انصدم احمد من الي قاله هزاع و ما عرف يرد عليه ، حط يديه على فمه بعدها على اذنيه و رفع يديه كأنه يقول ( ما عندي شي اقوله و كأني ما سمعتك ولا شفتك اليوم ) اكتفى بالصمت و تراجع كم خطوه ورا ، طلع هزاع ورجع للدوام و بعد ما انتهى من دوامه كالعاده راح يتغدى في بيت روضه ؛
هزاع : روضه
روضه : هلا
هزاع : راشد موجود ؟
روضه : لا اليوم مداوم متأخر فيرجع متأخر
هزاع : هي زين ابا ارمسج في موضوع
روضه : خير ان شاء الله ؟
هزاع : تزوجت
روضه ( بصدمه ) : شو ؟
هزاع : تزوجت
روضه : مقلب صح ؟
هزاع : لا والله
روضه : و منو هاي الي خذتها على سلامه
هزاع : حب حياتي
روضه : شو ؟ حب حياتك ؟ من متى تحب ؟
هزاع : السر الي محد يعرفه غير زايد
روضه : هزاع كيف تتزوج بدون ما تاخذ وقت تفكر فيه و انت تعرف كيف الكل بيوقف ضدك
هزاع : خذت وقتي في التفكير و هذا كان قراري
روضه : كيف قدرت تسويها ؟ سلامه هب مقصره فيك
هزاع : ادري و الله الشاهد اني انا بعد هب مقصر فيها ، بس خاطري في غيرها
روضه ( باستهزاء ) : خاطرك في وحده شافها غيرك ؟
هزاع : ماله دخل
روضه : انزين شو متوقع مني اقول او اسوي ؟
هزاع : ماشي والله
روضه : انت تعرف ان ابوي ممكن يتبرا منك
هزاع : هي اعرف و ما بيدري بشي
* * *
( نرجع للحاضر )
دق فارس على نادر و قاله ابي المستشفى بسرعه و اذا يا و يديه فاضيه ياويله ، مافهم نادر بس راح و خذ ورد و كتب على البطاقه ( الحمدالله على السلامه ) ، وصل المستشفى و كان فارس يترياه تحت ؛
نادر : عسى ما شر منو مرقد ؟
فارس : سلمى
نادر ( بخوف ) : ليش شو فيها ؟
فارس : السكر مرتفع عندها ، شوف انا بحترم عمريه لان نحن في مكان ولا او نحن في البيت كان لي تصرف ثاني مكان
نادر : انا مسوي شي ؟
فارس : يمكن شايف لك شوفه ثانيه و انا ما ادري
نادر : حشى عليه
* * *
( الميلس الخارجي )
كان قاعده ام خليفه و عيالها عندها ، بين سوالف و ضحك ؛
ام خليفه : وييي نسيت اقولكم
عبيد ( بو ساره ) : نسمعج
ام خليفه : انا حجزت سويسرا و طيارتيه الاسبوع الياي
خليفه ( بو هزاع ) : عيل انا بحجز معاج
ام خليفه : انتوا كلكم ما عندكم دوامات احجزوا معايه
: خلاص تم
سعيد ( بو مطر ) : منو بيروح يخطب معانا ؟
خليفه ( بو هزاع ) : انا بروح معاكم
حمد ( بو مايد ) : انا بعد بروح معاكم
سعيد ( بو مطر ) : خلاص بعد صلاة المغرب بنطلع
* * *
طلعوا من المسيد بعد الصلاه و تحركوا في سيارتين الي ركب مع مطر و الي ركب مع سالم ، كان مطر وايد متوتر و واضح عليه و سالم عداله و يحاول ينبهه انه متوتر و يخفف من توتره لكن مافي شي يخفف التوتر ، فتح بو مطر الموضوع على طول ما طول في المقدمات و طلب ابو شما منهم ينتظرون الرد لان بيسألون عن مطر اول و هني توتر مطر اكثر غض شفايفه و قعد يشوف سالم و هو مبقق عيونه خطر على عيونه يطلعن من مكانهن ، استأذنوا و طلعوا ؛
حمد ( بو مايد ) : مطر شو فيك طول الوقت مسطلب و متوتر
سالم ( يضحك ) : كنه مسطره
مطر : انزين الحين شو بيصير ؟
سعيد ( بو مطر ) : متروع شو ؟
مطر : لا اصلاً عادي
سالم : انت بس ادعي ربك تكون سمعتك زينه
مطر : يعني ترا كل الشباب راعيين بنات و مغازل
سالم ( يسلك له ) : صح صح
* * *
فتحت عيونها سلمى و لقت نادر حاط الكرسي و يده على خده و ساند يده على السرير و لابس سماعات مندمج يشوف التلفون ، حركت يدها و من كثر الاندماج ما حس بالحركه بس يوم مسكت ايده استوعب انها قامت ، فارس منسدح على الكرسي بس ما انتبهت له ؛
نادر : قمتي ؟
( ابتسمت له )
نادر : الحمدالله على السلامه
سلمى : الله يسلمك
نادر : شو صار ؟
سلمى : ما صار شي ، بس فارس خاف يوم ارتفع السكر
نادر : صدقه هب زين عليج ، شو كنتي ما كله
سلمى : ما كلت شي يرفع السكر
فارس : منو بيذبح ختيه غيرك ؟
سلمى : فارس
فارس : و انا صادق
نادر : ليش انا شو مسوي ؟
فارس : ليش معاملتك تغيرت و صاير تتجاهلها
نادر : ما تغير شي ، كنت شوي مشتت
فارس : مشتت ولا ادركت انك استعيلت ؟
نادر : ما يخص
* * *
( بيت بو هزاع )
الساعه 10 الصبح ، كان بو هزاع قاعد و معاه سلامه و شيخه ، دخلت فطيم دخول مفاجئ و قوي ؛
فطيم ( بصوت عالي ) : السلام عليكم يا اهل البيت
خليفه ( بو هزاع ) : والله نسمعج ماله داعي الصوت العالي
فطيم : تولهت عليكم
العنود وهي طالعه من المطبخ و صينية القهوه في يديها : انتي الي قاطعه
قامت سلامه تشل الصينيه عن عمتها : هاتي عنج عمتيه
فطيم : والله اشغال يعني
خليفه ( بو هزاع ) : عاد شو هالاشغال
فطيم : ابويه ليش سميتني فطيم ؟
خليفه ( بو هزاع ) : بدون سبب
فطيم : يعني ليش هي اليازيه ؟ احسه يجنن
العنود ( ام هزاع ) : شدي حيلج و ييبي اليازيه
فطيم : لا حشى و اخرب جسمي ؟
العنود ( ام هزاع ) : من زينه الجسم يوم انتي ميته عظم
شيخه : حرام عليج عمتيه حلو جسمها
فطيم : غيرانه لاني اضعف عنها
العنود ( ام هزاع ) : على الاقل عندي جسم و مخصره هب مثلج
( خليفه يشوف الاخبار على الانستا و يسمعهن و يضحك عليهن )
فطيم : اهم شي اني حلوه في عيون حامد
العنود ( ام هزاع ) : انزين و انا خلوه في عيون ابوج
( بو هزاع هب معاهم اضطرت انها تدوس ريله عشان ينتبه )
خليفه ( بو هزاع ) : ها ؟ صح صح
( قامت فطيم و يبست عدال شيخه و سلامه )
فطيم ( تنغز لامها ) : شحالكن ياربكن بخير و مرتاحات ولا في حد يزعجكم
العنود ( ام هزاع ) : الي يسمعج يقول اني نسره
سلامه : بالعاني جي تقول
فطيم : عيل بيبي فيصل وين ؟
شيخه : راقد
( قامت ام هزاع و راحت المطبخ تشوف خدامتها شو بتسوي حق الغدا و بعد عشر دقايق طلعت لقت الصاله فاضيه ) اول ما قامت ام هزاع ؛
خليفه ( بو هزاع ) : بنات شو رايكن نطلع نتقهوى
شيخه : بنات ؟
خليفه ( بو هزاع ) : هيه بنات تراكن صغار يا زينكن
فطيم : يلا بنمر على رويض بنشلها و بنروح نتقهوى
شيخه : فيصل راقد
خليفه ( بو هزاع ) : هو في الغرفه الي تحت صح ؟
شيخه : هيه
خليفه ( بو هزاع ) : معليه العنود بتسمعه اذا قام ، قومت اركبن قبل لا تشوفنا العنود
فطيم : ليش ما تبانا اميه ادري
خليفه ( بو هزاع ) : بنطلع طلعه شبابيه
* * *
وصلوا بيت روضه و دقوا لها عشان تطلع ، تحججت بأمل و ان محد معاها و راشد ما يحب يخليها عند الخدم ، انتبهت فطيم ان سيارة فارس في القراج و قالت حق شيخه تكلمه ، رن تلفون فارس و استانس انه ( شيخه ) داقه عليه هب بالعاده و لكن بعد المكالمه انصدم ؛
شيخه : هلا ، اخبارك ؟
فارس : الحمدالله
شيخه : وينك ؟
فارس : في البيت ، ليش ؟
شيخه : انزين انزل شل أمل من روضه و خل روضه تطلع لنا نحن برا مع عميه
فارس : زين
* * *
<< يتبع >>
شو توقعاتكم للبارت الياي ؟ ؟ كنتم متوقعين ان هزاع يسويها و يتزوج حصه ؟ و أحمد و روضه تحسون بيسون شي ولا بيسكتون ولا مأتمه يعرفون شي ؟ ؟ و نادر صدق متشتت ولا وراه شي ؟ ؟ و فطيم بترجع للساحه و بتم مختفيهم تطلع فجأه ؟ ؟ تحسون اذا الكل عرف بسفرة ام خليفه الكل بيحجز و بيلحقها ؟ ؟ و فارس شو كان متوقع من اتصال شيخه ؟ ؟ 🤔❤️🔥❤️🔥
