بو أمل : يا مرحبا منو الريال ؟
راشد أحمد : انا راشد أحمد
بو أمل ( باندهاش ) : راشد احمد ، راشد احمد ؟
راشد أحمد : هي نعم
بو أمل : وييين هالغيبه ؟
راشد أحمد : والله ما ادري شو اقول
بو أمل : تذكرني ولا ما تذكرني ؟
راشد أحمد : بصراحه انا ما اذكرك لكن عمتي دايماً تطريك
بو أمل : كم صار عمرك ؟
راشد أحمد : توني داخل واحد و عشرين سنه
بو أمل : وايد كبرتني
راشد أحمد : شو نسوي الواحد متزوج و هو صغير على طول بعد الثانويه
* * *
استأذن راشد منه و راح للسياره قال حق فارس يودي روضه و لان فارس سيارته ما فيها بترول راحوا بـ سيارة راشد ، اما راشد و راشد أحمد دخلوا البيت يسولفون ؛
راشد أحمد : ما شاء الله هذا ولدك ؟
بو أمل : هيه ولدي الي مايبته
راشد أحمد : الطب تطور
بو أمل : هيه الحمدالله بعد صبر سنين ربي رزقني بـ أمل
راشد أحمد : ربي يخليها لك
بو أمل : امين يارب ، إلا علومك ؟ اخبارك ؟ شو الدنيا معاك ؟
راشد أحمد : والله يا ابوي
بو أمل : اشهد انك بحسبة ولدي و غلاك من غلا فارس و أمل
راشد أحمد : دقوا اي البنك طالبيني اخلص كم اجراء و رحت انصدمت و اغمى علي و دخلت المستشفى ، من وين لي هالمبلغ ماعرفت اقرا الرقم من الصدمه ، كني فقير و في يوم و ليله صرت اغنى انسان في العالم
بو أمل ( بخوف ) : مصروفكم الشهري ما كان يكفيكم ؟
راشد أحمد : لا والله كان يكفي و زياده
بو أمل : الحمدالله ، والله اسمح لي كنت لاهي عنك طول هالسنين
راشد أحمد : والله ادري ان عمتي السبب
بو أمل : الحمدالله كبرت و صرت تقدر تزورني
راشد أحمد : صار شوري في راسي
بو أمل : هي والله ، شو الدراسه معاك ؟
راشد أحمد : والله للحين ما دخلت جامعه
بو أمل : زين عيل يسجلك مع فارس
راشد أحمد : لا و انا الفلوس الي عندي شو بسوي بها ؟
بو أمل : خلهم في جيبك
راشد أحمد : والله ما ادري كيف اشكرك
بو أمل : انت واحد مني و فيني و كل شي يرخص لك
راشد أحمد : كيف اقدر ارد لك هالجميل
بو أمل : لولا رب العالمين و شور روضه ما كنت سويت شي و كل الفضل يرجع لـ بو خليفه الله يرحمه
راشد أحمد : اذكره يدي سالم كان يقولي انا يدك الكبير الله يرحمه
* * *
بعد الغدا كالعاده تدخل فطيم و تجلب الجو ، لكن هالمره صدمتهم ببطنها ، و الكل مستغرب كيف حملت و هم من فتره قصيره شايفينها بدون بطن ؛
ساره : فطيم في اي شهر ؟
فطيم : داخله السادس
ساره : لا حاطه بطن امازون
فطيم : حلفي انتي بس
شيخه : تعالي بندخل الحمام بشوف بطنج صدق ولا
فطيم : لا عادي بفتح قدامكم و برويكم
مطر : استغفر الله
فطيم : والله ما ادري عنكم يعني انا يايه امقلبكم ؟
شيخه : لا بس ابا اطمن
* * *
قامت فطيم و سحبت شيخه و سلامه و دخلتهم الحمام ترويهم بطنها و طلعت صدق حامل ، هب حاطه بطن امازون ؛
شيخه ( باندهاش ) : صدق حامل
فطيم : اصلاً حتى يوم حملت بـ مكتوم دريتوا ؟ لا ؟
روضه : صح ما يبين عليج
ام خليفه : مثلج
روضه : لا انا كان مبين علي و مبين من ويهي اني حامل
ام خليفه : انا اقصد البطن
زايد : يعني قلة السوالف الحين
فطيم : صادق ، علومك زايد ؟ و القلب معاك ؟
زايد : يسرج حاله قلبيه
فطيم : الحمدالله اموره طيبه عيل
زايد : عالي العال
فطيم : هيه زين طمنتني
شمسه : الي يقول ما تباتين الليل من كثر ما تفكرين فيه
فطيم : شو فيج نتطمن عليه
* * *
كتب نادر حق سلمى تطلع له لانه عازمها على شاي ، طلعت سلمى و طلعت معاها شما ؛
سلمى : خير شما ؟
شما : حسيت انج بتروحين مكان
سلمى : و انتي عازمه نفسج غصب ؟
شما : هيه
سلمى : الحمدالله و الشكر
* * *
رجعت شما داخل و يلست عدال يدها حمد ( بو مايد ) ، طبعاً قالت له ان نادر بيطلع مع سلمى و ما طاع يركبها السياره ، و طلبت منه يدق على نادر و يخليه يشل البنات كلهن ، دق حمد ( بو مايد ) على نادر مرتين و كانت سلمى تسكر و رد دق عليها و سكرت ؛
نادر : شو فيج خليني ارد عليه يمكن يباني في شي مهم
سلمى : هذي شموه محد غيرها
نادر : يمكن يدي
سلمى : اوك داق يباك ترجع تشل الشيخه شما
نادر : بشوف ليش داق
سلمى : زين حطه سبيكر
نادر : زين
* * *
حمد ( بو مايد ) : ليش تبند في ويهي ؟
سلمى : انا الي بندته
حمد ( بو مايد ) : زين ارجع و شل البنات
نادر : انا عازم سلمى بس
حمد ( بو مايد ) : زين بنحول لك
نادر : الموضوع هب موضوع فلوس ، بس ابا اطلع مع سلمى اغير جو
حمد ( بو مايد ) حق شما : شو اسوي به ما يباكن
شما : خله يرد غصب
نادر : هب راد ، شي في خاطرك يدي ؟
حمد ( بو مايد ) : لا سلامتك
( سكر )
سلمى : اكرهها كثر كرهم لـ بنات بو يابر
نادر : منو بنات بو يابر ؟
سلمى : ما اعرفهن بس اسمع عنهن
نادر : بنزلج البيت لبسي عباتج و تعالي
سلمى : وين بنسير ؟
نادر : ما ادري اي مكان تبينه
سلمى : لا تقول جي بتفلس
نادر : حلالي حلالج
* * *
الساعه 10 رجع فارس البيت بدري ، دخل غرفته تسبح و بعدها راح غرفة السوني و يلس يلعب لين الساعه 12 و للحين راشد و روضه ما رجعوا ، انتبه للساعه و رجع غرفته انسدح على السرير شغل التلفزيون و حط له فلم و فتح تيك توك من فيديو لـ فيديو ، بعد نص ساعه دخلت روضه ؛
روضه : ما شاء الله ما توقعت انك موجود
فارس : قلتي لي لا تتأخر
روضه : تشوف الفلم ولا تيك توك ؟
فارس : ما اندمجت
روضه : زيين بروح ببدل و بييك ، ولا فيك رقاد ؟
فارس : لا ويكند سهره
روضه : زين
* * *
بدلت روضه و حطت أمل عند راشد و راحت تسهر عند فارس ، فتحت الفراش و و يلست عداله ؛
روضه : عطني مخدتك بحطها ورا ظهريه
فارس و هو يعطيها المخده : شكله موضوع موضوع
روضه : انزيين انا الحين يايه ابا اعرف شو السبب الحقيقي الي ورا سحبك للاوراق من الجامعه
فارس : شو تبيني اقول ؟
روضه : ما اعرف انا هني عشان اسمعك
فارس : ما عندي شي اقوله
روضه : يعني هب السبب الحقيقي وحده
التفت فارس يشوفها : وحده ؟
روضه : هي نعم
فارس : لا ماله دخل
روضه : فارس عادي تكلم
فارس : انزين شو اقول ؟
روضه : هيييه و MKS
فارس ( بعصبيه ) : سلمى قالت لج ، صح ؟
روضه : لا والله يعني تحراني ما ادري عنك و ما كنت اشوفك و انت ترمسها
فارس : خلاص نسيتها
روضه : ما نسيتها انت قاعد تتناسى
فارس : في الحالتين ما ادري عنها و اخر همي
روضه : هييه يوم انك تخطيتها المفروض تتعايش في الجامعه
فارس ( باندفاع ) : اوك احبها و احاول انساها و ما اقدر ، ما ابلع الجامعه اني اشوفها كل ثانيه مع اني ما قد شفتها
* * *
<< يتبع >>
شو توقعاتكم للبارت الياي ؟ ؟ 🤔❤️🔥
