[[Completed]] နိဒါန်းပျိုးခဲ့ကြပြီ (နိဒါန္းပ်ိဳးခဲ့ၾကၿပီ)

အခန်း (၅)

အာ့တ်လက်စ်

"ဒါ သေချာပေါက်ပစ်မှတ်ထားခံရတာပဲ" ဘရတ်က မှုတ်ဆေးနဲ့ဆွဲထားသည့်ဟာကို စိုက်ကြည့်ရင်းဆိုလာတယ်။

ပြီးခဲ့တဲ့(၂)ညက Bib'sမှာ လက်သရမ်းပြီးဖျက်ဆီးသွားခဲ့တဲ့သူက ကျွန်တော့ရဲ့အသစ်စက်စက်စားသောက်ဆိုင်ကို မနေ့ညက လာရိုက်ဖျက်ဖို့ ဆုံးဖြတ်ခဲ့တယ်။ Corrigan'sမှာ ပြတင်းတံခါး(၂)ချပ်ပျက်စီးနေပြီး နောက်ဖေးတံခါးမှာ နောက်ထပ်မှုတ်ဆေးနဲ့ခြယ်ထားတဲ့စာတစ်ခု ရှိနေတယ်။

-ိုးမ အာ့တ်လက်စ်

သူတို့က ကျွန်တော့နာမည်မှာ 's'တစ်လုံးပိုထည့်ပြီး 'ass'ကို မျဉ်းသားထားတယ်(Atlass)။ အဲ့ဒီဉာဏ်ကောင်းမှုကြီးကို ကျွန်တော်ရယ်ချင်သွားမှန်း ကိုယ့်ဘာသာသတိထားမိလိုက်တယ်။ ဒါပေမဲ့လည်း ဒီမနက် ကျွန်တော့စိတ်က ဟာသလုပ်ချင်စိတ်ရှိမနေဘူး။

မနေ့က လက်သရမ်းဖျက်ဆီးသွားတဲ့ဟာက ကျွန်တော့ကို ဖြုံမိသွားရုံလောက်ပဲဖြစ်စေခဲ့တယ်။ အဲ့ဒါက ကျွန်တော်လီလီနဲ့တိုးထားပြီးကာစ၊ အရမ်းတွေပျော်ရွှင်စိတ်လှုပ်ရှားနေတုန်းမို့လို့လားတော့ မသိပါဘူး။ ဒါပေမဲ့ ဒီမနက် ကျွန်တော်နိုးလာတော့ သူမ ကျွန်တော့ကိုသိသိသာသာရှောင်နေတာကြီး စိတ်ထဲစွဲနေတယ်လေ။ အဲ့ဒါကြောင့် ကျွန်တော့ရဲ့အသစ်စက်စက်စားသောက်ဆိုင်ကို ဖျက်ဆီးလာတာက အဲ့ဒါကို နည်းနည်းပိုနက်သွားအောင် လှီးပစ်လိုက်တဲ့အတိုင်းပဲ။

"ငါ လုံခြုံရေးကင်မရာမှတ်တမ်းကို သွားစစ်ကြည့်လိုက်ဦးမယ်" တစ်ခုခုအသုံးဝင်တာမျိုးပြလာပေးဖို့ မျှော်လင့်မိတာပဲ။ ကျွန်တော် ရဲတွေနဲ့စခန်းသွားချင်ရဲ့လားဆိုတာ အခုထိမသိသေးဘူး။ ကျွန်တော်သိတဲ့တစ်ယောက်ယောက်ဖြစ်ချင်ဖြစ်နေရင် မတတ်သာတဲ့အဆုံး အဲ့ဒီလိုလုပ်ဖို့ အတင်းတွန်းအားပေးမခံရခင် အနည်းဆုံးတော့ သူတို့နဲ့ထိပ်တိုက်ရင်ဆိုင်လိုက်လို့ရသေးတာပေါ့။

ဘရတ်က ကျွန်တော်ရုံးခန်းထဲလိုက်လာတယ်။ ကျွန်တော် ကွန်ပျူတာဖွင့်ပြီး လုံခြုံရေးစနစ်ရဲ့appကိုဖွင့်လိုက်တယ်။ ကျွန်တော်ခံပြင်းနေမှန်း ဘရတ်ခံစားလို့ရနေတယ် ထင်တာပဲ။ ဘာလို့လဲဆိုတော့ ကျွန်တော် လုံခြုံရေးကင်မရာမှတ်တမ်းကို မိနစ်တွေနဲ့ချီပြီးရှာနေတုန်းမှာ သူ့ဘက်က စကားဆိုမလာခဲ့ဘူးလေ။