ثاني يوم داوم حمدان من الساعه 6 و على طول باشر في التغييرات ، اول شي سواه حمدان طرش حق عاشه و روضه و ساره ايميل انه مستغني عن خدماتهم و تم سحب المسمى الوظيفي منهم و رواتبهم مثل ماهي بتنزل لهم كل شهر و المبرر انهم صار لهم اكثر من سنه هب مداومين و هو في حاجه لموظفين يخاذون اماكنهم و يباشرون في الشغل المتراكم ، دق صقر باب مكتب حمدان و اذن له حمدان يدخل ؛
حمدان : هلا صقر ؟
صقر : عندي مشكله في قسم التسويق و الصراحهفكرت و ما لقيت حل و ادق على روضه ما ترد علي
حمدان : تصرف و خلاص روضه مالها اي صلاحيات
صقر : كيف يعني ؟
حمدان : بدون اي اسأله ، يعني انت ما تعرف تتصرف ، يخي تصرف
صقر : تمام
* * *
الساعه 10 نزلت سلمى و طلبت من العامله تيب لها الريوق في الحديقه ، استغربت ان سيارة نادر واقفه في القراج دقت عليه لكن ما رد عليها ، خمس دقايق و طلع نادر من البيت مستعيل ؛
سلمى : نادر
( لف شافها و راح لها )
سلمى : دقيت عليك ما رديت
نادر : هيه مستعيل كنت بركب السياره و يدق لج
سلمى : غريبه متأخر
نادر : راحت علي نومه
حط يديه في مخباه و كأنه يدور شي : يوووه الحين وين نظارتيه
سلمى باستغراب : على راسك
( شلها ولبسها )
سلمى : نادر فيك شي ؟
نادر : ها ؟ لا مافيني شي
( قام بيروح )
سلمى : ما بتوصلني ؟
نادر : اوصلج ؟ ( ثواني يفكر ) ، وين ؟
سلمى : الجامعه
نادر : يلا اركبي
* * *
كان طول الطريق يده على لحيته و يعض شفايفه و باين انه يفكر و في عالم ثاني ، لانه تجاهل سلمى يوم قالت له يمر على ستاربكس ، وصلوا الجامعه ؛
نادر : يلا انزلي ،،،،، تبيني انا اردج ؟
سلمى : لا عادي بشوف سهيل ولا يابر يمرني
نادر : لا انا بردج اساساً ارد اربع و انتي تخلصين اربع
سلمى : زين
* * *
نزلت و راح نادر ، دخلت الجامعه و هي عقلها عند نادر ، هل هو قاعد يتجاهلها ولا صاير معاه شي ولا شو ؟ ، يلست ولا ايراديا دقت على فارس تشتكي له ، كان فارس في سابع نومه و قام يتحراه منبه ؛
فارس : يا الله انا ليش حاط منبه ( فتح عيونه بصعوبه و انتبه ) سلمى غريبه داقه ( رد عليها و صوته نعسان ) ها سلمى ؟
سلمى : شو راقد ؟
فارس : هيه راقد
سلمى : حد يرقد للحين
فارس : الحمدالله بيتنا يحترمون الراقد هب مثل بيتكم ممنوع الرقاد و لازم نقوم بدري
سلمى : هيه اصلاً روضه ترقد لين الظهر ولا تدري عنك
فارس : انزين انتي هب المفروض تكونين مداومه و في كلاسج ؟
سلمى : هيه مداومه بس مودي ما يسمح لي ادخل الكلاس
فارس : ليش ان شاء الله ؟ شو صاير ؟
سلمى : قوم بدل و تعالني الجامعه ، تترياك في ستاربكس
فارس : يلا ياي
* * *
دخل صقر على حمدان و قدم له ورقة الاستقاله و ما فكر حمدان انه يتردد و على طول وقع مع ان صقر شاطر و واضحه جهوده بس حمدان ابداً هب من النوع الي بيحاول في الشخص و بيتفاهم معاه.
* * *
فارس : ها سلمى شو صاير
سلمى : ماشاءالله مسرع ، بعدين شو هالطقم ؟
فارس : هب من بعد البيت و ييتج بسرعه
سلمى : يخي نادر
فارس ( بانفعال ) : بلاه ؟ ارمسي شو صاير ؟
سلمى : احسه يتجاهلني
فارس : من اي ناحيه
سلمى : لا تستهبل شو من اي ناحيه
فارس : لا ما استهبل
سلمى : شو اسوي ؟؟؟
فارس : مادري عنج ، ويهج ليش تعبان ؟ قستي السكر ؟
سلمى : لا نسيت
* * *
قام فارس و طلع يركض لسيارته و ياب شنطة فحص السكر ، فحصها و طلع السكر عندها مرتفع و من التوتر و الخوف ما عرف شو يسوي او كيف بينزله و دق على زايد ؛
زايد : هلا فارس
فارس : ابويه سلمى ارتفع السكر عندها شو اسوي ؟
زايد : عصير ليمون ولا شاي
( سكر فارس و راح اييب لها عصير ليمون ، عشر دقايق و رجع دق عليه زايد و حطه سبيكر )
زايد : رجعت قست السكر ؟
فارس : لا
زايد : قيسه
فارس : دقايق
( رجع يقيسه )
فارس : ما نزل
زايد : عندك الابره ؟
فارس : لا خلصن الي عندي
زايد : اقرب طواري
سلمى : باباه ماله داعي
زايد : بينقص الاوكسجين عندج
سلمى : ما يصير بيحطوني غياب
فارس : شو عليج ؟
سلمى : دكتور جمال
فارس : زين روحي السياره و انا بروح له
* * *
دخل فارس كلاس سلمى و سلم بصوت عالي ؛
دكتور جمال : يا هلااا فارس
قرب من الدكتور و بصوت واطي : دكتور سجل سلمى حضور السكر مرتفع عندها و بوديها الطواري ، بس مصره تتسجل حضور ، خايفه تتسجل غياب
دكتور جمال : ولو سلمى عيوني لها ، من اشطر الطلاب الي عندي ، ليتك متلها
فارس : سلمى اعجوبه ما تتكرر مرتين ، على العموم مشكور دكتور
* * *
دخل مطر بيت ام خليفه ، كانت ام خليفه قاعده في الصاله تقرا قرآن ، يلس مطر عدالها ؛
مطر : يدتيه ادعيلي
ام خليفه و هي تسكر القرآن : صدق الله العظيم ، هب قاعده اصلي يعني اقرا قرآن كيف تباني ادعيلك ؟
مطر : في نص الآيه
ام خليفه : استغفرالله ، قرآن
مطر : استغفرالله
ام خليفه : غريبه هب مداوم
مطر : ما قدرت اداوم متوتر
ام خليفه : ليش متوتر ؟
مطر : عنبوه نسيتي ؟ اليوم بنروح نخطب
ام خليفه : هيه خطبة الرياييل اليوم
مطر : هيه و احس متوتر مابا
ام خليفه : صدقها امك يوم قالت اخافه اخر شي يهون
مطر : حشى هب مهون اباها
ام خليفه : قلت لك بزوجك ساروه ما طعت
مطر : حشى عليه مينون انا اخذها
ام خليفه : انت مينون حتى بدون لا تاخذها
مطر : زين زين
ام خليفه : منو بيروح معاك ؟
مطر : ابويه و سالم و عميه خليفه
ام خليفه : بس
مطر : عميه سيف قال بيشوف
ام خليفه : هييه ، زين عيل ربي يوفقك و يكتب لك الي فيه الخير
* * *
دق هزاع على أحمد و قاله انه يبا يشوفه ضروري و رد عليه أحمد و قاله اذا الموضوع ما يتأجل يقدر اييه مبنى الطيران و بينزله تحت ، وصل هزاع و يلس يتريا أحمد ينزل له و من كثر ماهو متوتر كان رايح راد و و ماسك شعره بيديه بقوه ، نزل أحمد و خاف اول ما شاف هزاع و على طول حس الموضوع له خص في فيصل و حبه لـ شيخه.
* * *
طلع نادر قبل ما يخلص دوامه و مر الجامعه عشان ياخذ سلمى وصل و دق لها ثلاث مرات ولا ردت عليه انتظر عشر دقايق و رجع البيت كتب لها في الواتس ( اول ما تقرين الرساله دقي ) ، وصل البيت حط راسه و رقد ، على الساعه خمس قام و على طول فتح تلفونه يشوف اذا سلمى قرت الرساله ولا لكن ما كان في رد ، قام لبس كندورته و راح بيت عمه ، البيت فاضي و الهدوء يعم المكان.
نادر : لين ، يا لين
لين : yes sir
نادر : سلمى وين ؟
لين : nobody here
نادر : غريبه
* * *
شو توقعاتكم للبارت الياي ؟ ؟ تصرف حمدان صح ؟ و نادر شو فيه على سلمى ؟ معقوله تغير بسرعه ؟ تحسون فارس بيتصرف ولا ما بيتدخل بينهم ؟ و مطر بتم خطبته ولا ممكن يهون عند باب الميلس و ما يدخل ؟ ؟ و شو الموضوع الي هزاع يبا يقوله لأحمد ؟ ؟ تحسون الموضوع يخص أحمد ولا هزاع ؟ ؟ و نادر صحى على نفسه اخر شي ولا ؟ ؟ 🤔❤️🔥
