زايد : لميا باباه روحي ناديلي سلمى
لميا : ان شاء الله
* * *
دخلت لميا غرفة سلمى و مالقتها ، نزلت و طلعت من الباب الخلفي و راحت بيت عيال عمها ، دخلت لقت ناصر قاعد في الصاله :
لميا : ناصر
ناصر : ها لميا ؟
لميا : سلمى فوق ؟
ناصر : هيه فوق
* * *
دقت لميا الباب و تنادي " سلمى ، سلمى " ، قام نادر و فتح الباب ؛
وهو يفرك عيونه : ها لميا شو تبين ؟
لميا : قول حق سلمى ابويه يباها
نادر : اوك
* * *
قامت سلمى و نزلت بسرعه ، دخلت البيت من الباب الخلفي و راحت عند ابوها ؛
سلمى : هلا ابويه
زايد : صح النوم
سلمى : صح بدنك
زايد : الجامعه داقين عليه
سلمى : غريبه انا شو مسويه ؟
زايد : يقولون عندج ثلاث مواد خارج الدوله و ما طعتي تسجلينهن
سلمى : هيه مابا ادرس برا
زايد : و ليش تأجلين التخرج سنتين ؟
سلمى : ماريد اغترب
زايد : على العموم انا سجلتهن لج و اخترت امريكا
سلمى شوي و تصيح : مابا مابا اسافر عادي و تأجل التخرج سنتين
زايد : انتي هب قاعده تفكرين بعقل
سلمى : انزين ليش امريكا كل ربيعاتي بيروحن بريطانيا
زايد : و الله انا سألت واحد استفسرت منه و قال امريكا احسن
* * *
طلعت سلمى معصبه و راحت فوق عند امها تبا تتشكى ، لكن شمسه ما عطتها اي مجال عشان تتكلم و دخلت الحمام ، طلعت من غرفة امها و ابوها دخلت غرفتها و دقت على ربيعتها موزه ؛
موزه : هلا سلامي
سلمى ( بنبره حزينه ) : تخيلي ابويه سجل المواد و حجز امريكا
موزه : زين والله ، انا ابوي للحين هب مقتنع
سلمى : شو زييين بصيح مابا اسافر
موزه : وين قلتي امريكا ؟
سلمى : هيه
موزه : تدرين ان كل البنات اختارن بريطانيا و الشباب امريكا
سلمى : ادري لا و ابوي يقولي انا استفسرت من واحد و قالي امريكا احسن ، في خاطري امريكا احسن لهم هب لي
موزه : انزين و شو بتسوين ؟
سلمى : ما ادري بس انت بتسجلين معاي
موزه : ادعي ابوي يقتنع
سلمى : رمسيه
موزه : يلا عيل برجع ارميه الحين برايج
* * *
كان زواج ساره محفوف و بين الاهل ، انتقلت هي و سيف بيت اهل زوجها و كان ذياب معاهم في نفس البيت ، كانت ساره تتجاهل ذياب بشكل مستمر تتجاهل نظراته لها و تتهرب من سواله عنها و سوالفه معاها ، كانت تتجنبه في اللمات و تحاول ما تكون دائماً متواجده و لكن اوقات تستحي يكونون كل حريم اخوان ريلها موجودين و هي لا ، خوفاً من ذياب صارت ما تنزل إلا اذا زوجها كان موجود ، طلب أحمد ( زوج ساره ) من ساره اتيب له كوب حليب ، راحت ساره المطبخ و لقت ذياب واقف عند الثلاجه ؛
و هي تطلع الكوب : ممكن اتطلع لي الحليب
ذياب و هو يحطه فوق الطاوله : من عيوني
ساره : عن الكلام الي ماله داعي و عيونك تحكم بها
قرب ذياب من ساره : ما اقدر انا الود ودي اذبح احمد
ساره : خسرت الاول ، ما فيني اخسر الثاني
ذياب : يحترق قلبي مليون مره كل ما اشوف احمد عيونه عليج
ساره : لا تستهبل تراه ريلي
ذياب : اخ بس اخ
أحمد ( بصوت عالي ) : وين كوب الحليب
ساره : يايه يايه
أحمد : روحي وديه حق حبيب القلب ، يعله ما يحدر
ساره : بقرا عليه
* * *
دقت روضه على شيخه عشان تكلمها في موضوع فارس ، لان فارس فضفض لـ روضه و قال لها عن الاتصال الي فرح فيه و خيب ضنه ، حزنت شيخه و حست انها صدق مقصره فيه لـ درجه ان فارس ما يعرف محمد اخوه ولا حتى تعلق فيه مثل ما تعلق في عيال شمسه و أمل بنت روضه ، دقت شيخه على فارس ؛
شيخه : هلا فارس ، اخبارك ؟
فارس : هلا ، طالع هب في البيت
شيخه : وين ؟
فارس : طالع عند الشباب
شيخه : هيه عيل مشغول ؟ ، خلاص عيل برايك
فارس : ليش ؟ ، صاير شي ؟
شيخه : لا كنت بطلع اتقهوى معاك
فارس : اممممم ، خمس دقايق و انا عندج
شيخه : زين اترياك
* * *
نزلت شيخه و هي ماسكه محمد ، و بو هزاع و فيصل قاعدين في الصاله ؛
خليفه ( بو هزاع ) : البطل اليوم شفته راجع بالباص
شيخه : هيه امبونا متروعين لكن انشوف زايد هزاع يرجع بالباص
فيصل : وين بتروح حمود ؟
محمد : امم الالعاب مع فارس
فيصل ( باستغراب ) : مع فارس
خليفه ( بو هزاع ) و هو يطلع من بوكه ألف درهم : تعال عطني بوسه بعطيك فلوس و اشتر الي تباه
شيخه : لا عميه لا تعطيه
خليفه ( بو هزاع ) : تعال معليك من ماماه
محمد : بس بابا يقول اذا ما سمعت كلام ماما يويلي بروح الجنه
فيصل ( يضحك ) : لا لا الي ما يسمع الكلام يروح النار
محمد : هي هي النار ، I don't want
* * *
وصل فارس و دق على شيخه ، طلعوا و ركبوا السياره ؛
فارس : بدون عباه ، كنت بنزلج المول
شيخه : تبا المول ، زين بس دقيقتين بروح البس عباه
( نزلت شيخه و نقز محمد قدام فارس )
محمد : did you know
فارس : شو ؟
محمد : I wanna be a pilot
فارس : ما شاء الله ابا تصير طيار
محمد : هيه و اسوق الطياره ، اساوي كبير مثل بابا أحمد مش مثل بابا فيصل
فارس : قصدك عمك فيصل
محمد : عمي say انا مثل بابا
فارس : عمك جي يقول ؟
محمد : ya , and did you know uncle hazza always يعصب على عمي فيصل
فارس : و شو بعد ؟
محمد : I hear him shouting
فارس : هيه راعي علوم طلعت
محمد : شو يعني ؟
( وصلت شيخه )
فارس : ولدج طلع راعي علوم
شيخه : لا مسكين
فارس : لا والله ما شاء الله عليه يلقط بسرعه
شيخه : هيه يمكن لان ماشاء الله ذكي
فارس : و يرمس انقليزي احسن عنيه
* * *
طول اليوم و سلمى تفكر كيف تخلي ابوها يكنسل الموضوع ، شو ممكن تسوي و كيف اقدر تغير رايه و تخليه ما يخليها تروح ، طلعت و يلين في الحديقه تفكر ، طلع نادر من البيت و يوم شاف سلمى قاعده بروحها غير وجهته و راح لها ؛
نادر : مسالخير
سلمى : هلا ؟
نادر : حبيبتي في شو تفكر ؟
سلمى : تخيل عندي كم ماده خارج الدوله اذا ما خلصتهن بتأخر سنتين و انا طبعاً سكت عن الموضوع ولا سجلتهن ولا يبت طاري حق حد اصلاً
نادر : اوك ؟ و شو صار ؟
سلمى : الادفايزر مالي ما ادري من وين ياب رقم ابويه و قاله بنتك ما تبا تسجل و بتتأخر سنتين و بتضيع على نفسها الفرصه و مادري شو ترس راسه بعد
نادر : هيه و ابوج شو سوى ؟
سلمى : ابوي سجلني و انا ولا ادري عن شي
نادر : كم ماده و وين ؟
سلمى : ثلاث مواد ، في امريكا
نادر : ول امريكا مره وحده
سلمى : هيه و غصب اروح و انا ما ابا
مادر : ليش ؟
سلمى : تخيل كل البنات سجلن بريطانيا و ابويه سجلني امريكا مع الشباب
نادر : ليش ؟
سلمى : اونه سأل و استفسر و قالو له امريكا احسن
* * *
<< يتبع >>
شو توقعاتكم للبارت الياي ؟ ؟ قرار زايد سليم و في محله ؟ ولا تحسونه تسرع ؟ ؟ تحسون في سبب ورا رفض سلمى ؟ ؟ و ممكن يكون سبب رفض سلمى ؟ ؟ ذياب شو وضعه ؟ ؟ و ساره لين متى بتم تتحمل ذياب ؟ ؟ تحسون ممكن ذياب يكشف معرفته بساره قبل زواجها من اخوه قدام اهله ؟؟ و شيخه و فارس ؟ ؟ محمد ممكن يكون سمع شي مافهمه ؟ ؟ و ساكت للحين ؟ ؟ شو تتوقعون يكون موقف نادر عن موضوع السفر ؟ ؟ 🤔❤️🔥❤️🔥
صدق متحمسه اقرا توقعاتكم اتمنى محد يسحب 🥹
