الساعه 12 الليل بعد ما انتهت السهره ، دخلت ام خليفه على سلمى و نادر في الميلس و كانوا زايد و شمسه موجودين ؛
ام خليفه : وين بتباتون ، عندها ولا عندك ؟
زايد : كل واحد في غرفته
ام خليفه : ليش ؟ يحلون على بعض
زايد : لااا
ام خليفه : معليكم منه ترا حلال
سلمى : لا في احلامج
زايد : هذا الي ناقص
سلمى : و تحنين ع راسي ابا اشوف احفاد احفادي
ام خليفه : هيه شو مستوي عليج ، هب تبين العرس ، هذا العرس
زايد : يدتيه الله يهديج هاي ملجه
شمسه : يصير خير لين العرس
زايد : و بعدين ماشي عرس لين ما تخلص الجامعه
* * *
( في صالة بيت بو خليفه )
الساعه 11 الضحى ، كانوا اهل البيت قاعدين في الصاله يتقهوون و الوضع طبيعي ، نزلت الشيخه مع محمد و سلمت على عمها و عمتها و يلست ، توتر هزاع لان فيصل موجود ، قام بشكل سريع ؛
هزاع : فيصل يلا
فيصل : وين ؟
هزاع : قم معليه انت الحين
( طلعوا )
فيصل : شو فيك ؟
هزاع : ماشي
فيصل ( بعصبيه ) : لا في شي
قرب هزاع من فيصل و حط ويهه في ويهه : المفروض ما اكون في اي مكان شيخه تكون فيه ، و استعيل في موضوع الخطوبه
فيصل : انا مابا العرس
هزاع : بتعرس غصباً عنك
فيصل : ترا بنات الناس هب لعبه و بعدين حرام اظلمها معايه
* * *
دخل مايد و هو ماسك ولده محمد بيت ام خليفه و بعده بدقايق دخلت عاشه ، سلموا على ام خليفه و قعدوا ، كانت ام خليفه مشغلوه لابسه نظاراتها و الابره و الخيط في يدها بتسوي مخرافه حق التمر و الرطب ، بعد ما انتهت في الي في يدها شلت سمانها و ودته الغرفه و رجعت لهم ؛
ام خليفه : زين والله يوم ذكرتوا ان عندكم يده
مايد : افا ننسى العالم ولا ننساج
ام خليفه : هيه صحيح
مايد : يدتيه عنديه اجازه اسبوع شو رايج انروح سويسرا نطمن على حلالنا
ام خليفه : زين والله يبالنا سفره نغير فيها النفسيه
مايد : خلاص عيل نحجز على اخر الاسبوع الياي
ام خليفه : توكل على الله و احجز
* * *
( دخل حمدان )
حمدان : زين لقيتك يا ريال
مايد : ها ؟ زين جان رديت
حمدان : شوف كم مره دقيت عليك
فتح تلفونه يشوفه : هيييه صامت
( يلس حمدان و مد يده يعطي مايد الاوراق )
مايد : شو ها ؟
حمدان : كم تغيير و كم مناقصه و مشروع ولا ترقيعاتكم كلكم امروه اتصرف بدونها ، اقرا و اذا موافق اخر صفحه دور اسمك و وقع عداله
مايد : يا ريال انا واثق فيك و في كل خطوه تخطيها و يحتاي اقرا وراك
( وقع مايد و عطى عاشه توقع عند اسمها )
ام خليفه : هييي انتوا مقصه توقعون على اي شي
مايد : من كثر الي عندي عشان يسرقني
حمدان : حتى انتي يا يدتيه نبا توقيعج
ام خليفه : مايد اقرا لي الاوراق
( قرا مايد صفحه صفحه و ام خليفه تتقهوى فنيال ورا فنيال )
ام خليفه : ما فهمت شي بس زين هلا بوقع
مايد : يوم انج ما بتفهمين ليش تعبتيني و خليتي اقرا
ام خليفه : بس اطمن
( شل حمدان الاوراق و طلع )
ام خليفه : حمود كم عمره ؟
عاشه : فديته سنتين و سبع شهور
ام خليفه : زين ما ودج تيبين غيره ؟
مايد : راعية ضغط هب هيّن الحمال
ام خليفه : الطب اتطور
مايد : لا خلي حمود يكبر شوي
ام خليفه : يوم انت الي عندكم كلهم شباب ما ودك ببنت ؟
مايد : متى ربي كاتب امها تحمل بتحمل
* * *
قام سيف يصيح و ساره في الحمام تتسبح ، دخل عبيد ( بو ساره ) الغرفه و شله ، بعد ما خلصت ساره طلعت من الحمام نشفت شعرها تمكيجت ولبست عباتها و نزلت لقت ابوها قاد في الصاله و سيف راقد في حضنه :
عبيد ( بو ساره ) : على وين ان شاء الله
ساره : احس ابا اطلع اغير جو شوي
عبيد ( بو ساره ) : هيه احسن لج طلعي و غيري جو
* * *
ركبت السياره و راحت الكوفي الي دايماً تروح له و من كثر ماتروح له كل الي يشتغلون في الكوفي يعفونها و حافظين طلبها مجرد ما يشوفون سيارتها واقفه قدام الكوفي يجهزون لها طلبيتها و اول ما تقعد على الطاوله اييبون لها الطلبيه ، قامت و راحت للكاشير تدفع لكن قالوا لها ان الحساب مدفوع و استغربت و التفتت تشوف منو في الكوفي يعرفها و تعرفه بيدفع لها الحساب خذت نظره سريعه و ما شافت حد ، التفتت للويتر و قالت له عطني ورقه و قلم و عطاها ، كتبت في الورقه ( شكراً على العزيمه ، تعالني السياره ) و طلبت منه يوصلها للي دفع الحساب و هي طلعت للسياره ، ثلاث دقايق بالضبط و ياها ذياب :
ساره : دريت انك انت
ذياب : شو دراج ؟
ساره : اقدر اقول كوفينا ؟
ذياب : اشتقت لج
ساره : عادي بتشتاق لين ما الله يشلني من قلبك
ذياب : افسخي الخطوبه لا تاخذينه
ساره : و ليش ان شاء الله ؟
ذياب : يا بنت الحلال احبج افهمي
ساره : عادي الايام بتنسيك
ذياب : حرام عليج مرت سنين وللحين انتي في الخاطر
ساره : و زوجتك شو ذنبها ؟
ذياب : مستعد اطلقها اصلاً ما احبها
ساره : بس الي اعرفه ان علاقتكم زينه و تحبون بعض و كنت عايش حياتك ، في اليوم الي عرفت ان اخوك بيخطبني كل شي تغير ؟
ذياب : ما انكر اني حياتي حلوه و علاقتنا زينه و احبها ، بس من شفتج حبج المدفون رجع
ساره : فات الاوان ، و انا هب مستعده اهدم بيت
ذياب : ساره فكري
ساره : الموضوع ما يحتاج تفكير
* * *
دق فارس على سلمى و طلب منها تتجهز و تنزل بيعشيها برا ، خمس دقايق بالضبط و نزلت ، كانوا امها و ابوها قاعدين في الصاله ؛
شمسه : طالعه مع نادر ؟
سلمى : لا مع فارس
شمسه : زين تراج على ذمة ريال كتبي له انج طالعه
سلمى : لازم ؟
شمسه : هيه
سلمى : ان شاء الله
* * *
طالعت و ركبت مع فارس :
سلمى : الحين لازم اكتب حق نادر اني طالعه ؟
فارس : هيه انتي الحين على ذمته و من حقه يعرف انج طالعه
سلمى : احس فشله
فارس : يعني على اساس قبل ما كنتي تقولين له
سلمى : كنت اقول له بس هب دوم
* * *
كتبت له على الواتس انها طالعه تتعشى مع فارس و على طول رد عليها و كتب عافيه ؛
سلمى : افف صدق زعلت و ما بكلمه ، يعني شو ها ليش ما يسأل ؟
فارس : شو ؟
سلمى : كتب عافيه ، ليش ما سأل وين ؟
فارس : لان معلومه ابداً هب مهمه ، و بعدين لا تدققين جي انتي الي بتتعبين
سلمى : تصدق اصلاً طول اليوم مادق لي إلا مره
فارس : و ليش ان شاء الله كم مره تبينه يدق لج ؟
سلمى : يعني هب بس مره ، اربع مرات خمس
فارس : ولا شو بيقول ؟
سلمى : اي شي بس اهم شي يدق
فارس : زين انتي دقي له
سلمى : لا استحي
فارس : من متى ؟
* * *
<< يتبع >>
شو توقعاتكم للبارت الياي ؟ ؟ تشوفون هزاع وايد مبالغ مع فيصل ؟ ؟ ام خليفه ؟ ؟ مايد و عاشه ؟ ؟ تحسون مايد في خاطره عاشه تحمل صح ؟ ؟ تحسون حمدان شي وراه ؟ ؟ شو رايكم في ذياب و هو يلاحق ساره ؟ ؟ و شو وضعه بالضبط ؟ ؟ سلمى من حقها تزعل من نادر ؟ ؟ 🤔❤️🔥❤️🔥
