်လာသည်။ ကောင်းကင်မှ ဆင်းသက်လာချိန်တွင် အလွန်ကြီးမားကြောင်း မြင်ခဲ့ရလေသည်။ ထိုကြောင့် သူတို့၏ရောက်လာခြင်းကို လူအများက သတိမပြုမိရန် ခက်ခဲလေသည်။ အစိုးရမှ တရားဝင် ကြေညာချက်နှင့်အတူ အင်ပါယာရှိ လူတိုင်းက လူထွားမျိုးနွယ်များ လာရောက်လည်ပတ်ကြောင်း သိသွားကြသည်။
အင်ပါယာ၏ လူထုက လူထွားမျိုးနွယ်အပေါ် အမြင်ကောင်းရှိသည်။ အကြောင်းမူကား နှစ်ထောင်ကျော် ရှည်လျားသော စစ်ပွဲတွင် ရန်သူများကို ရင်ဆိုင်သည့်အခါ လူထွားမျိုးနွယ်က အင်ပါယာ၏ စစ်တပ်နှင့်အတူ ရှေ့တန်းတွင် ရင်ဆိုင် ကာကွယ်ခဲ့လေသည်။
လူထွားမျိုးနွယ်၏ ဂြိုလ်တွင် ရှားပါးသော သတ္ထုအမျိုးအစား တစ်မျိုး ထွက်သည်။ ထိုသတ္ထုက ပေါ့ပါးကာ အလွန်အမင်း မာကြောသည်။ ကြယ်သင်္ဘောများဖြစ်စေ မာရှ်(မက္ခ)များ လုပ်ရာတွင်ဖြစ်စေ အငြင်းပွားစရာမရှိအောင် အားသာချက် ဖြစ်လာသည်။ တိုက်ဆိုင်သည်လားမသိ သူတို့၏ဂြိုလ်က မကြာခဏ ပစ်မှတ်ထားခံရကာ တိုက်ခိုက်ခံရသည်။ သူတို့က ပြောသော စကားများအရ ရန်သူ၏ ရန်သူက မိတ်ဆွေဖြစ်သည်ဟု ဆိုသည်။ အင်ပါယာရှိ လူများကလည်း အလွန်အမင်း ဉာဏ်ကောင်းကြသည်။ သူတို့က ကြယ်သင်္ဘောများနှင့် မာရှ်များ တည်ဆောက်လုပ်ခြင်းတွင် နည်းပညာဆိုင်ရာ တီထွင်ဆန်းသစ်များကို လုပ်ဆောင်ခဲ့သည်။ လူထွားများက တိုက်ခိုက်ရာတွင် အလွန်တော်သော်လည်း နည်းပညာပိုင်းတွင် အားနည်းသည်။ လက်ဆပ်ခြင်းက ကောင်းကင်ကိုပင် တည်ထောင်နိုင်သည်။ ထိုသို့ဖြင့် မျိုးနွယ်နှစ်ခုက သဘောတူညီမှု ရခဲ့သည်။ လူထွားမျိုးနွယ်က တိုက်ခိုက်အားနှင့် သတ္ထုများ ထောက်ပံ့ပေးပြီး လူသားမျိုးနွယ်က နည်းပညာနှင့် စစ်ရေးပရိယာယ်များ ချမှတ်ပေးသည်။ ထိုသို့ဖြင့် နှစ်ဦးနှစ်ဖက် အကျိုးရှိသော သဘောတူညီ ပူးပေါင်းမှု ဖြစ်လာသည်။
သည်တစ်ကြိမ်တွင် လူထွားမျိုးနွယ်က ရှားမီဆိုသည့် အင်ပါယာ၏ ပန်း( အလှဆုံး၊ အတော်ဆုံးဆိုတာမျိုးကို ရည်ညွှန်းတာပါ) ၏ နောက်ဆုံးဖန်တီးထားသည့် အက်စ်အဆင့် မာရှ်အတွက် ရောက်လာခြင်းဖြစ်သည်။ နှစ်ဘက်လုံးက မာရှ်က မည်မျှအရေးကြီးကြောင်း နားလည်ထားကြသည်။
မျိုးနွယ်နှစ်ခုမှ ခေါင်းဆောင်ပိုင်းများ၏ တွေ့ဆုံမှုက အင်ပါယာမှ သတင်းဌာနများကို ဆွဲဆောင်သွားသည်။ နောက်ဆုံးတစ်ကြိမ် လူထွားမျိုးနွယ်က လာရောက်လှည်ပတ်ခဲ့ချိန်က သူတို့က  သဘာဝ အစားအသောက်များအပေါ် နှစ်ခြိုက်မှုကို ပြသခဲ့သည်။ သတင်းများအရ သူတို့က သည်တစ်ကြိမ် မရောက်လာခင်ကတည်းက အထူးတလည် ကြိုတင် တောင်းဆိုမှာကြားထားသည်ဟု ပြောနေကြသဖြင့် လူတိုင်းက ဧည့်ခံပွဲကြီးကို စိတ်ဝင်စားနေကြလေသည်။
တိုက်ရိုက်ထုတ်လွှင့်မှုမှတဆင့် ကြယ်သင်္ဘောထဲမှ ဆင်းလာသော လူထွားမျိုးနွယ်များကို မြင်လိုက်သည့် ဥက္ကဌကုက ပြောသည်။
“လူထွားမျိုးနွယ်တွေ ရောက်လာပြီ၊ ပြင်ဆင်ကြရအောင်”
“ဟုတ်ကဲ့”
အမိန့်ကိုကြားသည်နှင့် အနောက်မီးဖိုခန်းက လူများက အလုပ်များသွားကြသည်။
ရွှယ်နင်တို့က ဟင်းပွဲ တစ်ဆယ့်ခုနှစ်ပွဲကို ပြင်ဆင်၍ ပြီးနေလေပြီ။ လူထွားမျိုးနွယ်များ စိတ်ကြိုက်စားသောက်နိုင်ရန် အလို့ဌာ အပြင်ဘက်တွင် ဉာဏ်ရည်မြင့် စက်ရုပ်များစွာကို အသင့်ရပ်ခိုင်းထားသည်။ သူတို့က သေချာပြင်ဆင်ထားကြပြီး ဟင်းလျာအများစုက ပြင်ဆင်ရ လွယ်ကူလေသည်။ သူတို့က နေရာတွင် ချက်ချင်းထပြင်ဆင်ရန်အတွက် မခက်ခဲတော့ချေ။ သူတို့က လူထွားမျိုးနွယ်များ၏ သဘောကျလုပ်ရန် ပြင်ဆင်ထားကြသည်။
ယွမ့်ထန်း၏ ဘက်တွင်မူ သူက ဟင်းလျာအေးများဖြစ်သည့် သလင်းပုဇွန်၊ တိုဟူး ငါးအသားလုံး၊ တိုဟူးအေးဆလပ်(အသုပ်)နှင့် ပဲငံပြာရည် ငါးကြီးဆီနှပ်တို့ ဖြစ်သည်။ လူထွားမျိုးနွယ်များက ရောက်လာသည့်အခါ ထိုအအေးစာများကို ဦးစွာမြည်းစမ်းထားနိုင်မည် ဖြစ်သည်။ ထိုဟင်းလျာများကို ယွမ့်ထန်း၏ ယခင်ဘဝတွင် ပြည်နယ် ဧည့်ခံပွဲကြီးများတွင် ပြင်ဆင်တတ်လေ့ရှိသည်။ အရသာကလည်း ကောင်းမွန်ပြီးသားဖြစ်သည်။ ပုဇွန်ပင်ဖြစ်စေ ငါးပင်ဖြစ်စေ အားလုံးက အသားများဖြစ်သည်။ လူထွားများက အသားဓာတ်ပြင်းခြင်းကို ကြိုက်လျှင်ပင် ထိုဟင်းများကို စားချင်ဦးမှာ သေချာသည်။ လူထွားများ ကြိုက်သော အသားဟင်းများအတွက်မူ သူတို့က နေရာတွင်ပင် ကြိုတင်ပြင်ဆင်ရမည့် ပူပူနွေးနွေး ဟင်းများဖြင့် ဧည့်ခံမည်ဖြစ်သည်။ သို့ရာတွင် ကြိုတင် လုပ်ထားသင့်သမျှကို လုပ်ဆောင်ထားပြီးပြီဖြစ်သည်။ ဟင်းချိုကိုပင် အချိန်အတန်ကြာ တည်ထားပြီးလေရာ နောက်ဆုံးတစ်လှည့် ငါးမိနစ် ဆယ်မိနစ်ခန့် ထပ်တည်ပြီးလျှင် အဆင်သင့်ဖြစ်လေပြီ။ အချိန်ကျလာသည့်အခါ ဟင်းတစ်ပွဲကြီးတစ်ပွဲ ချပေးပြီး ဧည့်ခံနိုင်လေပြီ။
လူထွားများ၏ လာရောက်လည်ပတ်မှုတွင် လိုက်ပါလာမည့် အစိုးရ အရာရှိများကိုလည်း အင်ပါယာပြည်နယ် အဆောက်အဦတွင် လက်ခံကြိုဆိုမည်ဖြစ်သည်။ သူတို့က ၅၅လွှာသို့ သွားရန် ဓာတ်လှေကားထဲသို့ ဝင်လိုက်ပြီးသည်နှင့် ဧည့်ခံပွဲရှိရာ ခန်းမသို့ ရောက်သွားမည်ဖြစ်သည်။
“ဒဖူလူ ရဖ်ဂနယ်မာ့ဖ်”
မျိုးနွယ်မတူသဖြင့် ဘာသာစကားမတူသည့် ပြဿနာရှိသော်လည်း ဉာဏ်ရည်မြင့် ဘာသာပြန်စက်ရုပ်များရှိသဖြင့် စကားပြောဆို ဆက်သွယ်ခြင်းက ပြဿနာ မရှိချေ။
ထိပ်တန်းအဆင့် အရည်အသွေးရှိ စက်ရုပ်များက ဟင်းပွဲများ သယ်ကာ ရောက်လာသည့်အခါ လူထွားများက ခန္ဓာကိုယ်ကို ပြင်ထိုင်ကြကာ မျှော်တလင့်လင့် ဖြစ်လာသည်။ သူတို့က နောက်ဆုံးတစ်ကြိမ် ရောက်လာခဲ့ချိန်က အင်ပါယာမှ  သဘာဝ အသားငါး ဟင်းလျာများက အလွန်ကောင်းမွန်သည်ဟု ခံစားခဲ့ရသည်။ ယခုလေးတင် အပြင်ဘက်ခန်းမကို ဖြတ်သန်းလာခဲ့ချိန်တွင် အလွန်မွှေးပျံ့သည့် ရနံ့များကို ရခဲ့သေးသဖြင့် ဆာလောင်လာလေသည်။
ကြယ်ပြာအင်ပါယာတွင် အလွန်ပြောင်မြောက်လွန်းသော လက်ရာကို ပိုင်ထားသည့် ကြယ်လေးပွင့်စာဖိုမှူးတစ်ယောက် ရှိသည်ဟု ကြားထားသဖြင့် အင်ပါယာအကြောင်း ဆွေးနွေးခဲ့ချိန်တွင် ထိုစာဖိုမှူး၏ ဟင်းလျာများကို နမူနာဖြစ်ဖြစ် မြည်းစမ်းချင်ကြောင်း တောင်းဆိုခဲ့သည်။ အင်ပါယာကလည်း တည့်တိုးသာ တုံ့ပြန်ခဲ့သည်။ ထိုစာဖိုမှူးက သည်နေ့ ဧည့်ခံပွဲကို တာဝန်ယူပေးမည်ဟု ပြောသည်။ သို့ရာတွင် အအေးစာ ဟင်းပွဲလေးပွဲက စားပွဲပေါ်တင်လိုက်သည့်အခါ လူထွားများက စိတ်ပျက်သွားသည့် အမူအယာများ ဖြစ်လာသည်။
“ငါ ဗီဒီယိုထဲမှာ တွေ့ထားတာနဲ့ ဘယ်လိုတောင် ကွာခြားနေရတာလဲ”
“အသေအချာပဲ ဘာလို့ ဘာအနံ့မှ မရတာလဲ”
“ဘာလို့ ဒါကြီးက ဖြူနေတာလဲ၊ ပိုးကောင်တွေလိုပဲ၊ ဒါကို တကယ်ရော စားလို့ရရဲ့လား”
အဓိက စားပွဲတွင်ရှိနေသည့် ဂေးဘတ်တို့က အဆင်ပြေသေးသော်လည်း အခြားသော စားပွဲဝိုင်းများမှ လူထွားများကမူ မကျေနပ်ကြဘဲ ပွစိပွစိ ရွတ်နေကြလေသည်။
သူတို့က ဟင်းလျာအေး ဘာညာကို နားမလည်ချေ။ သူတို့က သိသည်မှာ ထိုဟင်းများထံမှ ဘာအနံ့မျှ မရသဖြင့် သာမန်ဟုသာ တွေးလိုက်ကြသည်။ ထိုဟင်းများက အပြင်ဘက်ခန်းမမှ အသားကင်လောက်ပင် မကောင်းချေ။ ထိုဟင်းပွဲများက တန်ဖိုးကြီး ပန်းကန်များဖြင့် အလှဆင်ထားလျှင်ပင် မသင့်လျော်ချေ။
ခန်းမအတွင်းရှိ ဧည့်သည်တော်တစ်ယောက်ချင်းစီတိုင်းက သီးသန့် ဟင်းတစ်ပွဲစီဖြင့် ဧည့်ခံခံရသည်။ ထိုကြောင့် တစ်ယောက်ဆီအတွက် ဟင်းပွဲငယ် လေးပွဲစီ ရှိနေသည်။ ဟင်းပွဲများက ပျော့ပျောင်းကာ နူးညံ့သော မျက်စိအေးစရာ အနေအထားမျိုးဖြင့် ရှိနေသည်။ သည်ပွဲက နိုင်ငံအတွက်လည်း အရေးကြီးသဖြင့် ယွမ့်ထန်းက ပန်းကန်များကို အသေးစိတ် ရွေးချယ်ထားသည်။ ဟင်းပွဲမှအရောင်ကို ပန်းကန်နှင့်လိုက်ဖက်အောင် ရွေးချယ်ထားသည့်အပြင် အလှဆင် ပုံဖော်ထားသေးလေရာ ယွမ့်ထန်း၏ ပြောင်မြောက်သော ဓားကိုင်စွမ်းရည်ကို မြင်နိုင်သည်။
သို့သော် ရောက်နေသူလူတိုင်းက ထိုကဲ့သို့ ခင်းကျင်းပြင်ဆင်ပုံကို မမြင်ဖူးကြချေ။ နဂါးနှင့်ဖီးနစ်များ၊ ပန်းများနှင့်မြက်များနှင့် တူသလိုလို ထင်ရသော်လည်း ထိုအရာများကို ဖန်တီးထားခြင်းအား မမြင်ဖူးသည့်အတွက် ဒါက အလှဆင်ထားခြင်းလည်း စား၍ရသည့်အရာများလား ဟူ၍ ဝေခွဲမရ ဖြစ်နေလေသည်။
ထိုအခြေအနေက တော်ဝင်စုံတွဲအတွက်လည်း ကို့ယို့ကားယား ဖြစ်စေလေသည်။ သူတို့က ယွမ့်ထန်း၏ လက်ရာကိုဖြစ်စေ ချက်ပြုတ်ခြင်းကိုဖြစ်စေ မရင်းနှီးကြချေ။ ထိုကြောင့် ချန်းကျီက ထိုဟင်းပွဲများကို မြင်သောအခါ မျက်နှာပျက်သွားသည်။ သို့သော် ဟင်းများက စားပွဲပေါ်ပင် ရောက်နေလေပြီ။ သူက ရိုင်းစိုင်းစွာ ပြုမူပြီး သူကိုယ်တိုင်လည်း ဟင်းများနှင့် မရင်းနှီးကြောင်း လူထွားများကို သိစေ၍မရချေ။ ထိုကြောင့် သူက ပြောလိုက်သည်။
“စာဖိုမှူးရဲ့ ဖန်တီးနိုင်စွမ်းက ပြောင်မြောက်တာပဲ၊ လက်ရာကလည်း အရမ်းပြောင်မြောက်နေမှာ သေချာတယ်”
ထို့နောက် သူက ခရင်းကို ကောက်ကိုင်ကာ အန္တရာယ်မရှိလောက်ဟု ထင်ရသော အပြစ်ကင်းသည့် ပုဇွန်ဖြူတစ်ခုကိုသာ ကောက်ထိုးလိုက်သည်။
လူထွားများက တူမသုံးသဖြင့် သူတို့အတွက် ခရင်း၊ ဓားနှင့်ဇွန်းများသာ ရှိနေသည်။ သူတို့က ဧကရာဇ်ကို မျက်နှာထောက်မနေဘဲ စစားရန် ဇွန်းများ ကောက်ကိုင်ကြသည်။ သို့သော် မည်သည့်နေရာက စစားသင့်ကြောင်း မသိဖြစ်နေသည်။
သို့ရာတွင် ဟယ်သားအဖတို့နှင့် ရှားမီ၊ ပိုင်ချီတို့က စားသောက်နေကြပြီဖြစ်သည်။ အခြားလူများက ထိုဟင်းပွဲများကို မသိလောက်သော်လည်း သူတို့ကမူ မစိမ်းသက်နေချေ။
သလင်းပုဇွန်က ပုဇွန်မွှေကြော်က ဖြစ်လာခြင်းဖြစ်သည်။  တစ်ကောင်ချင်းစီတိုင်းက တလက်လက် တောက်ပကာ ဖောက်ထွင်းမြင်ရမတတ် ဖြစ်နေသည်။ သူတို့က အလွန်အမင်း လှပကာ နွေရာသီ အရသာနှင့် ကိုက်ညီပြီး အံ့သြဖွယ် ခံစားချက်ကို ရစေလေသည်။ တိုဟူး ငါးအသားလုံး၏ အပြင်သားကို ပါးလျသော တိုဟူးခြောက်ဖြင့် လုပ်ထားပြီး အထဲတွင်မူ နူးညံ့ လက်ဆတ်သော ငါးအသားများ ပါသည်။ ကြော်ပြီးနောက် အပြင်လွှာက ရွှေရောင်သန်းသွားသည်။ အပြင်ဘက်က ကြွပ်ရွနေသလို အတွင်းက နူးညံ့နေသည်။ ထိုကြောင့် အလွန်အရသာ ရှိလေသည်။ တိုဟူးအေးဆလပ်ကို ယွမ့်ထန်းကိုယ်တိုင် ပြင်ဆင်ထားသော ဆားစိမ်ကြက်ဥအနှစ်ထည့်သုံးထားပြီး ပဲငံပြာရည်၊ မွှေးပျံ့သော ကြက်သွန်မြိတ်နှင့် ငရုတ်ဆီတို့ကို ပေါင်းစပ်ထားသည်။ အငန်ဓာတ်ကဲပြီး စပ်ဖျဉ်းဖျဉ်း အရသာက လျှာပေါ် ပျံ့နှံ့သွားသည်။ မည်သည့်အသားမျှ ပါမနေသော်လည်း လူကို စား၍ မရနိုင်အောင် လုပ်ဆောင်နိုင်လေသည်။ ပဲငံပြာရည် ငါးကြီးဆီကလည်း အတုံးကြီးကြီးလေးများ အနေအထားဖြင့် ရှိနေပြီး အငန်ဓာတ်ကဲကာ ချိုမြိန်မှုများလည်း ပေါင်းစပ်လျက် ရှိနေသဖြင့် စား၍ အလွန်ကောင်းလေသည်။
အခြားလူများက တုံ့ဆိုင်းနေချိန်တွင် လူငါးယောက်၏ တူများက မိုးရွာသလို ဆက်တိုက်လှုပ်ရှားနေကာ တခဏလေးနှင့်တင် ဟင်းပွဲ၏ တဝက်ခန့်က ကုန်သွားလေသည်။
ထိုငါးယောက်က ခေါင်းပင် မဖော်ကြောင်း မြင်သောအခါ ချန်းကျီလည်း မနေနိုင်တော့ဘဲ တူကို ကောက်ကိုင်ပြီး ငါးအသားလိပ်ကို ညှပ်ကာပါးစပ်ထဲ ထည့်လိုက်သည်။ ကောင်းမွန်လွန်းသော အရသာက လျှာကို အပိုင်စီးသွားသည့်အခါ သူက မျက်လုံးပြူးသွားတော့သည်၊ သူက ဂေးဘတ်တို့ကို ပြုံးပြရန်ပင် မအားတော့ဘဲ ဆက်တိုက် စားတော့သည်။ သို့သော် သူက ဧကရီကို မြန်မြန်စားကြည့်ရန် အချက်ပြရန် မမေ့ခဲ့ချေ။
ဂေးဘတ်တို့က သင်ယူရာတွင် နှေးကွေးသော်လည်း အခြားလူများ စားနေခြင်းမှတဆင့် သင်ယူကာ ဟင်းလျာများကို ဇွန်းအပြည့် ခပ်စားလိုက်သည်။ တစ်လုတ်တည်းနှင့်တင် သူတို့အားလုံးက အံ့သြသွားကြလေသည်။
ဒီလိုသာမန်ဟင်းတွေက ဘာလို့များ ဒီလောက်ကောင်းတဲ့ အရသာမျိုးကို ပေးနိုင်တာလဲ
အချိန်တိုအတွင်း အဓိကစားပွဲဝိုင်းမှ လူတိုင်း ခေါင်းမမော့အားတော့သဖြင့် လေထုက တိတ်ဆိတ်သွားလေသည်။ အခြားသုံးဝိုင်းမှ လူများလည်း ဆွံ့အသွားကြသည်။ အဓိကခန်းမ၏ တံခါးနားတွင်က ုန်းကုန်းကွကွ လုပ်နေကြသော သတင်းထောက်နှစ်ယောက်က တိုက်ရိုက်ထုတ်လွှင့်ရင်းအ လုပ်များနေကြသည်။ ဧည့်သည်များကို အနှောင့်အယှက် မဖြစ်စေရန်အတွက် ဟင်းလျာများကိုသာ အဓိကထား ထုတ်လွှင့်ကြလေသည်။ သို့သော် သုံးဖက်မြင် ဗားရှင်းခလုတ်ကို မဖွင့်ထားသော်လည်း အမြင်စူးရှသူများက ဟင်းများ၏ ဖန်တီးသူကို တန်းသိသွားကြသည်။
[မြောင်မြောင်က တင်ဆက်သူ ချက်သမျှ ဟင်းလျာတိုင်းကို ကြိုက်တယ်: အား.. အား.. တစ်ချက်ကြည့်ရုံနဲ့တင် ငါရဲ့ယွမ့်ထန်းလေး လုပ်ထားမှန်း ငါ သိတယ်]
[ဖုန်းယွဲ့ရွှမ်ဟယ်: အိုက်ယား မင်းတို့ မစားချင်လည်း ငါက ဝိုင်းစားပေးပါ့မယ်၊ သူတို့ကို ကြည့်ရတာ စိတ်ပင်ပန်းလိုက်တာ]
[ကျဆင်းလာသော ဆာကူရာ: ဟူးဟူးဟူး ဒီဟင်းတွေကို တိုက်ရိုက်ထုတ်လွှင့်မှုမှာ မချက်ပြထားရသေးဘူးမို့လား တအား မြည်းကြည့်ချင်နေပြီ ဟူး]
မြည်းကြည့်၍မရသည့်အခါ ကြည့်ရှုသူများမှာ ကြည့်သာကြည့်နေရပြီးတ ံတွေးများ ဆက်တိုက် မျိုချနေရလေသည်။
လူတိုင်းက ဟင်းလေးပွဲကို တစ်ခဏချင်း အပြောင်ရှင်းလိုက်ကြသည်။ အလှဆင်ပုံဖော်ထားသော မုန်လာဥနီနှင့် ဘူးသီများပင် ချန်မထားကြချေ။ ထိုဟင်းလေးပွဲက သူတို့၏ စားချင်စိတ်ကို ပိုပြင်းထန်လာစေလေသည်။ အတူစားသုံးရန် ဝိုင်မရှိသဖြင့် ယွမ့်ထန်းက ချိုမြိန်ကာ ပြင်းရှသော ဇီးသီးဖျော်ရည်ကို ြ ပင်ဆင်ထားလေရာ အားလုံးက တံတွေးကျမတတ် ခံစားနေရတော့သည်။
တန်းစီနေသော စက်ရုပ်များက ဘာမျှမရှိတော့သည့် ပန်းကန်များကို သိမ်းသွားကာ ဟင်းပွဲအသစ်များ ချပေးသည်။
အချိန်က ကွက်တိရောက်လာသည်ဟု ဆိုရမည်။ သူတို့က ခွက်များကို ချရုံရှိသေးသည်၊ ပူပူနွေးနွေး ဟင်းလျာများကေ ရှ့ရောက်နေလေပြီ။ ဉာဏ်ရည်မြင့် စက်ရုပ်လေးရုပ်က အလွန်ကြီးမားသော ဗန်းလေးဗန်းကို သယ်လာသည်။ ဗန်းများကို အနားဝိုင်း သတ္ထုအဖုံးဖြင့် အုပ်ထားသဖြင့် အထဲသို့ မမြင်ရချေ။ ဉာဏ်ရည်မြင့် စက်ရုပ်များက အခြားဝိုင်းသို့ ရောက်သွားသည်နှင့် သူတို့က အဖုံးများကို ခပ်မြန်မြန် လှပ်လိုက်ကြသည်။ ထိုအခါ သူတို့ကြိုက်သော အသားနံ့က နှာခေါင်းထဲ တိုးဝင်လာလေသည်။
ဗန်းထဲတွင် သစ်ရွက်ပုံသဏ္ဍာန်ရှိသော လှပသော ချစ်စရာပန်းကန် တစ်ဆယ့်နှစ်ပန်းကန်ကို မြင်ရလေသည်။ တစ်ပန်းကန်စီတိုင်းတွင် ကြီးမားသော ဘဲသားကင် ငါးတုံးစီ ရှိနေသည်။ တစ်ပန်းကန်စီတိုင်း၏ ဘေးဖက်တိုင်းတွင် ယွမ့်ထန်းကိုယ်တိုင် ပြင်ဆင်ထားသော အချဉ်ခပ်ပျစ်ပျစ် တစ်ခွက်ဆီ ရှိနေသည်။
ဘဲသားကင်၏ အရေခွံက နီညိုရောင် ဖြစ်သည်။ အပြင်အသားလွှာမှ အဆီများ ကုန်စင်သည်အထိ ကင်ထားသဖြင့် အဆီရွှဲသလိုမျိုး ရွှန်းစိုနေသည်။ ကြည့်ရုံနှင့်တင် အလွန်အရသာရှိနိုင်ကြောင်း ခံစားမိကြသည်။ ယွမ့်ထန်းက အကယ်ဒမီ သိပ္ပံမှ ထုတ်ထားသည့်အိုဗင်ကို သုးထားသည်။ ဘဲကင်ကို ကြိုတင် လှီးဖြတ်ပေးထားသဖြင့် အတွင်းသား၏ နူးညံ့နေမှုကို ထင်ရှားစွာ မြင်ရလေသည်။
ဉာဏ်ရည်မြင့် စက်ရုပ်က လူတိုင်း၏ ရှေ့သို့ ပန်းကန်များကို ချထားလိုက်သည်နှင့် လူအများက စကားစပြောရန် ခက်ခဲသွားကြသည်။ လူတိုင်းလိုလို တူများကို ကောက်ကိုင်ကာ တိုက်ပွဲဝင် အနေအထားသို့ ဝင်ရောက်လိုက်ကြသည်။
ဘဲကင်တွင် သီးသန့်ကိုယ်ပိုင် ရနံ့ရှိပြီးသား ဖြစ်သည်။ အရေခွံက ကြွပ်ရွကာ အသားက နူးညံ့သည်။ အရသာကလည်း ကောင်းမွန်လွန်းသည်။ အချဉ်ပျစ်ပျစ်ထဲသို့ နှစ်ကာ စားလိုက်လျှင် ပို၍ အရသာရှိသွားသည့်အတွက် အရိုးများကို မစားနိုင်ခြင်းအား မုန်းတီးနေကြတော့သည်။ လူထွားများကို မဆိုထားဘိ အင်ပါယာမှ လူများပင် ခေါင်းမဖော်ကြတော့ချေ။
“ဒါက ဘယ်လိုတိရိစ္ဆာန်ရဲ့အသားလဲ၊ အရသာရှိလိုက်တာ”
ဂေးဘတ်က ကုန်သွားသော ပန်းကန်ပေါ် ခက်ရင်းကို ချလိုက်ပြီး မေးလိုက်သည်။ သူက ထပ်စားချင်နေသေးသည်။
လူထွားများ၏ဂြိုလ်က အလွန်ခေါင်သော နေရာတွင်ရှိသည်။ ထိုနေရာတွင် အာကာသထဲ ကျင်လည်သော သားရဲကောင်ကြီးများသာ ရှိတတ်ပြီး ဖမ်းဆီးရန် အလွန် ခက်ခဲသည်။ အသားကလည်း မာကြောလွန်းလေသည်။ ထိုကြောင့် အင်ပါယာမှ နူးညံ့သော အသားများကို သူတို့က သဘောကျကြသည်။ ထိုကြောင့် ယခင်တစ်ခေါက်က သူတို့က လာလည်ခဲ့ချိန်က အသားကင်ကိုတင် အလွန် သဘောကျနေခဲ့ကြပြီး ဖြစ်သည်။ ယခုတစ်ခေါက်တွင် ပို၍ သဘောကျရသော အရသာကို ခံစားရမည်ဟု မထင်ထားကြချေ။
“ဒါက…”
ထိုဘဲသားကင်ကို ချန်းကျီကိုယ်တိုင်လည်း ပထမဆုံးအကြိမ် စားဖူးခြင်းဖြစ်သည့်အတွက် မရှင်းပြတတ်ချေ။
“အရှင်မင်းကြီး ဒီဟင်းလျာက ကြွပ်ရွတဲ့ ဘဲသားကင်လို့ ခေါ်ပါတယ်။ အဓိက ပါဝင်ပစ္စည်းကတော့ ဘဲသားပါပဲ”
ဟော်ယွန်ရီက စားပွဲ၏ အလယ်တွင် ထောင်ထားသော ဘုတ်ပြားလေးကို ညွှန်ပြသည်။
“အဲဒီမှာ မီနူးရှိပါတယ်”
သို့ရာတွင် ဟော်ဝေ့ယဲ့နှင့် ဟော်ယွန်ချန်းတို့ပင် အံ့သြသွားကြလေသည်။ ဘဲတွင် ညှီနံ့က အလွန်ပြင်းလွန်းလေရာ အင်ပါယာမှ အာရုံခံစားနိုင်စွမ်း မြင့်မားသော အက်စ်အဆင့်တွေဆိုလျှင် အနားကပ်နိုင်ခြင်းပင် မရှိချေ။ သို့သော် ယွမ့်ထန်း၏ လက်ရာအောက်တွင် အလွန်မွှေးပျံ့ကာ အရသာရှိသော ဟင်းတစ်ခွက် ဖြစ်သွားလေသည်။
မီနူးတွင် ဘာသာနှစ်မျိုးဖြင့် ရေးပြထားလေရာ ဂေးဘတ်အနေနှင့် ဖတ်ရန် မခက်ခဲချေ။ သို့သော် တစ်မျိုးကိုမျှ သူက နားမလည်လေရာ ပို၍ မျှော်လင့်စောင့်စားလာတော့သည်။
ယွမ့်ထန်းက ပျားရည် ကြက်တောင်ပံကို ပန်းကန်ထဲ ထည့်ပြီးကာစ ရှိသေးသည့် ပန်းကန်အလွတ်များက နှစ်မိနစ် သုံးမိနစ်ခန့်နှင့်တင် ပြန်ရောက်လာသဖြင့် အံ့သြသွားလေသည်။
“ကုန်သွားကြပြီလား”
“ဟားဟား နောက်တစ်ပွဲ သွားချခိုင်းလိုက်ရအောင်၊ အပြင်ကလူတွေ စောင့်နိုင်တော့မယ် မထင်ဘူး”
ဥက္ကဌကုက ရယ်မောကာ ပြောသည်။