Chapter 253: အဆံချောင်နဲ့ အမှိုက်ကောင်
သင်သည် ချန်ရွှမ်း ထံမှ အမျက်ပွိုင့် ၉၉၉ ရရှိလိုက်သည်။
သင်သည် ကျင်းဖန် ထံမှ အမျက်ပွိုင့် ၉၉၉ ရရှိလိုက်သည်။
သင်သည် ချူဟုန်ခိုင် ထံမှ အမျက်ပွိုင့် ၉၉၉ ရရှိလိုက်သည်။
သင်သည်....
အသစ်ရောက်ရှိလာသော အမျက်ပွိုင့် လှိုင်းတစ်ခုပြီးတစ်ခုစီကို ကြည့်ကာ ဇူအန် ကျေနပ်အားရနေသည်။
တကယ်ကိုပဲယယယ ထူးခြားတဲ့လူက ထူးခြားတဲ့အလုပ်တွေကို လုပ်ရတာပဲ။
ထိုလူများမှာ သူ၏ အသက်ကို လိုချင်နေသည့်ပုံ ရှိနေသောကြောင့် ဤနေရာတွင် ဆက်လက်နေကာ အထုထောင်းခံရလောက်အောင် မမိုက်မဲတော့ပေ။
မည်သူမှ မတုန့်ပြန်နိုင်ခင်တွင် အရိပ်အယောင်ပင် မချန်ခဲ့ဘဲ ထွက်ပြေးလွတ်မြောက်သွားပြီဖြစ်သည်။ သူ၏အနောက်ကို ဒေါသထွက်နေသော လူအုပ်ကြီး မလိုက်သွားအောင် အင်မော်တယ်ဗိမ္မာန် ၏ ဝန်ထမ်းများ က ကြိုးစားပမ်းစား တားဆီးပေးလိုက်ရသည်။
အစ်မဟွား က သူမ၏ လက်အောက်ငယ်သားများကို ဒေါသထွက်နေသည့် လူအုပ်ကြီးအား ထိန်းရန် တောက်လျှောက်ညွှန်ကြားနေရသည်။ ဇူအန်၏ ပျောက်ကွယ်သွားသော အရိပ်ကို မုန်းတီးသော အကြည့်တစ်ချက် ကြည့်လိုက်သည်။ ဒီကောင်က ပြဿနာ ဘယ်လိုရှာရမလဲဆိုတာကို ကောင်းကောင်းသိတာပဲ။ အခုတော့ ဒီအရှုပ်ထုပ်ကို ငါ ရှင်းပေးနေရပြီ။
ဇူအန်ကတော့ ပျော်ရွှင်စွာ အခိုင်းအစေ၏ အနောက်သို့ လိုက်ပါသွားလေသည်။ ဤကဲ့သို့သော နေရာမျိုးကို သူ ထပ်လာရောက်သင့်သည်ဟု တွေးတောနေမိသည်။
ဟုတ်တာပေါ့။ ငါ့လို အံသြစရာလူမျိုးက ဒီလိုနေရာကို မိန်းကလေးတွေအတွက်ကြောင့် လာမှာမဟုတ်ဘူး။ ဒါပေမယ့် ဒီနေရာမှာ အမျက်ပွိုင့် ရှာရတာ တကယ်ကို လွယ်ကူလွန်းနေရုံပဲ။
အကြမ်းဖျင်း တွက်ချက်ကြည့်ပြီးနောက် အင်မော်တယ်ဗိမ္မာန် တွင် သူ ရရှိလိုက်သော အမျက်ပွိုင့်ကိန်းဂဏန်းမှာ ယခင်အကြိမ်များထက် များစွာ ပိုနေသည်ကို တွေ့လိုက်ရသည်။
အကယ်၍ ယခုကဲ့သို့ အမျက်ပွိုင့် များစွာ နေ့တိုင်း ရိတ်သိမ်းနိုင်ပါက မသေမျိုးအဖြစ်သို့ တက်ရောက်နိုင်ရန်မှာ မဖြစ်နိုင်သော အိမ်မက်တစ်ခု မဟုတ်တော့ပေ။
