بعد الاستعراض نادا هزاع ( بو حصه ) مايد و هزاع لان عمه عبيد ( بو ساره ) يبا يجتمع معاهم ، ( هزاع ، حبيبي ) ( مستحيل اتوهم ، هي هي حصة القلب ) ، التفت لها بلهفه اول مايت عينه في عينها نزل راسه و خذ نفس عميق ( اصعب نفس خذه في حياته ) ؛
هزاع ( بو حصه ) : هزاع تترياك في المكتب
هزاع : ياي بس بشوف الوالده
* * *
عطاها ظهره و اتجه لـ مكتب عمه عبيد ( بو ساره ) ، كان يقول في خاطره ( عقب كل هالسنين نرجع نلتقي ؟ و تطلع مسميه ولدها هزاع معقوله مسماي عليه ؟ ) ، و حصه ( ام هزاع ) كانت طول الوقت تفكر ( مسمي بنته حصه علي ؟ ما نساني طول هالسنين ؟ مستحيل ينساني اصلاً دام بنته حصه ) .
* * *
( بعد مرور يومين )
تحسنت صحة سلمى و نقلوها من العنايه لـ غرفه عاديه و سمحوا الزياره ، للحين زايد و شمسه ما يدرون عن اي شي صار محد قدر يقول لهم ، دخل مايد و بعد ما تطمن على سلمى و تأكد انها بخير طلع و راح للمستشفى الي شمسه فيه و بلغهم ان سلمى مرقده و الحين هي بخير ، على طول قام زايد و راح يطمن عليها ، دخل زايد عليهم الغرفه و كان الدكتور موجود و ياسر و نادر ؛
زايد : الحمدالله على السلامه يا قلب ابوج
سلمى : الله يسلمك
زايد : دكتور شو فيها ؟
الدكتور : انت ابوها ؟
زايد : هيه ابوها شو فيها سلمى ؟
ياسر : دكتور طمنه عليها
الدكتور : بنت اجتها سكته قلبيه و لكن عدت على خير
زايد : شو السبب ؟
الدكتور : انا جاي اسألها شو صار معاها
زايد : باباه سلمى شو صار لج ؟
سلمى : اذكر اني غفيت في الحديقه و حسيت بشي قدام ويهي و اول ما فتحت عيني شفت قطوه حاطه ويها في ويهي ، و قطوه سوده بعد
الدكتور : هادي ردة فعل للي شافته
زايد : انزين طمني عليها
الدكتور : هي بخير و سكرها بخير
زايد : قلبها ؟
الدكتور : والله العظيم قلبها بخير تطمن
زايد : مشكور
* * *
دقت شمسه على زايد فيديو كول عشان تشوف سلمى و تطمن عليها و تتأكد انها بخير و بندت ؛
سلمى : بابا انا بخير ، ارجع عند ماما
زايد : معليه
سلمى : ماما تحتاجك الحين اكثر مني
زايد : شو ما تبيني ؟
سلمى : لا ما اقصد جي بس ماما اهم الحين
* * *
قام زايد بيطلع : منو هني بيقعد ؟
نادر : انا موجود
زايد : طمني عليها و اذا صار اي شي دق
نادر : ان شاء الله
زايد : نادر ما اوصيك عليها
طبطب ياسر على كتف نادر : لا توصي حريص
زايد : تراها نظر العيون
* * *
طلع زايد و بعد عشر دقايق طلع ياسر ، على الساعه 9 الليل وقت انتهاء موعد الزياره دخل فارس الغرفه ؛
فارس يصفق: ما شاء الله و لين متى ان شاء الله قاعد ؟
سلمى : فارس
فارس يلوح بكفه : خلص وقت الزياره
سلمى : نادر بيبات عندي
فارس : لا والله على كيفج
سلمى : انت اخر شخص يبات عندي
فارس : تفضل اطلع
نادر : عمي موصيني عليها
فارس : اوك ، قول حق عمك سلمت الوصيه حق فارس
سلمى : نادر لا تطلع ، لا تخليني معاه
نادر : لا تخافين هب طالع
فارس : انا خايف من ثالثكم
سلمى : تشوف يني ؟
فارس : لا شيطان
سلمى : الشيطان ثالثنا
فارس : شو تقصدين ؟
سلمى : انت فاهم شو اقصد ، نادر امانه لا تخليني معاه
* * *
كان مستغرب نادر من خوف سلمى من فارس ، غرم كلام فارس و صوته العالي كان نادر ماسك نفسه و ساكت بس يوصل فارس لمد اليد هني ما قدر يسكت نادر و مسكه ضربه ضرب و طلعه من الغرفه و قفل الباب ، ين فارس كيف نادر يمد يده و يضربه ضرب ، دق فارس على الشرطه و بلغ على نادر ، و خذوهم لـ مركز الشرطه و استدعوا زايد و زايد جبر فارس انه يتنازل ، بس مثل كل مره يتذكر زايد ان فارس يتيم و يطوف له مثل كل مره بدون عقاب ولا حتى عتاب ، بس هالمره منعه من البيت لمدة اسبوع و قاله يروح بيت راشد .
* * *
نادر : سلمى
سلمى ( تتثاوب ) : لبيه ؟
نادر : شو بترقدين ؟
سلمى : يمكن ارقد فجأه
نادر: بسج رقاد كم هو
سلمى : معليك مصحصحه
نادر : ليش خايفه من فارس
سلمى : صاير هب صاحي
نادر : شو تقصدين ؟
سلمى : لا مستحيل يشرب
نادر : مادري عنج
سلمى : بقول يغار على اخته بس بعد هب جي يعني
نادر : شو تبين توصلين له ؟ يحبج ؟
سلمى : اكيد تراه اخوي
نادر : لا اقصد يحبج حب
سلمى : لا مستحيل هو فاهم انه اخوي و امي و ابوي يثقون فيه
نادر : عيل ؟
سلمى : يمكن يكرهك ؟
نادر : ما سويت له شي
سلمى : بس بعد ما تعرفت عليك ابتعدنا شوي
نادر : انتوا تتياوزون انا شو يخصني
سلمى : انت الي ماخذ قلب اخته
* * *
عدت الليله على خير ، في اليوم الي بعده الساعه قريب الوحده ظهر دقت سلمى على فارس عشان ابيها تبا تكلمه تفهم منه ليش جي يعامل نادر ، بعد ساعه من اتصالها له ياها ، تكلموا و تفاهموا و اعترفت سلمى انها تغيرت بعد ما دخل نادر حياتها و وعدته انها ترجع سلمى الاخت المثاليه لـ فارس .
* * *
حست شيخه فجأه بهبوط و لوعه و هي نازله من الدري وقفت و يليت على الدري ، كان عمها خليفه ( بو هزاع ) قاعد في الصاله ؛
خليفه ( بو هزاع ) : سلامه ،،، شيخه
شيخه : هلا عميه
خليفه ( بو هزاع ) : فيج شي ؟
شيخه : لا بس احس بهبوط عشان جي يلست
* * *
قام خليفه ( بو هزاع ) و راح يشوفها ، سندها بو هزاع عليه و وداها للغرفه ، طلع عباتها و شيلتها و سندها على كتفه و نزلوا عشان يوديها المستشفى ، وصلوا للمستشفى نزلوا في الطواري و حولوهم الطواري حق دكتورة نسائيه و اول شي طلبته منهم انهم بيسوون حق شيخه فحص حمل ، طلعت شيخه خمس دقايق و رجعت بعدها دخلت الممرضه و عطت الدكتوره ظرف ، سلمته الدكتوره لـ شيخه فتحته و قرته ؛
خليفه ( بو هزاع ) : بشري
شيخه : الحمدالله حامل
خليفه ( بو هزاع ) : عيل بنبشر أحمد بيطير من الفرحه
* * *
بعد ما كتبت لها الدكتوره الفيتامينات الي بتحتاجها خذت الوصفه منها و طلعوا ، في طريقهم للبيت دق خليفه ( بو هزاع ) على ولده أحمد و حطه سبيكر ؛
خليفه ( بو هزاع ) : عندي لك بشاره بكم تباها ؟
أحمد : صوتك و فرحتك تقول انها تسوى
خليفه ( بو هزاع ) : صدقني انها تسوى ملايين
أحمد : عاد هالملايين هب في ايدي
خليفه ( بو هزاع ) : انت وين ؟
أحمد : والله للحين في الدوام
خليفه ( بو هزاع ) : هيه انا راجع البيت مع شيخه
أحمد ( باستغراب ) : مع شيخه ؟ ، بس ما قالت لي انها بتطلع
خليفه ( بو هزاع ) : كل شي صار سرعه سرعه و انا الي وديتها المستشفى
أحمد ( بخوف ) : عسى ماشر
خليفه ( بو هزاع ) : كل خير ، شيخه حامل يا أحمد
أحمد : صادق ولا مقلب ؟
شيخه : صادق صادق
أحمد ( بفرحه هب شايعه الدنيا ) : الحمدالله الحمدالله مبروك يا بعد عمري يا شيخة القلب
شيخه ( برضى و ابتسامه تجبر الخاطر ) : الحمدالله ، مبروك لك
أحمد : الحين بطلع من الدوام
* * *
كانوا هل البيت ( بيت خليفه بو هزاع ) قاعدين في الصاله ، دخل أحمد متلهف و هو يقول ( وينها ) و على طول ركض فوق و ابوه يناديه ( تعال تعال ، هني شيخه تحت ) ، نزل و ضم شيخه بقوه و الباقي يشوفون باستغراب و صمت إلا خليفه ( بو هزاع ) يضحك ؛
فيصل : انزين محد بيقول لنا شو صاير ؟
أحمد : ربي بيرزقني بـ بيبي
هزاع : تستاهل تستاهل
سلامه : مبروك
أحمد : تستاهل الطيب و الله يبارك لج
فيصل : شيخه انتي وعدتيني
شيخه : معليك انا عند الوعد
أحمد : بتسمين فيصل عيل ؟
شيخه : ان شاء الله اذا كان ولد بسميه فيصل
خليفه ( بو هزاع ) : عيل خليفه ما تبينه ؟
شيخه : خليفه ان شاء الله اخر العنقود عشان الدلع كله يكون له
هزاع : هيييهه و هزاع ؟
أحمد : و انا بقعد اسمي عليكم ؟
شيخه : و ليش لا ان شاء الله بنسمي هزاع
خليفه ( بو هزاع ) : فرضاً كانت بنت
أحمد ( يمزح ) : ما نبا بنات
شيخه : لا تقول جي اللي ايي من الله حياه الله
* * *
<< يتبع >>
شو توقعاتكم للبارتات اليايه ؟ ؟ شو بين فارس و نادر ؟ ؟ و تتوقعون في بطن شيخه ؟ ؟ و هزاع بيرجع قلبه يدق من اول و يديد ؟ ؟
