الساعه تسع ونص الصبح ، واعيه سلمى متأخر و فاتتها اول نص ساعه من المحاضره ، نزلت سلمى تركض تحت و لقت امها منسدحه في الصاله و شكلها تعبانه ؛
سلمى : ماماه باباه وين ؟
شمسه : مدري عنه
سلمى : شو ماتدرين ؟
شمسه : تواقعنا و طلع ولا رد من امس
سلمى : عيل منو يايب لي الورد امس ؟
شمسه : الي مزعلج
سلمى : بس محد مزعلني
شمسه : يخي مادري روحي و خليني بروحي
سلمى : ماماه شو فيج ؟
شمسه ( بعصبيه ) : سلمىى
سلمى : ماماه والله شو فيج ؟ انزين روحي المستشفى
شمسه : مافيه
سلمى : اعرف ،امممم فارس ، بدق على فارس يوديج
* * *
فارس : هلاااا سلامي
سلمى : اهلييين ، وين ؟
فارس : والله انتي الي وين ؟ يومين لا تدقين ولا تسألين
سلمى : اترياك عنبوه يومين ماييتنا
فارس : عطيني علومكم و اخباركم على السريع
سلمى : تعال امايه تعبانه و احايل فيها تروح المستشفى و ما تبا
فارس : الحين ياي ، نزلي عباتها
سلمى : زين
* * *
وصل فارس و بالغصب ركبوها السياره ووداها فارس المستشفى ، حاولت سلمى ادق على ابوها اكثر من مره لكنه مارد عليها ، شافت سلمى بيبي شمسه قاعده في الشبك بس العابها و محد موجود عشان توصيه عليها.
* * *
كتبت الدكتوره حق شمسه تاخذ مغذي و طلعت مع فارس و الممرضه ، يلس فارس يسولف على شمسه ساعه و ياه اتصال و طلع ولارد لين ما خلصت شمسه و طلعت بهدوء من الغرفه عشان تسمع منو فارس يكلم هالكثر ، و الظاهر انه كان يكلم بنت و يوم انتبه لامه تعذر على اساس انه يكلم ربيعه و قاله ( برايك انا مع اميه ) ، ابتسمت شمسه بخبث و طلعوا من المستشفى ، في السياره و قد لهم قريب للبيت و طول الطريق ساكتين محد قال اي كلمه ، و قف فارس و لكن شمسه ما نزلت ؛
فارس : ما بتنزلين ؟
شمسه : لا ارقبك ترمس
فارس : شو اقول ؟
شمسه : منو ربيعتك الي او سوري ربيعك الي كنت ترمسه
فارس ( بابتسامه ) : يعني كاشفتني
شمسه : هه ماتقدر تدس شي للأسف
فارس : وحده معاي في الجامعه
شمسه : هيييه
فارس : مابيني و بينها شي إلا هب المشاريع و الدراسه
شمسه : اعرف ما تطلع منك العيبه
* * *
كان خليفه ( بو هزاع ) قاعد في الصاله و أحمد معاه و يسولف له عن الشغل و الامور الي تصير في الشركه و كان وايد يتكلم عن حمدان و تدقيقه في كل صغيره و كبيره ؛
خليفه ( بو هزاع ) : هه يا ريال ما عليك هذا حمدان داهيه
أحمد : بس والله ما شاء الله عليه
خليفه ( بو هزاع ) : هيه ما شاء الله عليه هب بسيط مايمر عليه شي ، كان ملوع بجبد عمامك في الشغل
( دخل فيصل و معاه محمد ، و قام بو هزاع يرحب بمحمد لكن محمد ما عطاه ويه و ركض يلوي على ابوه ) ؛
أحمد : ها باباه شو النرسري اليوم ؟
محمد : perfect
أحمد : هيه جي اباك بطل
محمد : ماما وين ؟
أحمد : ماماه فوق تنوم بيبي فيصل
محمد : I have a gift for her
أحمد : و بابا ؟
محمد : teacher said tomorrow
أحمد : اوك بابا ، روح فوق شوي شوي
* * *
راح محمد و قرب أحمد من فيصل و بصوت حاد قاله ( لا عاد تاخذ محمد من الحضانه و فج شوي ) ، استغرب فيصل من كلام أحمد ، راح احمد فوق و فيصل سوا عمره ماسمع شي و يلس يتقهوى.
* * *
على الساعه ست راح عبيد ( بو ساره ) يستقبل ام خليفه و سيف اخوه في المطار ؛
عبيد ( بو ساره ) : الحمدالله على السلامه و عمره مقبوله
ام خليفه : تقبل الله منا و منكم
سيف ( بو راشد ) : ما تولهتوا على اميه لا اتصالات و ولا شي ؟
عبيد ( بو ساره ) : ماندريبكم متى تفضون عشان اندق ، المفروض انتوا الي تدقون
ام خليفه : لا رحنا شحنا الطاقه و راديلكم بقوه
عبيد ( بو ساره ) : الله يستر علينا
* * *
رن تلفونها برقم هب مسجل عندها ماردت و رد دق مره ثانيه ؛
سلمى : ألو منو معاي ؟
عمر : عمر ولد عمج
سلمى : ويي سوري هب مسجله رقمك
عمر : معليه ، المهم شو العشا ؟
سلمى : والله ما ادري الحين بشوف الطباخ
عمر : لا لا انا بشوفه
سلمى ( تحاول تسكت شمسه ) : تمام تمام
عمر : هاتيها صوبنا
سلمى : لا بتزعجكم
عمر : لا فديتها هاتيها بنسدها عنج انتي ما تعرفيلها
سلمى : لا والله
* * *
حاولت سلمى تسكت شمسه و ماقدرت شلتها و ودتها بيت عيال عمها ، وهي طالعه نزل نادر من صوت صياح شمسه و انتبه ان سلمى طالعه ، على طول طلع وراها ، مسكها و وقفها و وقف وراها بالضبط مد يده و بند الليت الي فوقهم ، قرب منها و حط فمه عند اذنها اليمين غمضت عيونها خوفاً يكون صوته عالي و بصوت وااطي قال لها ( تولهت عليج ) ، شقة الابتسامه ويها و كانت بتكمل طريقها و بترجع البيت بس مسكها من يدها و باسها تحت فكها اليمين ، رجعت البيت و يلست في الصاله مستانسه ، دخل زايد ؛
زايد : سلمى رتبي لي شنطه صغيره بروح قطر
سلمى : ها قطر ؟
زايد و هو رايح لمكتبه : هيه بسرعه مستعيل
* * *
راحت سلمى تركض فوق تخبر امها ، دخلت سلمى غرفة امها و امها كانت توها مخلصه سبوح و طالعه من الحمام لافه الفوطه عليها ، كانت شمسه في اعلى قمم الروقان و كان ما صار اي شي بينها و بين زايد ؛
سلمى : ولا كانه صاير شي
شمسه : و شو بعد صاير ؟
سلمى : ابويه بيروح قطر
شمسه : شو بيروح قطر؟
سلمى : هيييه و مستعيل بعد
شمسه : والله لو يروح نذر هالبيت ماعاد ادخله
سلمى : بدال قعدتج هني انزلي شوفيه
شمسه : وينه ؟
سلمى : في مكتبه
* * *
نزل شمسه تركض لمكتب زايد و دخلت عليه بالفوطه و كان على زايد إلا انه ينصدم منها ؛
شمسه ( بعصبيه و صوت عالي ) : قسم بالله لو تسافر بخلي لك البيت تسرح و تمرح فيه
زايد : شو فيج عندي عرس لازم احضره
شمسه : طرش حد ينوب عنك
زايد : و من متى ما اوصل العالم ؟
شمسه : من اليوم
زايد : هو سوأل انا الريال ولا انتي ؟
شمسه : انا هب مستعده يتكرر هذاك الموقف
زايد : شمسه مافيني عليج ، يوم برد نتفاهم
شمسه : يوم بترد والله ما تشوفني ، و انا ..
صفقت الباب ولا قدرت سلمى تسمع باقي الكلام الي دار بينهم بس في الاخير طلعت شمسه من المكتب و قالت حق سلمى ما اجهز الشنطه لان زايد هب رايح .
* * *
الساعه 11 الضحى ، ( في قروب البنات ) ؛
ساره : بنات تولهت عليكن و على لماتنا
شمسه : صدق يبالها لمه
ساره : حياكم بعد صلاة المغرب في حديقة بيتنا
عاشه : بيت ابوج ؟
ساره : هيه هيه بيت ابويه
فطيم : اسمع في لمه
ساره : هيه انتي ضروري انين تولهت على سوالفج
فطيم : خلاص دام متولهه بكنسل طلعتي مع حامد و بييكم
ساره ( فويس ) : لا لا طلعي مع ريلج لمتنا لاحقه عليها
* * *
شو توقعاتكم للبارت الياي ؟ ؟ شمسه شو فيها تعبت فجأه ؟ ؟ و زايد و شمسه تراضوا ؟ ؟ تحسون ليش أحمد عصب من فيصل ؟ ؟ و شو يقصد يوم قال ( فج شوي ) ؟ ؟ و نادر شو صار فيه ؟ 🤔❤️🔥❤️🔥
