نـيـران الـغـجـريـة

الخاتمة ( القسم الثاني ) : طريق العشق.

آخر جزء من الرواية ، قراءة ممتعة
الخاتمة ( القسم الثاني ) : طريق العشق.

💖💖💖💖💖💖

" الحب الحقيقي لا يموت بل يبقى حتى النهاية ، إذا كان هناك من يحبك فأنت إنسان محظوظ وإذا كان صادقاً في حبه فأنت أكثر الناس حظاً " # مقتبس

بعد مرور ثلاث سنوات.
داخل شركة البحيري و بالضبط في مكتب رئيس قسم الترجمة.
اعتدلت في جلستها بمرونة تحدق في الأوراق و الجهاز أمامها بتركيز حتى طرقت المساعدة الباب و دلفت متمتمة بإحترام :
- مدام مريم  دول الملفات اللي حضرتك طلبتيهم مني.

حادت بعينيها عن الحاسوب و قالت :
-  تمام شكرا، المتدربين اللي دخلو النهارده عاملين ايه معاهم.
- احنا بنعملهم تقييم من دلوقتي بفضل الدورات اللي حضرتك فتحتيها قدرنا نستقطب عدد كبير من الناس اللي عندها مؤهلات و ملقيناش مشاكل معاهم.
- عايزاكم متتساهلوش معاهم بس تقدمولهم كل اللي بيحتاجوه في التدريب و اه ابعتيلي التفاصيل ع الايميل هبقى اراجعهم وانا في البيت.
- أمرك يا فندم عايزة حاجة تانية مني.
-  No Thanks تقدري تتفضلي.

اِستأذنت المساعدة و غادرت أما مريم فنظرت إلى ساعة يدها تتحقق من الوقت ثم طالعت صورة زفافها الموضوعة على سطح المكتب بإkبتسامة لتغلق الحاسوب و ترتدي الجاكيت الخاص بها و تتوجه إلى مكتب عمار ، طرقت الباب و دخلت مرددة :
- مش كفاية شغل بقى اليوم خلص.

رفع رأسه إليها و ابتسم بهدوء :
- وحشتك ولا ايه خلاص فاضلي حاجات بسيطة و اخلص.

سارت مريم نحوه و أغلقت الجهاز وهي تقول :
- ايوة وحشتني عشان كده انا جاية اخطفك.

أمسكت يده لينهض عمار ثم حاوط خصرها وجذبها مغمغما بتلاعب :
- متشوق اعرف هتخطفيني تعملي بيا ايه.

ضحكت مريم و تمنعت عنه بدلال عندما أراد تقبيلها :
- انت نسيت ان وليد وهالة عاملين عزومة طنط سعاد و رأفت بيه هيبقو موجودين كمان.
- عزومة ايه ديه لا مش فاكر خالص.

زمت شفتيها بحنق فوكزته بخفة وهي تهتف :
- بلاش تتهرب يا عمار انت عارف ان صاحبك مبسوط عشان عرف ان هالة هتجيب بنوتة و عايز يحتفل معاك بما ان يوسف مسافر.

صمتت قليلا تتلاعب بأزرار قميصه ثم أرفدت بنبرة خافتة دون أن تنظر له :
- ولو انت خايف عليا ازعل و احس بالنقص متقلقش مش هعمل كده بالعكس هفرح لان هالة ديه اختي.

تجهم وجه عمار و طالعها بهدوء وقد استطاعت كشف سبب رفضه للدعوة فهي رغم ادعائها عدم تأثرها بموضوع الحمل و الإنجاب إلا أنه يعلم جيدا مدى شوقها لأن تعيش إحساس الأمومة ، يراها تتأمل صور الأطفال بلهفة و تتصفح حساباتهم على مواقع التواصل و يرى لمعة عينيها عندما يكونان سويا في الشارع فترى طفلا بصحبة والديه و ملابس الصغار المعروضة في المحلات.
لقد مرت سنوات على مريم وهي تتلقى للعلاج و تحسنت حالتها الصحية بالفعل لكن لم يحدث حمل بعد كانت في البداية تنهار و تتلف أعصابها عندما تعتقد بأنها حامل ثم يخيب أملها ، غير أنها مع مرور الوقت أصبحت أكثر عقلانية و تفهما لكن هذا لم يمنع شعورها المتواصل بالحزن خاصة عند تلقي تلك الأسئلة المتطفلة من الناس عن سبب عدم إنجابها لحد الآن.