طلعت سلمى بدري الصبح غير عن العاده و مرت بيت يدها حمد قبل الجامعه ، دخلت سلمت عليه و يلست عداله :
سلمى : طلبتك
حمد ( بو مايد ) : حاضر و تم
سلمى : يملج عليه نادر اليوم
حمد ( بو مايد ) : هذا الموضوع عند ابوج
سلمى : كلمت ابوي مطنشني و انا ما اتحمل البعد خلاص
حمد ( بو مايد ) : حلو عليج الحجاب
سلمى : لا تغير الموضوع
حمد ( بو مايد ) : زين انا برمس ابوج
سلمى : ابا قول و فعل
حمد ( بو مايد ) : خلاص انا برمس ابوج اليوم ان شاء الله و يصير خير و بعد لازم نشوف نادر
سلمى : نادر هب على كيفه و بعدين بس ملجه و العرس يصير خير عقب
* * *
الساعه 1 الظهر ، كان بو هزاع قاعد في الصاله مع ام هزاع و فيصل و سلامه ، نزلوا أحمد و شيخه و محمد بيطلعون يتغدون برا ، ركض محمد صوب فيصل و قاله يوديه الكوفي لان ابوه ما يبا يوديه ابتسم فيصل و أشر على عيونه ؛
أحمد : ماشي كوفي ويلا تعال بنروح
محمد : مابا عمي فيصل يخليني اشرب كوفي
أحمد : عمك بينضرب اذا خذلك كوفي
فيصل : محمد روح تغدا مع امك و ابوك
محمد : اوك بس العصر توديني الكوفي ؟
فيصل : ان شاء الله بوديك
* * *
ركض محمد صوب ابوه و شله أحمد و طلعوا ،،، دق مايد على عاشه عشان تطلع له و يروحون يشلون العيال و بالمره يتغدون برا ، نزلت عاشه عشان تاخذهم و بالمره تسأل عنهم و جي و نزل معاها مايد ، قابلوا كل الاساتذه و طلعوا و هم مستانسين على مستواهم و المدح الي مدحوه ، قرر مايد انه يكافأهم و خلاهم يختارون محل يدلونه و كل واحد ياخذ الي يباه ، كلهم طلبوا منه تلفون كان رفض لانهم صغار.
* * *
كلم بو مايد ولده زايد و اتفق على ان الملجه تكون بعد يومين باصرار من نادر و نادر اصلاً ما عنده علم بشي ، بعد ما سكر بومايد من زايد دق يبلغ نادر و يحطه تحت الامر الواقع ، انتهى من من نادر و دق على المنقذه عاشه الي تخلص له كل شي و على طول اتفقت مع مصممه و دفعت لها عربون و زياده بس عشان كل شي يكون جاهز باسرع وقت و اتفقوا على ان الملجه تكون في البيت الثالث ( في بيت زايد ) ، وصل مايد عاشه بيت زايد و نزلها لان المصممه يايه في الطريق و راح مايد ينزل عياله في البيت.
* * *
( في الجامعه )
يالسه سلمى حالها حال نفسها تتريا الكلاس الثاني ، مرت بنت معاها في اغلب الكلاسات و عزمتها على كوفي استحت سلمى تردها و قامت معاها ؛
نوال : شرايج نطلع كوفي برا الجامعه
سلمى : لا عندي كلاس و اخاف ما الحق
نوال : معليك بوصلك قبل الكلاس
سلمى : لا لا ماله داعي نطلع
نوال : تمام على راحتك
( في طريقهم الكوفي و هم يشوفون بعض )
سلمى ( في بالها ) : it's weird ليش تباني اطلع معاها
نوال ( في بالها ) : لا يكون خافت تطلع معاي
سلمى ( في بالها ) : يارب ما تحاول تتقرب يعني ، انا بروحي هب بالعه بنات الجامعه
* * *
وصلوا ستاربكس و طلبت لها سلمى ساي بارد و نوال اميريكانوا بارد و بطاقة نوال ماسحبت و دفعت سلمى الحساب و يلسوا على طاوله في الزاويه ، كانت نوال تشوف و ماسكتت ولا ثانيه و سلمى قاعده تسمع و تسلك حتى مشروبها ما شربته ، مر عبيد و يوم شاف سلمى وفق و سلم ؛
عبيد : يصير اقعد ؟
سلمى ( بابتسامه عريضه ) : حياك
عبيد : اخبارج ؟ ويي مبروك الحجاب
سلمى : والله بخير و ان شاء الله يهدينا و نتحجب عدل
عبيد : بدعيلج في كل صلاه
سلمى : هيه و ادعيلي ان الله يوفقني و اتخرج من هالجامعه
عبيد : ان شاء الله تتخرجين معانا
سلمى : لا ان شاء الله ها الي ناقص أتأخر سنه و اتخرج معاكم
عبيد : شو عنبوه ولا ماده مسجله معانا
سلمى : لقيت قروب غيركم
عبيد : تخسين
قامت نوال بتروح : انا عندي كلاس مع السلامه اشوفج بعدين
سلمى ( مجامله ) : ان شاء الله ، الله يحفظج
عبيد : بلاج هب بالعتنها
سلمى : I hate those who invite me even if they don't know me
عبيد ( يضحك ) : انزين شو ماعندج كلاس ؟
سلمى : عندي بس بعد نص ساعه ، و انت ؟
عبيد : لا خلصت كلاسات اليوم ، كنت باي باخذ كوفي و طالع
سلمى : انزين روح اطلب لك
عبيد : عقب عقب
سلمى : انزين شو الدراسه معاك ؟
عبيد : تخيلي سجلت ماده مع دكتوره و الكلاس كله بنات حسيت اني منبوذ و رحت اترجا الادفايزر مالي ينقلني عند دكتور ثاني
سلمى : و شو صار ؟
عبيد : ما صار شي
* * *
خلصت سلمى و كلاسها و هي طالعه لقت نوال تنتظرها قدام الكلاس ، رفعت تلفونها و دقت على اول رقم ( امها ) ؛
شمسه : هلا سلمى
سلمى : سوي عمرج تسولفين علي
شمسه : انا الي اسوي عمري ولا انتي
سلمى : تدرين توني طالعه من الكلاس و احس كان الشرح اليوم حلو و فهمت كل شي
شمسه : بلاج ؟
سلمى ( بصوت واطي ) : ابا اصرف وحده
شمسه : حرام عليج
سلمى : لا لا ناشبه
شمسه : سوي لج صداقات بدال ما كل يوم تتفلسفين ع راسي لان ما عندج ربع في هالجامعه
سلمى : ماماه هذيل الي هني غير
شمسه : غير في شو ؟
سلمى : في كل شي ، كامله ابد ما ينبلعون
شمسه : بنات ربع ابوج معاج رابعيهم
سلمى : يقولن اني خقاقه و محد غيرهن الخقاقات
( سكرت شمسه على ويه سلمى و على طول دق نادر )
سلمى : دقيت في وقتك
نادر : اكيد تبين تصرفين حد
سلمى : يا فاهمني و يلوموني في حبك
نادر : اقول طلعي اترياج برا
* * *
طلعت من الباب و انصدمت انه وافق قدام الباب شوي يدخل الجامعه ؛
سلمى : كيف دخلت ؟
نادر : واسطه
سلمى : خف علينا
نادر : علوم ؟ اخبار ؟
سلمى : بعد ما شفتك كل شي صار ميه ميه
( طلعت نوال من الباب تتلفت )
سلمى : اتشوف هاي ام شيله زرقا
نادر : هيه بلاها ؟؟
سلمى : ناشبه لي ما ادري شو تبا
نادر : ودي اداوم يوم و اعرف ليش ينشبون لج و انتي ما عندج سالفه
سلمى : حسيييييتتت
نادر : زين ما علينا ، مبروك
سلمى : على شو ؟
نادر : الملجه ورا باجر ، اعزمي القراب منج
سلمى : مابا حفله
نادر : عيل ؟
سلمى : هدفي اني بس اكون قريبه منك هب اسوي حفله و الناس تدري
نادر : عاد خلاص اتفقوا
سلمى : هيييه زيين ، تعال انت ليش ياي تشلني ؟
نادر : بوديج ناخذ لج دبله غير عن الي ما عجبتج ، وين تبين ؟
سلمى : هذاك حلو بس اوڤر بزياده يعني ابا معاه خاتم ساده كبديل يومي
نادر : فهمت عليج ، تبينا نشوف كارتير ؟
سلمى مشغوله في تلفونها: ها اوك
* * *
الساعه 7 دخل أحمد البيت تعبان من الحواطه ، عق عمره على كرسي الصاله و خذ له احلى قيلوله مدتها نص ساعه كان بيكمل بس ياه مخده على راسه ؛
خليفه ( بو هزاع ) : وين ما نشوفك
أحمد : مشغول
خليفه ( بو هزاع ) : في شو بعد ؟
أحمد : ادور لي بيت
خليفه ( بو هزاع ) : و ليش ان شاء الله ؟
أحمد : القسم ضاق و ابا السعه و الراحه
خليفه ( بو هزاع ) : عسانا هب مزعجينكم
أحمد : لا ابد بس عندك خروف في البيت مزعجني
خليفه ( بو هزاع ) : خروف ؟
أحمد ( يضحك ) : اسولف اسولف
خليفه ( بو هزاع ) : ربي ييسر امورك يا أحمد
* * *
بعد هذي الدعوه الي كانت طالعه من القلب ، و صل احمد ايميل خلاف يعدل يلسته و بعد ما قراه قال حب راس ابوه و نزل يحب ريوله من الفرحه .
* * *
<< يتبع >>
شو توقعاتكم للبارت الياي ؟؟ بتم ملجة نادر و سلمى على خير ؟ و نوال مثل كل البنات الباقيات الي يبن يصادقن سلمى ولا وراها موضوع ؟؟ و أحمد قاصد يقول انه في خروف في البيت ؟؟ و شو تتوقعون الايميل الي وصله ؟؟ 🤔❤️🔥❤️🔥
