الساعه 7 المغرب وصلوا الرياييل و استقبلهم عبيد ( بو ساره ) في ميلس الرياييل الخارجي ، ركبت ساره سيارتها بتطلع وهي طالعه انتبهت لفتك موقفه قدام الميلس كانت مجيمه على السياره تحاول تتذكر ( في بالها ) " انا شو ابا فيه ليش احاول اتذكره " ثواني و ايي راعي فتك نفس الرقم بالضبط وقف قدامها فتحت فمها تشوفه باندهاش ، فتحت تلفونها و على طول كتبت له ؛
ساره : شو يابك بيتنا ؟
ذياب : لربما صدفه
ساره : مستحيل
ذياب : ليش ؟ ما تؤمنين بالصدف ؟
ساره : لا
ذياب : يايين نخطب
ساره : حق ؟
ذياب : اخويه
* * *
كانت تشوفه ساره و عيونها مليانيه دموع ، ريوست و راحت ، شغل سيارته و لحقها ، يوم انتبهت انه لحقها راحت الحديريات ، يلست على البحر و يا يلس عدالها ؛
ذياب : ساره شو فيج ؟
ساره : مافيني شي
ذياب : اكيد ؟
ساره : مادري
( قرب ذياب من ساره بيحط يده على كتفها )
ساره وهي تحاول تمنعه : انا الحين عرض اخوك و شرفه
ذياب : الحين عرفتي العرض و الشرف ؟
ساره ( باستغراب ) : شو تقصد ؟
ذياب : لا ما اقصد شي
ساره : هيه زين
ذياب : انا للحين احبج و اباج
ساره : عيب عليك ، انا الحين باخذ اخوك
ذياب : ليش انتي من بد بنات العالم ؟
ساره : نصيب
ذياب : بس انا الي استاهلج
ساره : انت متزوج و عندك عيال
ذياب : الشرع حلل اربع
ساره : و ليش ان شاء الله اهدم بيت ؟ شو الي بيحدني اسوي جي
ذياب : ما تحبيني ؟
ساره : لا ، قلبي ماسكنه غير واحد و دفنه معاه
ذياب : انتي جي تظلمين اخوي
ساره : ما بظلمه
* * *
دق بو ذياب على ذياب و قام عشان يرد عليه و ساره ابوها دق لها ؛
عبيد ( بو ساره ) : وينج ؟
ساره : طالعه اشم هوا
عبيد ( بو ساره ) : ردي الحين ، الريال يبا يشوفج
ساره : اذكر البنت الي تطلب نظره شرعيه
عبيد ( بو ساره ) : نتفاهم عقب ردي
ساره : يلا راده عطني عشر دقايق
عبيد ( بو ساره ) : زين
* * *
دخل راشد البيت و شاف العامله قاعده مع أمل في الصاله و عصب و روضه في الغرفه تتعدل بتروح عرس ربيعتها ؛
راشد : هاتي أمل و انتي روحي
* * *
راشد ( يصارخ ) : روضه ، روضه
طلعت روضه من الغرفه خايفه : هلا ؟
( دخل فارس )
راشد( بعصبيه ) : كم مره قلت لج ما تخلين أمل عند العامله
روضه : شو اسوي لا انت ولا فارس في البيت
راشد ( بعصبيه ) : خليها عندج شو مستوي عليج
روضه : كيف بشوفها و انا اتعدل ؟
راشد : لا تتعدلين ترييني ارجع
فارس : خلاص ابويه هد الحين و ما يصير خاطرك إلا طيب
راشد : سولي كوفي
فارس : ان شاء الله
* * *
راحت روضه فوق و هي تتأفف ، حط راشد أمل في شبك الالعاب و استوعب انه صغير عليها و صارت تعرف كيف تطلع منه ، فتح نون يطلب لها غيره و بالمره طلب لها العاب على عمرها ، ياب فارس الكوفي لراشد و راح يسوي كوب ثاني حق روضه ؛
فارس : اميه لا تتضايقين من كلام ابويه
روضه : عادي متعوده
فارس : بس صدقه ما عنده غيرها اكيد بيخاف عليها
روضه : وانت ؟ ولدنا و منا و فينا
فارس : لا اقص عليج ولا تقضين علي ، تبقى أمل وحيدتكم
روضه : مهما زاد غلاها تبقى انت الأول
فارس : ياحبي لج
روضه : اباك انت توصلني و شل أمل معاك خلها عندك
فارس : بس ابوي بيوصلج
روضه : مابا مزاجي يتعكر
* * *
نزل فارس بيطلع يشغل السياره ، و ناداه راشد ؛
راشد : امك خلصت ؟
فارس : هيه تباني انا اوصلها
راشد : انا بوصلها
فارس : ما تبا تروح معاك
راشد : هب على كيفها ، شل أمل معاك ، امك انا بوصلها
( شل فارس أنا و راح صوب الباب بيطلع )
طلع راشد مفتاح سيارته : هاك مفتاح سيارتيه و عطني مفتاح سيارتك
* * *
نزلت روضه و كله على بالها ان الي في السياره فارس ، ركبت و سكرت الباب ؛
روضه : يارب ما تأخرت عليك
( التفتت و شافت راشد بصدمه )
راشد : انتظرج العمر كله
روضه : فارس وين ؟ انا قايله حق فارس يوصلني
راشد : هالزين كله فارس يشوفه و انا لا ؟
روضه و هي تسكر عباتها : زعلانه منك
راشد : ما يهون عليه تزعلين
روضه : و هب راضيه إلا بشي يسوى
راشد : و شو الي يسوى ؟
روضه : عقد الفردان ولا HARRY WINSTON
راشد : هيييه هذا بيعيني و اشتريه
روضه : افا
راشد : المشكله انج روضة القلب الي تبينه تم و على هالخشم
* * *
دق فارس على سلمى تطلعله و تشل أمل تشوفها شوي لين مايرجع من عند الشباب ؛
سلمى : لا والله هاي انا ما اقدر اشوفها
فارس : نص ساعه بس
سلمى : ولا حتى خمس دقايق اذا صار شي بتقوم الدنيا ع راسيه
فارس : يا الله
سلمى : شلها معاك
فارس : و يقعد رشود يتهندق عليه يوم يصورونها
* * *
ما عنده حل غير انه يوديها معاه ، حطها في الكارسيت و راح للكوفي الي دايماً يتلاقون فيه. كانوا الشباب مستانسين على أمل و أمل من طاوله بطاوله في الكوفي لان ويها سمح و بشوش تضحك للرايح و الياي و تتمشى حولهم بخطواتها الثقيله ، في طاوله قريبه منهم حرمه كبيره مع بنتها و عيالها الاثنين في بداية العشرينات تقريباً ، تشوف أمل و تمسي عليها بالرحمن و تغني لها " يا ارض لا ترتاعين- يمشن فوقج كراعين " كانت ترددها الأم و هي تصفق لها و أمل مستانسه تبا تروح صوبها لكن كل شوي تطيح و فارس يساعدها توقف ، وصلت البنت للحرمه و مدت يدها شلتها و يبينها فوقها تقرا عليها ؛
الحرمه : يا بوسه هذي بنتك ؟
فارس : لا يا اميه هذي اختيه
الحرمه : سم عليها بسم الله و اقرا المعوذات العين حق و الذكر عباده
فارس : والله اني احصنها كل يوم
الحرمه : معليه هاي وصيتيه لك ، البنت ما شاء الله ماتخاف و ويها سمح ، ربي يسعدها اضعاف اضعاف الفرحه الي اشوفها في ويه كل من دخل الكوفي
فارس : آمين يارب ولج بالمثل
الحرمه و هي تبوس أمل : يا ارض لا ترتاعين يمشن فوقج كراعين ، استودعتج الله لي عينه ما تنام
* * *
طلع أحمد من قسمه و هو نازل سمع صوت هزاع و فيصل يتواقعون و الصوت طالع من غرفة فيصل ، رجع بخطوات خفيفه و لان الباب مفتوح شوي وقف يشوفهم و يسمعهم ، كان هزاع ماسك فيصل بيديه من قميصه و يضربه على الساس ؛
هزاع : طلعها من راسك حرمة اخوك هاي
فيصل : ما قدر
هزاع : فيصل بذبحك
أحمد ( في باله ) : ليكون حاط عينه على سلامه والله مايخليه هزاع
فيصل : و اخويه شو رده ؟
هزاع : شو الي شو رده تستهبل انت ؟
فيصل : يخي ليتني تسرعت و خليتها تخلعه و خذتها
هزاع : يا كلب يا حيوان انت شو ما تفهم هاي عرض اخوك و شرفه شلها من راسك لا والله ما يحصل خير
فيصل : احبها احبها
هزاع : حبتك بقره ان شاء الله
فيصل : يخي صدق شو رده
* * *
استوعب أحمد ان احساسه كان في محله و ان فيصل عينه على شيخه و كان قاصد و هو يكون محمد بحسبة ولدي و كان يلعبها صح في فترة غيابه ، رجع أحمد لقسمه و امر شيخه تلم كل اغراضها و بكون اي نقاش عشان ينتقلون و يسكنون بروحهم.
* * *
ركبت روضه السياره تتأفف ؛
راشد : شو فيج ؟
روضه : متكشخه و متعدله على الفاضي
راشد : ليش ؟
روضه : تخيل المقدمين رياييل لا وتكرمي و من عيوني
راشد : لا عاد
روضه : والله العظيم ، و بعد يايبين مغني
راشد : معليه حللي كشختج لي ، تعشيتي ؟
روضه : لا منغثه
فتح راشد تلفونه و دق على مطعم زوما و حطه سبيكر :الو السلام عليكم ... زين عيل تقولين كاشخه على الفاضي ... A romantic private dinner table please I'll come after 10 minutes exactly.
روضه : وين تباني انزل جي ؟
راشد : عادي اتغشي بشيلتج
* * *
بعد العشا ردوا البيت و حللت روضه كشختها و تصورت مع راشد ألف صوره ،،، بعد مرور اسبوع و ثلاثة ايام ،،، ملت سلمى من الوضع الي هي فيه و اشتاقت حق نادر بس تدري ان الي قاعده تسويه هو الصح و لازم تتغلب على الشوق ، الساعه 2 الليل طفح الكيل و نزلت لابوها فتحت باب المكتب بقوه ؛
سلمى : باباه طلبتك
زايد : ما اقدر اقول ان ايام العز و الدلال انسيها
سلمى : هب موضوع فلوس ولا مشتريات
زايد : عيل ؟
سلمى : ابا نادر اشتقت له
زايد : سلمى تقدرين تتغلبين على شوفج له
سلمى : ما اقدر ما اقدر ما اقدر ، كنت اكذب على نفسي كل يوم لكن مرن اسبوعين و احس اني مخنوقه اباه ، ابويه والله ما اقدر يخي شو بيضركم لو ملج عليه ، جي بتفتكون و بكون حلاله
زايد : انتي تعبانه ، روحي ارقدي الوقت متأخر
سلمى : لا هب تعبانه انا ميته شوق والله العظيم
طلع زايد شنطة فحص السكر و قاس سكرها : سكرج زين
سلمى : اقولك مافيني شي بس ميته ولهه و شوق
زايد ( بعصبيه ) : سلمى انا ابوج ما تستحين جي تقوليلي ؟
سلمى : اذا ما قلت لك انت ، تباني اقول حق منو ؟
زايد : يصير خير نتفاهم باجر ان شاء الله الحين روحي حطي راسج و ارقدي
* * *
<< يتبع >>
شو توقعاتكم للبارت الياي ؟ ؟ ليش اخو ذياب من بد كل هالناس ؟ ؟ تتوقعون ذياب بيسوي شي و بيخرب عليهم ؟ ؟ و راشد له حق يعصب على روضه ؟ ؟ أحمد ليش سكت و ما ابدا اي ردة فعل ؟ ؟ و كنت متوقعين فيصل جي يطلع ؟ ؟ انزين سلمى و نادر شو بيصير عليهم ؟ ؟
* * *
تفاعلكم على هالبارت بيحدد اذا البارت الياي بيكون اخر بارت و جي ننهي الروايه ولا اكمل الروايه 🫡.
