دخل هزاع بيت ابوه بعد مرور يومين و لقى سلامه مع امه في الصاله و اول ما طاحت عينها في عينه ابتسم اما سلامه حسرت بانزعاج و راحت للغرفه ، سلم هزاع على انه و لحق سلامه ؛
هزاع : يعني راضيه ؟
سلامه : لا تتحسب اني هني عشانك
قرب هزاع منها : اذا مش عشاني عشان منو ؟
سلامه : لا تقرب انا هني عشان عياليه و بس
هزاع : تمام
( عطاها ظهره و مشى صوب الباب بيطلع )
سلامه : هزاع
هزاع ( التفت بلهفه ) : لبيه
سلامه : اعترف بزواجك من حصه
هزاع : تبين تصغريني ؟!
سلامه : على اي اساس ؟ ترا زوجتك على سنة الله و رسوله
هزاع : انا الرجل المثالي بعيونهم ، الي ما اغلط ولا غلطه
سلامه : شو هالتناقض ؟؟ تشوف الزواج غلطه !!
* * *
نزل هزاع و نزلت وراه سلامه ( بو هزاع ، ام هزاع ، شيخه و أحمد و فطيم ) كانوا قاعدين في الصاله ، كان وايد متردد يقول ولا يسكت و يخي الموضوع سر لكن اصرار سلامه و نظراتها له كانت تجبره يتكلم بسرعه قبل لا هي تقول اي شي ؛
العنود ( ام هزاع ) ؛ هزاع ؟ في شي ؟
هزاع : هيه عندي موضوع
العنود ( ام هزاع ) : ممكن تخلونا بروحنا
هزاع : لا انا ابا الكل يسمع و يعرف
العنود ( ام هزاع ) : شو صاير ؟
هزاع : انا متزوج
خليفه ( بو هزاع ) : تمزح !!
سلامه : لا صار له فتره متزوج
فطيم : مستحيييلل
( قام خليفه و وقف قدام هزاع معصب وده يضربه لكن تداركت سلامه الموقف بسرعه )
سلامه : انا خطبتها له و زوجتهم و اسفين لان انتوا اخر من يعلم
العنود ( ام هزاع ) : و انتي كيف تهدمين بيتج بيدج ؟ ؟
سلامه : ما هدمت بيتي ، بالعكس خطبتها له و انا راضيه و هي بعد من اختياري
* * *
انتهى النقاش بغضب بو هزاع و الكل مقجأه اختفى إلا فطيم و هزاع و سلامه ؛
فطيم و هي تشوف سلامه بنظرة شفقه : بسج بسج تجملينه
هزاع ( ضحكة استهزاء ) : هه ، شكراً سلامه
سلامه : لا بس ما حبيت تطلع بمنظر الخاين قدام عيالك
هزاع : و تردين تقولين عشان عيالك
فطيم : هذي تبريرات مالها فايده ، صدق بسج تجملين ناس ما تستاهل
هزاع ( بعصبيه ) : فطيم عن الغلط
فطيم : لكلم من نفس الطينه و كل واحد اوسخ عن الثاني
* * *
تجاهل هزاع كلام فطيم و طلع بدون ما يرد عليها ، انا فطيم يليت مع سلامه و تحاول اعرف منها ليش دافعت عن هزاع و كذبت قدامهم عشانه وهو ابداً ما يستاهل بعد الي سواه فيها.
* * *
على الساعه ثلاث الظهر نزل نادر من فوق و عمر توه راد من الدوام و داخل البيت ؛
عمر : شو نادر ماشي دوام ؟
نادر : تعبان و حرارتيه مرتفعه من الصبح
عمر : زين يلا بوديك المستشفى
نادر : الهويه فوق في البوك على التسريحه
عطى عمر نادر مفتاح سيارته : اركب السياره و انا بييب الهويه و بييك
نادر : زين
* * *
الساعه 5 العصر ، كانت ام خليفه و فاطمه قاعدين في صالة بيت ام خليفه يسترجعون ذكريات محمد ( الله يرحمه ) و خانقتهم العبره ، دخل صقر و هو يسحب سالم من كندورته و غصب يدخله ؛
سالم : بسم الله شي مستوي ؟
ام خليفه : لا بس تذكرنا محمد الله يرحمه
سالم : الله يرحمه
( قامت فاطمه بتروح عند البنات في بيت عمها عبيد )
سالم : فاطمه
فاطمه : هلا ؟
سالم : لو ما عليج اخر شوفيليه ساعتيه في الغرفه لان هب محصلها
فاطمه : اي وحده ؟
سالم : ابل هيرمز
فاطمه : ان شاء الله
( راحت فاطمه فوق تشوف ساعة سالم )
ام خليفه : حرام عليكم يا سالم ردها
سالم : صدقيني اريح اها البعد
ام خليفه : لازم تقعدون تتفاهمون
سالم : نتفاهم على شو ؟ و هي ادري ان غيرها ساكن القلب
ام خليفه : بس الي سلامته القلب ترا عندها ريل و عايشه حياتها
سالم : انزين ؟
ام خليفه : اظلم ظلمات يوم الغيامه
سالم : ما ظلمتها في شي
ام خليفه : فكر والله حرام عليك فكر في عيالك قبل نفسك
سالم ( يسلك ) : ان شاء الله ، ان شاء الله
* * *
بعد صلاة المغرب دخلت روضه عليهم منهاره و الريولها مانساها مجرد ما سكر الباب طاحت على الارض ، و قامن ساره و فطيم ضموها عشان يهدونها و يفهمون شو فيها ؛
ساره : بسم الله روضه شو فيج ؟؟ انا فيها شي ؟؟
روضه : لاا
فطيم : عيل ؟ راشد فيه شي ؟؟!
روضه : لا
( البنات كلهم حولها )
سلامه : روضه اهدي و فهمينا شو صاير
روضه : بموت مخنوقه
فطيم تبا توقفها غصب : قومي قومي خذي نفس
( بعد ما هدت )
روضه : راشد متزوج علي
سلامه ( تضحك ) : يعني وين بيروح بعيد عن ولد عمه
روضه : على الاقل انتي توه متزوج عليج و ما عنده عيال منها
ساره : شوو !!!
فطيم : ما انصدمت
روضه : هيه عنده عيال منها لا و تخيلوا منو ماخذ
عاشه : لا ما بتخيل انا ابا انصدم
روضه : الي كنا خايفين منهن
( دخلت شيخه شاله فيصل )
ساره : لا لا مستحيل
عاشه : بنات بو يابر ؟؟
شيخه : بلاهن بعد هذيل
روضه : هيه بنات بو يابر
فطيم : فيني فضول منو اختار ؟
روضه : مها
شيخه : بتعلمنيه شو السالفه ولا ؟
روضه : راشد طلع متزوج عليه و عنده عيال منها
شيخه ( تضحك ) : استغفرالله العظيم ، زين و هزاع و أحمد خوانج يدرون ؟
روضه : ادري ان الي سوه خوانيه فيكم هب شويه
فطيم : لكن للاسف ما يدرون انها ترد في خواتهم
ساره : حسبي الله و نعم الوكيل فيهم
سلامه : لا لتتحسبين
عاشه : حلفي انتي بس
* * *
لحظة ادراك للجميع ، عاشه تفكر بصوت عالي ( تخيلوا يطلعون كلهم متزوجين علينا ؟ ) ، فجأه قررن يطلعن و يتعشن برا و عناد في رياييلهم ولا وحده بلغت ريلها. و الصدمه الاكبر ان الشباب بعد كانوا مقررين يتعشون برا و في نفس المطعم الي البنات اختاروه ،، كتبت ساره في قروب البنات عن العشاء و وين بيكون و ألحت ان كل الي في القروب يكونون موجودين ؛
سلمى : و ما حلى لكم العشاء إلا و انا مسافره
ساره : وييي المره اليايه ان شاء الله
مريم : غريبه سلمى واعيه ؟
سلمى : عندي كلاسات ولا جان رقدت
ساره : شدي حيلج حبيبتي
* * *
( في غاليريا مول )
دخلت ساره و طلبت منهم يجهزون طاوله حق اكثر من عشر اشخاص و طلب منها الريتز انهم ينتظرون عشر دقايق و خلال هالعشر دقايق طلعوا ياخذون لهم فره في المول و رجعوا ،،، بعد ربع ساعه رجعوا يلسوا على طاولتهم و طلبوا كل الي يبونه و خذتهم السوالف و الناس كانوا منصدمه من العدد ولا من السوالف الي ما خذتهم و اصواتهم العاليه و الضحكات الي بدت تزعج الزباين ، يتهم فطيم متأخره ؛
فطيم : شي فاتني ؟
ساره : هيه فاتتج كم سالفه
فطيم : اقولكن شفت فوق سيايير مألوفه
عاشه : شو قصدج ؟
فطيم : مدري بس جني شفت سيارة أحمدوه و ميود و زايد
شمسه : حلفيي
فطيم : والله
شيخه : عاد انا الي عندي هالايام صاير شري
روضه : عادي طاف
ساره : هيه طاف و هي من يعقد حاجبه تركض له ركض
روضه ( تضحك ) : شسوي
شيخه : اثقلي
* * *
دخلوا أحمد و زايد و من عادتهم اصلاً ما يلتفتون ولا يشوفون اصلاً يلسوا على الطاوله الي حاجزينها و كانت عدال طاولة البنات بس هم يسلوا في الطرف الثاني ، اما مايد من عند الباب منعوه يدخل لان باكيت الزقاره و الولاعه في يده وبعد ما وعدهم انه ما يدخن داخل سمحوله يدخل كان يمشي صوب الطاوله الي فيها مايد و زايد بخفه و كل شوي يلتفت ورا يكلم المصري ، مر على طاولة البنات جذبته الريحه و وقف يستنشقها ؛
مايد بصوت جداً مسموع موجه حق أحمد و زايد : اسميها تيب الراس
أحمد : شو ؟
مايد : ريحة العطر
أحمد : ها عن هالحركات صك
مايد : عيل وين الباقي ؟
أحمد : على وصول
مايد : هيه محد يلتزم بالمواعيد غيرنا ، عاد انا و انت ( يأشر على أحمد ) طيارين و من صفاتنا الالتزام هذا ( يأشر على زايد ) مادري وين داخل عرض معانا
زايد : لا تنسى اني عسكري سابق
مايد : و النعم والله تشرفنا تشرفنا
زايد : عبيط
* * *
كانت في طاوله قريبه منهم فيها اربع شباب و كانوا منصدمين من التغير الفجائي الي صار و كيف حلت عليهم الهدوء و السكينه :
: خفيفات يوم دخلوا هذيلا اسكتن و احترمن عمارهن
: ولا نحن هب رياييل قدامهن
: خفيفات والله
: طبهن يا ريال لونه ثقلن الحين
: ان مايبت راس وحده فيهم ماكون ولد عزام
* * *
كل شوي حد يا و يلي معاهم لين ما اكتمل العدد ، و عاشه للحين فيها غيضه و تبا تنفعل و تهد على مايد لانه يعتبر اخلف بوعده بس البنات مسكوها و هدوها عشان ما تفضحهم ، قام الي حالف اييب راس وحده فيهم و راح صوبهن ؛
: الحساب عليه
ساره : ليش حد قالك ما عندنا فلوس
: لا حشى
ساره : مشكور اخوي ما يحتاي تدف الحساب
: ما يرد الكريم إلا
شيخه : تدور ربع ؟
( انكر أحمد الصوت لكن ما تجرأ يشوفهن و كمل يسمع سوالف عيال عمه )
: هذي يزاتي و انا ياي اعزمكن
ساره : ياخوي توكل
: يعني اونكن ثقال والله العظيم ولا واحد فيهم ( يأشر على طاولة الشباب ) بيعطيكم ويهه
ساره : يمين بالله لو ما تذلف تشوف هذيل ( تأشر ع عيال عمها ) بيقومون لك
فطيم ( بصوت مسموع ) : والله انا الي بقوم له و بلعن خيره قسم بالله اخليك بيزه ما تسوى
( هني ادرك سالم بوجودهم و قام يهدي بينهم )
سالم : شو صاير ؟
فطيم : ماشي بس واحد كان يبدا درس في الادب و ما قصرت فيه
( فجأه كلهم لفوا و بصوت واحد قالوا " انتوا شو تسوون هني ؟؟ " )
روضه ( تضحك ) : ويوهكم تضحك
راشد : يعني بالله صدفه ؟
ساره : والله ماشي بس عازمتنهن بمناسبة زواجك من الثانيه و زواج هزاع
راشد : والله زين عيل تقبلتوا الموضوع
عاشه : لا انا في واحد بتفاهم معاه عقب
مايد : يعني هي تقصدني الحين ؟
راشد : هيه زين والله عيل احتفالاتكم في تزايد ان شاء الله
روضه : تخسى
هزاع ( بعصبيه ) : رويض
روضه : الريال الي فيكم يتكلم
( صمت )
روضه : شو ولا ريال ؟
أحمد : عاد يا رويض الزمي حدودج احسن لج
ساره : و هي صادقه ما قالت شي غلط واحد من بنت لـ بنت و واحد من برا لـ بار و واحد كل يوم حرمه لين متى ساكتين ان شاء الله ؟!
أحمد : عاد سديتي انتي توفى ريلج و اول واحد ياج وافقتي عليه
ساره : ههههه خلني ساكته عنك ع الاقل بالحلال ( تغمز له ) صح ؟
* * *
محد تعشى دفع زايد الحساب و كل واحد سحب حرمته و ردوا البيت يتفاهمون ،،، الساعه 12 الليل دقت سلمى على نادر ثلاث مرات فيديو كول و مارد عليها لانه مرقد في المستشفى و للحين حرارته مرتفعه و المغذي عليه بعد سابع مره دقت قام نادر و رد عليها ( ما كان منتبه انه فيديو كول ) :
سلمى : نادر ؟ سلامات شو فيك ؟
نادر : الله يسلمج ماشي بس مرتفعه حرارتيه
سلمى : شو هالصوت طوط طوط
نادر : لا تحاتينيه ماشي قلت لج بس حرارتيه مرتفعه
سلمى : صدق ؟؟
نادر : هي والله ، علومج انتي ؟
سلمى : طيبه الحمدالله
نادر : الحمدالله
سلمى : الحين صدق مافيك شي ؟
نادر : هي والله مافيني شي بس حراره
سلمى : الحمدالله الله يشفيك يارب و تقوم بالسلامه
نادر : انتي اهم شي الحين شدي حيلج في دراستج
سلمى : من عيوني يا عيوني
نادر : ترقيتي ؟
سلمى : هيه الحمدالله
نادر : راجعتي حق امتحان اليوم ولا بس معايه
سلمى : هيه راجعت غير عن مراجعتي معاك راجعت يومين زياده
نادر : هيييه عيل فالج العلامه الكامله
سلمى : ان شاء الله اني من الطلع من الامتحان ابشرك اني يايبه العلامه
نادر : و انا من هني باذن الله ابشرج ان حرارتي طبيعيه و طالع من العنايه
سلمى : العنايه ؟!
نادر : هيه لان من الصبح على هالحال ما طاعت تنزل
سلمى : ان شاء الله ان بتطلع و انا بييب العلامه كامله
نادر : باذن الله ، اول ما تبدين قولي هالدعاء ربّ اشرح لى صدري، ويسّر لى أمري، واحلل عقدة من لسانى يفقه قولي، باسم الله الفتاح، اللهم لا سهل إلا ما جعلته سهلا، فإنك إن شئت تجعل الصعب سهلا يا أرحم الراحمين.
سلمى : ان شاء الله ، انزين انا وصلت الجامعه الحين
نادر : سلمى ما اوصيج صلاتج و اذكارج الصباحيه و المسائيه و حجابج
سلمى : بسم الله ليش جي تقول
نادر : تراني كل يوم اوصيج شو ليش جي تقول ؟!
سلمى : ما اعرف هالمره حسيت بشعور قريب
نادر : خلي اكمل وصاتيه هيه الصلاه و الاذكار اليوميه و حجابج حجابج تفهمين ؟ و لسانج مسكيه هب لازم تردين على كل حد تعرفي متى تستخدمينه و دايماً حطي ربج قدام عيوني و كل شي باقي بعده و امج و ابوج رضاهم مهم و تذكري دايماً اني احبج و انج في قلبي
سلمى ( تضحك ) : الحراره ضاربه فيوزاتك
نادر : هذي وصاتيه لج و الحين استودعتج الله و خلي عدل و من تطلعين بشرينيه
سلمى : ان شاء الله ، نادر ؟
نادر : قلبه ؟
سلمى : احبك
نادر : و انا اموووت فيج
* * *
<< يتبع >>
شو توقعاتكم البارت الياي ؟ ؟ اولاً هزاع يستاهل وقفة سلامه ؟ ؟ يستاهل انها تكذب عشانه و تجمله قدامهم ؟ ؟ تحسون سلامه للحين تحبه مثل قبل ولا تبرر لله عشان عياله ؟ ؟ و شو تقصد فطيم يوم قالت : لكلم من نفس الطينه و كل واحد اوسخ عن الثاني ؟؟! تتوقعون سالم و فاطمه يردون حق بعض ولا ؟ ؟ تشوفون ان الي صار في روضه حوبة سلامه و شيخه ؟ ؟ و في شي ثاني بعد بيصير ولا في حوبات غيرها؟ ؟ و شو رايكم بفكرت البنات ؟ ؟ و بالحفله الي صارت في المطعم ؟ ؟ و نادر شو فيه ؟ ؟ توصياته المخيفه !! و الاحساس الغريب الي حست به سلمى وراه شي ؟ ؟ 🤔❤️🔥❤️🔥
* * *
ما قصرت معاكم بالبارت اتمنى انكم ما تقصرون و الكل يكتب توقعاته 🥹🫶🏻
