دخل محمد و قعد عدال يدته ، فتح برنامج تويتر من تلفونه و دخل على حسابها و سمع يدته كم بيت مجاره لأخر بيتين كتبتهن الي تقول فيهن ؛
. . .
يـا بخيل الـوصل سير علينا
لا تحـرم محبٍ من وصالكـ
. . .
تعال و اشبك ايدك بيدينـا
و سـولف لـي عن احـوالك
فـ المحبه م غيرك يسلينـا
لا تتركني في الحب هـالك
غيرك يبغي الوصل م جينا
وانت الروح والعين حلالك
. . .
ام خليفه : ما شاء الله منو الي يجاريني
محمد : عيبتج ابياته ؟
ام خليفه : هيه عجبتني
محمد : انا مسوي ريتويت اجاريج
ام خليفه : ماشاءالله والله و طلعت شاعر
محمد : لا والله ما اتعداج ، لاني شاعر ولا شي
ام خليفه : يعني متذوق للشعر
محمد : اقول الي في الخاطر لا وزن ولا شي
ام خليفه : زين سو توت من حسابيه على ابياتك عشان اييك تفاعل
محمد : سويت و التفاعل اكثر من التفاعل الي على تغريدتج
* * *
طلعت روضه على الساعه 10 من البيت رايحه الميلس تشوفه اذا نظيف ، لان راشد دايماً يشتكي من نظافة الميلس و الفوضى الي فيه ، فتحت الباب شوي شوي كانت ريحة الممر خايسه ( ريحة زقاير و شيش و ارقيله ) ، فتحت باب الميلس و شافت الي ما كان ودها تشوفه لكن مسكت اعصابها ؛
روضه : السلام عليكم
وفقوا ربع فارس و ردوا السلام ، اما فارس كان منسدح على يساره مجابل ربعه و في فمه زقاره و طفاية الزقاره الي قدامه فيها اكثر من عشرين زقاره ، اول ما انتبه انها تشوفها عدل يلسته و ابتسم لها ابتسامه عريضه مع نظرة البراءه ؛
روضه : ما شاء الله ماشي دوام
فارس : اوف اليوم
روضه : ما شاء الله اشوف سلمى مداومه
فارس : شو يخصني فيها ؟
روضه : تراك في نفس جامعتها
فارس : اميه يعني ما تشوفينيه مع ربعيه
روضه : زين
* * *
مر اسبوع و فارس ما داوم كان يطلع الصبح بالسياره و يوقفها برا ورا سور الميلس و يدخل الميلس من الباب الخارجي و جي روضه تتحراه راح الجامعه و هو في الميلس زقاير و لعب و سوالف مع ربعه ، كانت كل يوم الصبح تدق عليه و تسأله اذا راح الجامعه لكن مايرد و يكتب لها في الواتس انه في المحاضره و تطلع روضه تروح الميلس توصل للباب و ترد و الدموع اربع اربع ، اول مره فارس يكذب عليها ، حاولت روضه اعرف شو قاعد يصير لكن ما قدرت اعرف اي شي غير ان فارس صار له تقريباً اكثر من شهر ما يداوم و هالمعلومه يابتها من سلمى.
* * *
( يوم الجمعه )
قبل صلاة الجمعه نزل فارس و لقى أمل في الصاله شلها من الخدامه و طلع ، كتب مسج لأمه ( روضه ) انه خذ امل و طالعين يتقهوون ، وصل للكوفي و نزلوا كانوا ربعه ( سلطان ، منصور و محمد ) يتريونه ، وقف و طلب له كوفي حاسب و قعد عند ربعه ، كانت أمل قاعده و هاديه تشوف ربع فارس ؛
منصور : هذي اختك ؟
فارس : هذي عيوني و قلبي و روحي
سلطان : اوف
فارس : والله هذي مالي غيرها
منصور : و سلمى
فارس : وييي سلمى بكفه و هذي بكفه
سلطان : فارس انت قصتك صدق ولا تأليف ؟
فارس : اي قصه ؟
سلطان : حادث امك و ابوك و ابوك زايد لقاك
فارس : هيه صدق ، ترا يدي الله يرحمه تزوج على ام عماميه ما ادري شو اسمها المهم خذ يدتيه و يدتيه مايابت غير ابويه و هذيج منعتهم يتواصلون مع ابويه و زرعت الكره فيهم
سلطان : انزين يدك وين كان عايش مع الاولى ولا الثانيه ؟
فارس : الي اعرفه انه طلق يدتيه و و يدتيه وحيدة امها و ابوها و ابوي وحيد امه و امي وحيدة امها و ابوها ، يعني لولا ابوي زايد انا في دار الايتام
منصور : و الحين كيف علاقتك بعمامك
فارس : محد حن عليه غير عميه مسلم الباقي ما يدانونيه
سلطان : ياخوي خيره شو تبابهم
فارس : تعرفهم شو ؟
سلطان : هيه اعرفهم ، يا ريال الحمدالله انك هب رابي عندهم
فارس : اقول غيروا الموضوع ما احب هالطاري
محمد : كوفيك ما خذته
فارس : هذيل نسوني
* * *
طولوا في الكوفي و اضطر فارس يودي أمل معاه المسيد ، دخل المسيد و حطها بينه و بين منصور و حط تلفونات ربعه في ثبانها عشان تلتهي فيهن ولا اسوي صوت ، بعد الصلاه شلها و طلع فتح تلفونه و لقى عشر مكالمات من روضه ، ركب السياره و دق عليها ؛
روضه ( بعصبيه ) : وين أمل ؟
فارس : هني عنديه
روضه : والله ؟ و صلاة الجمعه ؟
فارس : صليت و ديتها معايه المسيد
روضه : و ليش ان شاء الله
فارس : تأخرنا في الكوفي و ما مداني اردها الحين رادين
روضه : معليه تعال و نتفاهم
* * *
رجع راشد من المسيد و وقف قدام البيت يتربا روضه اطلع له عشان يروحون يتغدون في بيت العود ( بيت أم خليفه ) ، طولت روضه لانها تنتظر أمل و راشد ما يدري ان امل مع فارس ، نزل يشوف روضه ، دخل و لقاها قاعده في الصاله ؛
راشد : صار لي عشر دقايق اترياكم
روضه : أمل مع فارس للحين ما رجعوا
راشد : اشوفه مصورها في الكوفي الصبح
روضه : هيه و لين الحين ما ردها
راشد : و الصلاه ؟
روضه : صلت معاه في المسيد
راشد : لا تخليته يشلها مره ثانيه
روضه : كم قلت له مايسمع الرمسه و بعدين موضوع الجامعه لازم اشوف حل معاه صار له اكثر من شهر ما داوم
* * *
دخل فارس و نادت روضه العامله تاخذ أمل و تبدل لها ملابسها ، شلت العامله أمل من فارس و لف فارس بيطلع ؛
روضه : على وين ؟
فارس : الغدا هب في بيت يدتيه فاطمه
روضه : هيه بس اقعد اول شي بنرمسك في موضوع
فارس و هو منزل وايد و بيقعد على الكرسي : موضووع عيل
راشد : شو الجامعه معاك ؟
فارس : الجامعه زينه
روضه : لا تكذب
فارس : سحبت اوراقيه و هالجامعه انا ما باها
روضه ( بعصبيه ) : على كيفك ؟
فارس : المستقبل مستقبليه و انا هالجامعه ما ابا اكمل فيها
روضه : فارس لا تنني ، راشد ما تقول شي
راشد : ليش سحبت اوراقك ؟ هذي احسن جامعه في الدوله و هب بسهوله تقبل الطلاب
فارس : ادري و ادري انهم قبلوني بعد موت بس طابت النفس ماباها
روضه : ليش ؟ ليش ؟ يا فارس ليش ؟
فارس : ما اداني ادخلها قسم بالله من ادخلها يلبسني شي ، محد بيحس فيني و الله حتى شارعها اذا مريته احس بشي في قلبي ما اقدر افهموني ما اقدر
روضه : و وين بتسجل ان شاء الله مافي اي جامعه تقبلك الاولويه هب لك
فارس : عادي ما بكمل ، هب في حاية الشهاده
روضه : شو هب في حاية الشهاده ، في هالزمن انت بدون شهاده انت ولا شي ، باجر وين بتتوظف ؟
فارس : هب في حاية الوظيفه ، الفلوس موجوده بتعيشني سنين و بتضمن مستقبل عيالي بعد
روضه : راشد انت تفاهم معاه انا بينني هذا
راشد : بسجلك في جامعه خاصه و بتدرس غصباً عنك ولا والله العظيم بخلي زايد يشوف موضوعك
فارس : إلا ابويه زايد دخيلك والله ادرس و اداوم غصب إلا زايد لا تخلي يتدخل
روضه : والله زايد تخاف منه
فارس : زايد مايحن علي و يفهمني مثلكم
روضه : من شوي محد يفهمك
فارس : دخيلكم لا يدري اني سحبت اوراقي
روضه : كله بسبب دلعك الزايد ما يخاف منك بس يخاف من زايد
فارس : لا ما يخص ابويه راشد على العين و الراس و الي يباه تم و من عيوني بس انا ما اهون علي انا ابوي زايد كلنا نهون عليه و يعاقب اما ابوي ارد دايماً يسامح و يتساهل معاي او اسوي مشاكل او اطيح في مصيبه
راشد : بس معليه عقب الي سويته بتشوف
فارس : بس والله هالجامعه ما اروح لها قسم بالله
* * *
حست روضه ان في ان في الموضوع بس فارس ما يبا يتكلم قدام راشد ، يابت العامله أمل و شلها راشد و ركبوا السياره ، محد بقى غير روضه و فارس ؛
روضه : اعرف ان في موضوع ثاني ، بس نتفاهم الفليل
فارس : زين
روضه : تضوي بدري عن السهر لين تالي الليل
فارس : ان شاء الله
روضه : و موضوع الزقاره نتفاهم فيه عقب
فارس : ترا ابويه يدوخ
روضه : ما يخصك في ابوك و الحين يلا الغدا
فارس : سيارتيه ما فيها بترول بركب معاكم
روضه : زين يلا
* * *
ركبوا سيارة راشد و هم طالعين دخلت سياره البيت و قف راشد و نزل يشوف منو هذا .
* * *
<< يتبع >>
شو توقعاتكم للبارت الياي ؟ ليش فارس يخاف من زايد اكثر من راشد ؟ ؟ شو تتوقعون السبب الي خلا فارس يسحب اوراقه ؟ ؟ و منو الي ياهم ؟ ؟ 🤔❤️🔥❤️🔥
