الساعه 9:30 الصبح دخل فارس و يايب معاه ريوق و مشروب سلمى المفضل من ستاربكس ؛
سلمى : الايس تيي الي احبه ، كيف عرفت الطلب بالضبط ؟
فارس : بعد
سلمى : ما شاء الله حافظ
فارس : اذا ما حفظت مشروبج المفضل بحفظ مشروب منو ؟
سلمى : مشروب MK
شوي و عيونه تطلع من محلهن : شو ؟
سلمى : MKS
فارس : شو دراج فيها ؟
سلمى : اعرف كل شي يخصك
فارس : سلمى كيف تعرفينها
سلمى : شافتني سناب
فارس : ما شاء الله و قالت لج ؟
سلمى : لا بس نفس بتموجي الي دوم ترمسها
فارس : ما شاء الله و عيونج على تلفوني
سلمى : اكييد ، تتصور لك ؟
فارس : لا ماقد شفتها
سلمى : كذاب
فارس : والله العظيم ماقد شفتها
سلمى : كيف دوم تتصور و تحط صورها ستوري و بعدين احس كيف تحبها بدون ما تشوفها
فارس : مادري
سلمى : يعني اونه حب شريف
فارس : ما ادري شو بيصير في المستقبل و كيف اشوف شي هب حلالي
سلمى : تحبها ؟ تبا تتزوجها ؟ ولا تتسلى ؟
فارس : هيه احبها و اباها
سلمى : شرايك اتعرف عليها ؟
فارس : تعرفي
سلمى : بس تراهم open minded بزياده
فارس : اونه
سلمى : والله مال قوم بكيني و حفلات و جي
فارس : مستحيل
سلمى : والله
فارس : احسج تتكلمين عن وحده ثانيه
* * *
فتحت سلمى سناب و روته يوزر البنت و انصدم انها هي ما كان عنده اي رد و لزم الصمت ،،، دخلت شيخه بيت ابوها بتبشر امها و ابوها بـ حمالها ، للأسف كانت تتوقع ردة فعل و صار عكس توقعها ؛
عبيد ( بو ساره ) : انا قلت شيخه مشت ورا قلبها و مردها بترد لـ عقلها
شيخه : و انا قلت امي و ابوي اكثر من بيفرح لي
عبيد ( بو ساره ) : هب كنج تسرعتي
شيخه : مافي شي بيخلي أحمد يتحسن اكثر و مايرجع للماضي إلا العيال
عبيد ( بو ساره ) : شو هالثقه ؟ ؟
شيخه : ابويه الريال بيلهى بـ عياله ما بيكون عنده وقت يفكر بـ شي ثاني
عوشه ( ام ساره ) : صح عليج يا شيخه
عبيد ( بو ساره ) : لا تيننيني انتي الثانيه
شيخه : ابويه انا بتحمل مسؤولية اي شي بيصير
عبيد ( بو ساره ) : زين عيل عقب هب تييني تصيحين
شيخه : بس يكفي انه اعترف بـ غلطته
* * *
ما قدرت شيخه تتحمل اكثر من جي طلعت و هي متضايقه كأنها شاله هم الدنيا على راسها ، دق على أحمد و قالت له اييها ضروري ، ترك احمد كل شي في اييده و ياها ، ركبت معاه في السياره و قالت له أنها تبا تروح البحر ، راح تحت اقرب جسر عندهم و نزلت شيخه تتنس شوي ، ما حب أحمد يسألها عن شي يباها تاخذ راحتها و متى ما تبا تفتح له قلبها و تتكلم تتكلم بروحها ، فتح احمد الدرايش و مسك تلفونه لين شوي ، سمع صوت ونين سرعان ما استوعب ان شيخه تصيح ، نزل أحمد و قعد عدالها حط راسها على كتفه و ضمها على صدره ؛
أحمد : حبيبتي شو فيها ؟ منو مضايقها ؟
شيخه : أحمد
أحمد : لبيه يا عيونه و قلب أحمد
شيخه : تحبني ؟
أحمد : هذا سوأل ؟ اذا ما احبج انتي احب منو ؟
شيخه : بتبقى لي ؟
أحمد : اذا ما ابقى لج ببقى لـ منو ؟
شيخه : أحمد ابوي ما استانس لي
أحمد : ليش ؟
شيخه : و يتحداني انج ما ترجع نفس قبل
أحمد وهو يحاول يلطف الجو : اقبلي التحدي و انا بثبت له
شيخه : ترا صدق اتكلم ابوي هب راضي اساساً اني رجعت لك
أحمد : شيخه انا من يوم ما وعدتج غلطت في شي ؟
شيخه : لا والله
أحمد : هذا هب كافي له ؟
شيخه : احس اني مخنوقه
أحمد : صارخي طلعي الي في قلبج صيحي عادي ما فيها شي
شيخه : صعب صعب
أحمد : عادي صارخي
* * *
طبعاً عوشه ( ام ساره ) ما قدرت تكلم عبيد ( بو ساره ) عن موضوع شيخه ولا عرفت حتى كيف تفتحه ، كلمت ساره و طرشتها تكلم ابوها عشان يطمنون شيخه ان ابوها راضي عليها ؛
ساره : ابويه
عبيد ( بو ساره ) : نعم
ساره : الحين انت صدق هب راضي على شيخه ؟
عبيد ( بو ساره ) : و منو قاله ؟
ساره : سمعت
عبيد ( بو ساره ) : لا راضي عليها دنيا و اخره بس انا خايف عليها من أحمد
ساره : أحمد الحمدالله تعالج و صار احسن من قبل
عبيد ( بو ساره ) : ادري بس الحرص زين و بعدين هب على طول تحمل منه مفروض تصبر سنه
ساره : بس انت اعرف ان العيال بيخلونه يركد و بيملون عليه دنيته
عبيد ( بو ساره ) : عارف بس انا هب راضي عليه العيله حملت منه و جنها ما هقت ترجع له
ساره : في هالحاله انت المفروض توقف معاها و تساندها و بعدين ما يصير تقول لها عقب لا تيني تصيحين
عبيد ( بو ساره ) : الكلام بس كلا ولا دوم بتلقاني عندها و معاها في كل خطوه تخطيها
ساره : اعرف انك ما اقصد الي قلته و اعرف انك دوم معانا بس ابداً هب حلو الي قلته اها و هي يايه تبشرك بـ حملها المفروض تستانس لها و تعبر لها عن فرحت و انا ادري و هي ادري و كلنا ندري انك مستانس لها
عبيد ( بو ساره ) : عقبالج يارب
ساره : امين
* * *
دخل مطر الميلس و حط جميع الموجودين تحت الامر الواقع و عرفهم على زوجته اللبنانيه ، هل الصمت في الميلس لمدة خمس دقايق ؛
مطر : شفيكم تتحروني امزح ؟
ام خليفه : و سويتها يا مطور
مطر : و انتم عبالك امزح شو ؟
سعيد ( بو مطر ) : هو انت كل يوم عندك راي ، يومين و بتمل و بتطلق
ام خليفه : هي والله كل يومين له رايي
سعيد ( بو مطر ) : انا هب سعيد لو ما مل و طلق
مطر : انزين احترموا وجودها
ام خليفه : اقول خذ الي معاك و اطلع
مطر : افا
ام خليفه : لا افا ولا ابا اسمع شي ثاني
* * *
<< يتبع >>
شو توقعاتكم للبارت الياي ؟ ؟ فارس بيقطع علاقته في حبيبته ولا ؟ ؟ تتوقعون مطر خذ اللبنانيه للتسليه ؟ ؟
