Chapter 298: ရှင် အဆင်ပြေရဲ့လား
အံသြမှုကြောင့် ဇူအန် ထခုန်လိုက်မိသည်။ “မင်း စိတ်ထဲမထားရင်တောင် ငါထားတယ်။ ငါက ခန္ဓာကိုယ်ကို အဲ့ဒီလိုမျိုး ရောင်းစားမယ့်လူနဲ့ တူနေလို့လား”
ချူချူယန်၏ မျက်နှာ အနည်းငယ် နီမြန်းသွားသည်။ ထိုကဲ့သို့သော အရာမျိုး လုပ်ရန် မေးမိခြင်းကို အနည်းငယ်လွန်သွားသည်ဟု သူမ လည်း ခံစားမိလိုက်သည်။ “တောင်းပန်ပါတယ်။...အခုတလော ချူကလန်ကိစ္စတွေ အပေါ်မှာ အနည်းငယ် စိတ်ဖိစီးနေလို့ မစဉ်းမစားဘဲ လွှတ်ခနဲ ပြောထွက်မိသွားတယ်။ အဲ့ဒီစကားတွေကို အတည်မယူလိုက်ပါနဲ့”
ဇူအန် လက် ရမ်းလိုက်သည်။ “အဲ့ဒီကိစ္စတွေက မင်းကို အခက်တွေ့စေတယ်ဆိုရင် မင်းရဲ့ ခင်ပွန်းအနေနဲ့ ငါလည်း ဝန်ကူထမ်းပေးမှာပေါ့။ ကျန်းတန် ဆီကနေ သတင်းရယူဖို့ ငါ လုပ်နိုင်သမျှ လုပ်မယ်”
“ခဏလေးနေပါဦး။ ဒီအစီအစဉ်အတိုင်း ဆက်သွားသင့်တယ်လို့ မထင်ဘူး” ရှို့ဟုန်လေ ကို ချဉ်းကပ်ခိုင်းခဲ့စဉ်က အဖြစ်ကို သူမ ရုတ်တရက် ပြန်တွေးမိလိုက်သည်။ ဇူအန်ကို သူမ စေလွှတ်လိုက်ပြီးနောက် ရက်အနည်းငယ် အကြာတွင် ရှို့ဟုန်လေ မှာ ချူအိမ်ပေါက်၀တိုင် ရောက်ရှိလာသည်။ ဟိုဟိုသည်သည် အကြောင်းပြကာ သူမက ဇူအန်ကို လုံးဝ လက်ထပ်ရမည်ဟု မျက်ရည်ခံထိုး တောင်းဆိုခဲ့သည်။
ဒီတစ်ခါရော ဒီလိုမျိုး ဒုတိယအကြိမ် ထပ်ဖြစ်လာဦးမှာလား။
ဇူအန် က သူမလက်ကို ကိုင်လိုက်သည်။ “အဲ့ဒါက မင်းအတွက် အကူအညီဖြစ်နေသရွေ့ ငါ့သိက္ခာက ဘာတန်လို့လဲ” သူ အလေးအနက် ပြောလိုက်သည်။
ချူချူယန်၏ နှလုံးသား ပျော့ပျောင်းသွားသည်။ သူမ၏ အသံမှာလည်း အလွန်နွေးထွေးသွားသည်။ “အားဇူ ရှင့်ကို ပင်ပန်းစေမိပြီ”
ချူချူယန် အိမ်သို့ပြန်ရောက်သွားသောအခါ တစ်စုံတစ်ရာ လိုအပ်နေသလို ခံစားခဲ့ရသည်။ အဘယ်ကြောင့် တစ်ခုခုမူမမှန် ဟု သူမ ခံစားနေရပါသနည်း။
ဇူအန်ကို ချူဟွမ်ကျောက် က အကယ်ဒမီသို့ ဆွဲခေါ်သွားပြီးဖြစ်သည်။
ချူဟွမ်ကျောက် က အကယ်ဒမီသို့ လမ်းတစ်လျှောက်တွင် ဇူအန်ကို သူမ၏ ကြာပွတ်ဖြင့် ရွယ်ထားသည်။ “ရှင်နဲ့ ရှို့ဟုန်လေ တို့ကြားမှာ ဘာတွေဖြစ်နေတာလဲ”
