شمسه : والله يا سيف لو تقرب صوب حمد ياويلك
سيف ( بو راشد ) : ابوج هذا
شمسه : ليته طالع على سميه
سيف ( بو راشد ) : انا سميه ريال
سيف زايد : انا ريال بس اميه تقول انا ولد
سيف ( بو راشد ) ما عليك من آنك انت ريال
سلمى : هب ناقصينه نحن يستريل علينا بعد
سيف زايد : يدي تسمعها
سيف ( بو راشد ) و هو يغمز حق سلمى : سلمى شو بعد يستريل علينا ؟ تراه ريال
سلمى ( تسلك ) : صح صح
* * *
يالسه سلمى قدام الضوي و اتريا شاهيها يفوز عشان تصبه عليهم ، رن تلفونها مرتين لكن ما انتبهت له ، شافت سيارة نادر واقفه قدام البيت و هي عند الضو الي في الباركنات عدال السيايير ، فتحت تلفونها تشوف اذا نادر دق لها ، و شافت ثلاث اتصالات منه ردت دقت له ؛
سلمى : سوري الفون صامت
نادر : اطلعيلي
سلمى : ليش ؟
نادر : عمي سالم دق يباني اطلع بناته
سلمى : و بتطلعهم ؟
نادر : ما بطلعهم بدونج
سلمى : صدق
نادر : والله ولا انا ليش واقف قدام بيت يدوه فاطمه
سلمى : شو عرفك اني في بيت يدوه فاطمه
نادر : تستهبلين ؟ و بعدين لوكيشن سناب ما يقصر
* * *
قامت سلمى و خلت جاهيها على الضو و ركبت مع نادر ، كتبت حق ابوها مسج انها طالعه مع نادر و دق ابوها اول ما قرا المسج ؛
زايد : ما شاء الله الطلعات كثرة
سلمى : والله ما اخليه يطلع مع البنات بروحه
زايد : شو لابسه ؟
سلمى : والله لابسه كندوره و شيله
زايد : زين ، لا اشوفج تلبسين هودي و لقنز برا
سلمى : ان شاء الله
زايد : نادر منو بيطلع ؟
سلمى : بنات عمه
زايد : و عمج
سلمى : احس غريب الشي
زايد : زين برايج
سلمى : ابويه بليييز حول
زايد : ان شاء الله بحول على نادر
سلمى : لا عليه
زايد : لا اعرف اذا حولت عليج وين بيروحن
* * *
سلمى : شما بتروح ؟
نادر : السياره اصلاً عشانها
سلمى : شو ما عندها اخوان ؟
نادر : عندها توأم في الخدمه الوطنيه و ثنين يدرسون برا واحد في امريكا و واحد في بريطانيا
سلمى : ما شاء الله
نادر : و نحن بحسبة خوانهم
سلمى : اتمنى هي تعتبرك بحسبة اخوها
* * *
استغرب نادر من سلمى ، وصلوا لـ مزرعة يدته ( طليقه حمد ( بو مايد ) ) و كتب حق شما انه برا ، و سلمى قلبها ولع من الغيره ، شافت انه ضايقها سناب و كلمها سناب ، يا شما و فتحت الباب الي قدام و انصدمت اول ما شافت سلمى ، ركبن البنات و كانت عليا بنت ساري معاهن طبعاً طول الطريق كانت سلمى ساكته و تجاملهن ولا هي لايعه جبدها منهن ؛
نادر : وين تبن ؟
ريم بنت سالم : اول شي ناخذ كوفي بليز درب مرعب طويل
نادر : ان شاء الله ، اي كوفي تبين
ريم بنت سالم : في كوفي الترك ماله لونه اسود و الله ما اعرف شو اسمه بس اذا شفته بعرفه
* * *
طبعاً سلمى ساكته و واضح ان فيها شي هب بالعاده جي تسكت ، فتح نادر تلفون و كتب لها في السناب ؛
نادر : فيج شي ؟
سلمى : لا
نادر : اكيد ؟
سلمى : هيه
* * *
شما : نادر انا بشبك من تلفوني بلوتوث و بحط اغاني
( مد لها نادر الواير و حطت غنية المختلف للمغني فؤاد عبدالواحد ، و قالت له هذي اهداء مني لك ، التفتت سلمى و عطتها نظره ما ابا غيرها )
( في السناب )
سلمى : خييير تهديك ؟
نادر : معليج منها ، الغنيه اهداء مني لج
سلمى : يع هب حلوه
نادر : عاد تعرفين اني احبها
سلمى : حبها بروحك
نادر : صبري بحط لج اهداء
* * *
سحب نادر الواير من تلفون شما و حطه في تلفونه و قال لها ( اغانيج خايسه مثل ذوقج )
شما : عاد تخيلك انك ذوقي
نادر : مخيس مثلج
شما : جب جب
* * *
فتح نادر ساوند كلاود و حط غنية ( انا بقربك اصايل ) (١) و كتب لها في السناب ( اسمعي الكلمات عدل ) .
شما : شو هالذوق الي عليك
نادر : ما ابا اسمع صوتج
شما : بلاك ترا ما قلت شي
نادر : شموه مالي خلقج
شما : والله عيل لك خلق حق منو ؟
عليا بنت ساري : ترا صدقه صدعتينا
شما : هذا من راح عنا تغير
ريم : شموه ترا صدق لوعتي بجبودنا
شما : زين بسكت
* * *
بعد ما انتهت الغنيه خذت سلمى تلفون نادر و حط اغنية ( إلا الموت - فهد الكبيسي ) ( ٢) ، طبعاً كانت الصدمه واضحه على شما ( كيف سلمى قدرت تفتح تلفون نادر ) ، و شوي و تنتبه انه ماسك يدها ما قدرت امسك نفسها شما ؛
شما : انتوا شي بينكم ؟
( كانت سلمى بتسحب يدها لكن مشكلها نادر اقوى )
نادر : هيه مخطوبين ، في شي ؟
شما : و انا ؟
مادري : انتي شو ؟
شما ( بتردد ) : من متى ؟ و كيف انا ما ادري
نادر : و ليش تدرين ؟ انتي منو؟
شما : الحين انا صرت منو ؟
* * *
سكت نادر و مارد عليها ، كتبت عليا حق سلمى ( مبروك تستاهلون بعض و ما عليج من شما هاي جي دوم ماتوب ع كثر ما يكلمها بـ هذا الاسلوب ما تحس انها تفشل ، و نادر ترا دوم يتضارب معاها ) ، قرت سلمى كلاها و حطت قلوب ، وصلوا تل مرعب و من مطعم لـ مطعم و تهندق عليهن نادر لانهن يتواقعن ، و يبن ينزلن في الرمله و ياكلن ، دور مكان اطلالته حلوه و قف و نزلهن عشان ياكلن:
نادر : سلمى انتي اركبي
شما : و ليش سلمى ؟
نادر : ما يخصج
شما : معليييههه
نادر : تهددين يعني ؟
* * *
ركبت سلمى و كان واضح عليها انها منفسه نزل عند المطاعم و الكوفيات لكن مصره انها ما تبا شي ( نفسها منسده) ، التفت يشوفها ؛
نادر : سلمى شوفيني
لفت سلمى صوبه : شفتك
نادر : شما مضايقتنج ؟
سلمى : ما ادانيها
نادر : طوفي ولا كنها موجوده
سلمى : يع اكره حركاتها
نادر : ولا تزعلين منها يخي هاي ماتي صوبج
سلمى : حط نفسك مكاني ولا لا انت الغيره عندك الموت
نادر : انزين ما تبين كولد تيي
سلمى : ابا
نادر : من عيوني ، انا كم سلمى عندي ؟
سلمى : كنت تحبها ؟
نادر : منو شما ؟
سلمى : هيه منو يعني
نادر : لا ، هاي بس جمال جي ولا ماشي اسلوب
سلمى : اها
نادر : قربي شوي بقولج شي
* * *
قربت و باس خدها ، واضحه الفرحه من الابتسامه الي شاقه الويه حتى فرحتها انعكست عليه و هو استانس من ابتسامتها ؛
نادر : هيه جي خليج مبتسمه دوم ، تدرين ان ابتسامتج احلا ابتسامه شفتها في حياتي
سلمى : صدق ؟
نادر : هي والله اني صادق و لو ادري ان نفسيتج جي بتتغير بسرعه جان من زمان حبيتج
سلمى : خلاص عاد
( مسك نادر ويها و باس خدها قوي )
سلمى و هي ويها معفوص: بس بس يعور
نادر : ما شبعت
سلمى : انزين خلاص الناس بتشوفنا
نادر : مخفي ما يقدرون يشوفون
سلمى : ماشاءالله بتتخالف
نادر : عمي زايد
سلمى : يعني اونه ابوي صاير واسطه
نادر : من يومه واسطه
* * *
وصل الكولد ايي خذوه و راحوا يشلون البنات ، طبعاً شما ما تبا ترجع البيت على طول تبا يحوطبهن شوي لكن نادر ما طاع و قال انه على طول بيردهن البيت ؛
سلمى : ابا اسكريم فانيلا مال الدكان
نادر : من عيوني
ريم : والله ؟
نادر : خلصنا من شميم و بدت ريم
ريم : خير هي تقول لها من عيوني و نحن على طول البيت
نادر : انتي هب سلمى
شما : ليش ان شاء الله و سلمى كل طلباتها اوامر
نادر : هيه سلمى كل شي تباه يصير
عليا بنت ساري : نادر نحن ودنا بيت يدي حمد
نادر : يعني ما بتنزلون المزرعه ؟
الكل : لا
نادر : اوك
* * *
وقف نادر عند الدكان و نازل لك اها كيس متروس اسكريم حقها ، ياها لين دريشتها ، فتحت سلمى الدريشه و عطاها كيس الاسكريم و قال ( ها كله لج ما تعطين حد منه ) ، و رد دخل الدكان و طلع ركب سيارته ، و صلوا للمحضر و نزلوا بيت يدهم حمد ( بو مايد ) ، لقوه في العريش قاعده ، كانت قاعده شما مجابل الباب و تقدر تشوف الحوش كله ، نزلت سلمى و راحت فوق عند امها و خذت مرهم و نزلت ، كانت واقفه سلمى عند الباب و نادر لاف صوبها ، يعني شما بس اقدر اشوف سلمى و نادر من ورا بس ما تقدر تشوف شو يسوون ، رفع نادر كندورته و كانت المره الاولى الي تشوف فيها سلمى ريله ؛
سلمى : نادر ليش مارحت المستشفى
نادر : ما فيني على التحقيق
سلمى : بس الكدمه قويه
نادر : ادري المرهم مايقصر
* * *
ساجت ريله بالمرهم و هي تسمي بسم الله ،. هو يتألم لكن ماسك نفسه ، خلصت و نزل كندورته ، حضنها و تشكرها سكر الباب بيحرك لكن رجع و هرن عشان ترجع له سلمى و باس خدها ؛
شما : باسها
حمد ( بو مايد ) : منو ؟
شما : في المسلسل
ياسر : اي مسلسل
شما : ها قاعده استرجع احداث المسلسل و احلل
ياسر : هيه الحمدالله و الشكر
* * *
وقف نادر سيارته قدام الميلس و دخل عريش بيت يده حمد ( بو مايد ) ؛
حمد ( بو مايد ) : ها علومك ؟
نادر : والله طيبه
حمد ( بو مايد ) : شو صار عليها ريلك
نادر : والله على حالها
حمد ( بو مايد ) : و رايح مرعب
نادر و هو يشوف البنات : شو اسوي
( دخلت سلمى و سلمة على يدها و سحبها قعدها عداله )
حمد ( بو مايد ) : انتي رحتي معاهن مرعب
سلمى : هيه
حمد ( بو مايد ) : هب مخليتنه روحه ادري بج
سلمى : والله هو الي دق يباني اروح معاه ولا انا مادريتبهم
شما : يدي الحين صدق نادر و سلمى مخطوبين ؟
حمد ( بو مايد ) : هيه صدق ، ليش ؟
شما : لا ماشي
* * *
<< يتبع >>
شو رايكم بـ الي صار ؟ ، و شو توقعاتكم بـ الي بيصير في البارتات اليايه ؟ ؟ 🤔❤️🔥
* * *
(١) https://on.soundcloud.com/K7FaC2QWRMyZz3UL7
(٢) https://on.soundcloud.com/nqFZae8TxptKeeD97
