دخلت نجود العزا بكل همجيه تصارخ على ساره و تقول كلام ماله معنى و مثل السم و ساره ساكته ولا قالت لها اي شي ، لانها حاسه بـ شعور نجود .
* * *
( بعد مرور فتره )
الساعه تسع الصبح دخل عبيد ( بو ساره ) غرفه ساره :
عبيد : صباح الخير
ساره : هلا ابويه صباح النور
عبيد : شو بتسمين الولد بروح اخلص إجراءاته
ساره : بسميه سيف
عبيد ( باستغراب ) : سيف ؟
ساره : هيه ، ياسر الله يرحمه موصيني اذا ولد اسميه سيف
عبيد : الله يرحمه
* * *
طلع عبيد و دخلت الممرضه يايبه البيبي ، حطت ساره سيف على صدرها و يلست اتخيل لو ياسر كان موجود كيف كل شي بيكون غير ، دخلت ( عوشه ) ام ساره ؛
عوشه : تغطي الدريول بيدخل الفواله و الدلال
ساره : هب لازم ، بس مطي الستاره
عوشه : تبينين
* * *
سحبت ساره اللحاف و غطت عمرها ، دخل الدريول و حط الفواله و الدلال على الطاوله و طلع ، اعلنوا عن اسم البيبي و وصل الخبر حق نجود و بدون اي تفكير ركبت مع الدريول و راحت للمستشفى ، سألت عن غرفة ساره و عطوها رقم الغرفه ، دخلت نجود تصارخ و سحبت منز البيبي ؛
نجود ( تصارخو بدون اي تفكير ) : و تسمينه سيف ؟ ، هذا الولد ولديه مستحيل اخليه عندج
عوشه ( ام ساره ) : نجود استهدي بالله
نجود ( تتأمل بيبي سيف ) : هذا سيف ولديه هب ولدج
( دخلت منال ( ام ياسر ) )
منال ( باستغراب ) : نجود ؟
نجود : خالتيه سمته سيف
منال و هي تشوف ساره : صدق ؟
ساره ( وهي اشوف عمتها بنظره ) : هيه سميته سيف
منال : و ليش تسمينه سيف ؟ الموضوع عناد و غياض ؟
ساره : لا بس ياسر موصيني اذا يبت ولد اسميه سيف
منال : ما شاء الله
عوشه ( ام ساره ) : فديتج يا ام مايد خذي نجود و طلعيها
نجود : ما بطلع
منال : تطرديني يا عوشه ؟
عوشه ( ام ساره ) : لا حشى
( طلعت عوشه و بنت اخوها نجود )
عوشه ( ام ساره ) : في شي بينج وين عمتج ؟
ساره : من يومها ما تدانيني
عوشه ( ام ساره ) : شي مسويه ؟
ساره : ماخذه ولدها غصباً عنها
عوشه ( ام ساره ) : في ذمتج
ساره : والله تراها ما كانت تباني حق ولدها و دايماً تعق كلام عن الحشمه و تقارني بـ شمسه و عاشه و نوره
عوشه ( ام ساره ) : و انتي ساكته و متحمله
ساره : لا احترمها قدام الناس لكن بيني و بينها ارد ما اسكت و اذا ياسر كان موجود ما يسكت لها
عوشه ( ام ساره ) : ربي فكج منها
ساره : ه ه لكن ع حساب شو
عوشه ( ام ساره ) : الله يرحمه
ساره : اميه تدرين في فكره دوم اتي في بالي و اطردها بس دايماً ترد
عوشه ( ام ساره ) : شو ؟
ساره : عمتيه الي داعيه على ياسر يموت
عوشه ( ام ساره ) : استغفرالله ، لا تقولين جي ها ولدها كيف بتدعي عليه
ساره : والله الليله الي قبل الحادث سمعتها اقول له يعلك ما ترد بعصبيه و صوتها كان عالي وصل للغرفه بعدها بثواني دخل ياسر و كان لاين من ويهه انه متضايق
عوشه ( ام ساره ) : ماتدرين شو صار بوقتها معاهم
ساره : صح ما ادري بس سمعت الدعوه
عوشه ( ام ساره ) : الله يرحمه كان وايد متعبنها
ساره : بس هب تدعي عليه مافي ام تدعي على ولدها
عوشه ( ام ساره ) : ما تدرين الحرمه في شو كانت اخر ولا كيف كان يومها
ساره : عاد إلا عمتيه عايشه حق نفسها و بس مثلج
عوشه ( ام ساره ) : بتجلبين الموضوع عليه يعني ؟
ساره : لا
* * *
( حديقة بيت زايد )
كان زايد قاعد مع عمر و سعود و نادر ، و سهيل و يابر يلعبون مع سيف و حمد كره طايره و شمسه في ركلها و لميا تشوفها ، طلعت سلمى من المطبخ و في يدها صينيه فيها جيزكيك ، طلعت لهم شمسه مستانسه ؛
شمسه : عمر عندي لك خبر حلو
عمر : الي هو ؟
شمسه : لقيت لك بنت الحلال
عمر : منو هاي الي بترضى بشيبه ؟
شمسه : ليش شيبه ؟ انت توك في عز شبابك
زايد : معليج منه
سعود : انزين و انا شو صار على موضوعيه ؟
شمسه : وييي زين ذكرتني ، خلاص انت ان شاء الله هالاسبوع بنخطب رسمي
( قامت شمسه و دقت على ام ميره عشان يحددون يوم الخطوبه و رجعت لهم )
زايد : ها شو صار ؟
شمسه : خلاص يوم الاحد ان شاء الله بتودي الذهب و الفلوس
سلمى : ماماه ميره فيها حساسيه من الذهب
شمسه : صدق ؟
سلمى : هييه
شمسه : عادي في ماده بنحط على الذهب
سلمى : بس غاليه
سعود : عادي الغالي يرخص لها
سلمى : الله الله
زايد : سلمى كلاسج
سلمى : ويييي
شمسه : حد ياخذ كلاسات العصر لين الليل
سلمى : لا تنسين ان عندي كلاسات الصبح بعد
زايد : متى تتخرجين ؟
سلمى : يبالي سنه و نص ان شاء الله
زايد : ما شاء الله
سلمى : هي باباه انا ادرس و اخذ مواد ما العب
زايد : عيشي حياتج هب لازم تخلصين بسرعه
سلمى : ابا اعرس
زايد : موضوع العرس انتهينا منه تخرجي و اشتغلي عقب يصير خير
سلمى : بعد اشتغل ؟ قبل كنت بس تقول تخرجي من الجامعه الحين اشتغلي ؟ شو انت ما تباني اعرس
( راحت سلمى تلبس عباتها )
سعود : انا اول مره اشوف بنت تركض ورا العرس
زايد : وييي سلمى هاي اعجوبة زمانها من اول ما كورس اها في الجامعه و هي تقولي بابا محد خطبني بابا ابا اعرس و كل مره اقوله بعد ما تتخرجين
سعود : جان زوجتها
شمسه : لا صعبه مابتقدر توازن الأمور
* * *
دخلت سياره و نزلت منال ( ام مايد ) و معاها نجود كان زايد مستغرب امه يايه و معاها نجود حس ان في شي ، يلسوا و الشباب قاموا و راحوا بيتهم ، طلعت سلمى تدور نادر ، سلمت على يدتها لكنها سحبت على نجود ؛
سلمى : نادر وين ؟
زايد : خلي يابر يوصلج
سلمى : مابا نادر بيوصلني
منال ( ام مايد ) بعصبيه : و انتي ما تستحين ؟ خلي يابر يوصلج
سلمى : زين
* * *
ركبت سلمى مع يابر لكن وقفوا برا و دقت سلمى على نادر يطلع لها ، ركب سيارته نادر و طلع لها نزلت من سيارة يابر و قالت له يروح على اساس هو الي بيوصلها و ركبت مع نادر ، وصلها نادر للجامعه ، اما ام مايد جلطت زايد بطلبها انه يتزوج نجود ، كانت صدمه صاعقه لـ زايد و شمسه .
* * *
<< يتبع >>
شو توقعاتكم للبارت الياي ؟ ؟ شو ممكن ساره تسوي ؟ و كيف بتكون ردة فعل زايد بعد طلب امه ؟ و سلمى و نادر بيتزوجون قريب ؟؟ 🤔❤️🔥
