حب من نار

1

واقفة قدام الباب تتشير لختها و دموعها فعينيها تيهبطو بحرارة .. فراق العام لي كانو تفارقو اثر عليها بزاف و ولات تخاف تخسر ختها ... ولكن هاد المرة قلبها مطمأن انها غادا مع راجلها وهي فرحانة...

رجعات اللور حاطة ايديها على قلبها تتنهد بشوية ... ختها فازت بحب حياتها و هاهيا غادا تبني حياتها معاه فبلاد بعيدة و حتا هي عندها امل صغير ان الشخص لي بغااات و لي كتاب ليها تكون مرتو فظروف غامظة يبغيها شي نهار و تعيش معاه السعادة لي تتقلب عليها ...

سدات عينيها تتفكر اخر كلامو ليها .. عارفاه باقي مجروح و قلبو صعيب ينسا ختها و لكن كلامو ليها كان تيشع بالامل ...

حلات عينيها على اثر لمسة فوق حنكها .. بتاسمات ابتسامة بشوشة وهي تتشوف فيه..

عمر: ختي .. مالك..

تنهدات: والو .. انتوحش ختي ..

عنقها من كتفها: كلنا انتوحشوها .. دوز شي شهورا و نديك عندها ..

نور: بصح ..

عمر: عمري كذبت عليك..

حركات راسها بلاا و تخشات فيه عنقاتو: انتوحشكم كاملين ..

نزل راسو حتا شاف فيها: انا غا حداك علاش اتوحشيني..

سرطات ريقها و شافت فيه: خويا . بغيت نقولك شي حاجة..

رجع اللور حاط ايديه على خصرو: لي هيااا...

نور: جا يحيى قبيلا و قاليا ايرجع باش يديني ..

دور وجهو تيسوط: نور .. راك غا تتخربقي جلسي فداركم و طلاقك انجيبو ليك بين ايديك.. يحيى ميصلاحش ليك..

نور غا سمعات الطلاق وهي تخرج عينيها: لااا لاا اخويا هو راه تبدل والله ..

عمر: تبدل .. واض عميا ولا باغا تعماي بزز .. متتشوفيش عينيه اش تينطقو و لا حتا لهاد الدرجة عينيك تعماو .. كلشي فيه تينطق بختك و تيقي بيا لي تيبغي صعيب ينسا اختي صعيب ..

حدرات راسها و عينيها عمرو دموع: متبقاش تقول هاكا عفاك .. قمر صافي تزوجات وكلشي عرف و هو تقبل وقاليا غادي ينساا و مبغاش نطلقو بغاني نعطيه فرصة و انا غادي نعطيها ليه..

ساط بعصبية و قرب ليها هز ليها راسها تيمسح ليها دموعها: معرفنش علاش دغيا تأترتي بهاد الزواج انور .. ختي راك باقا صغيرة و الحياة قدامك متربطيش راسك بواحد متيبغيكش .. الزواج ماشي ساهل و مابغيتش نخسرك اختي ..

نور: مغاديش تخسرني .. تيق فيا عفاااك .. متسولنيش علاش تندير هاكا غير تيق فيا عفاااك ..

تنهد ورجع اللور: انا عاد غنسولك ...راه كلشي باين .. زيدي دخلي زيدي ..

حدرات راسها و تبعاتو للداخل تتمسح فدموعها ... توجهاا نيشان للصالة لقات كلثوم(ام نور ) و زينة(خالة نور) جالسين تيهضرو و الخدامات تيجمعو الدنيا ..

جلسات حداهم مربعة ايديها و عقلها خدام ... واش فعلا تقدر تندم .. فعلا لي تيبغي صعيب ينسا و يحيى صعيب ينسا حب ختها .. ولكن صافي ختها راع تزوجات و بخوه من الفوق ... خاصو ينسا و خاصو يبغيها حيت هي لي مرتو ..

هزات راسها على صوت زينة

نور: ا خالتي..

زينة: وجدتي ابنتي حوايجك باش نمشيو..

نور: ااااا .. باقي . ولكن قاليا يحيى ايجي يديني ..

تنهدات زينة و قالت: عيط ليا قاليا نديك معايا...

نور: كيفاش .. هو قاليا انجي ليك ..

كلثوم: نوضي ابنتي وجدي حوايجك دي لي قديتي عليه حتا نجيب ليك الباقي ..

حدرات عينيها باسى تتحرك راسها بااه .. ناضت من حداهم لجيهة الدروج عاقدة حجبانها .. عاد قاليها غادي نجي نديك و عاد كلامو ليهت كان فيه امل كبير و تفائل ان فحياتهم بجوج فرصة كبيرة .. اش عنى بهاد التصرف .. علاش قال حاجة و رجع فيها و علاش معيطش ليها هيااا .. واش صافي يقدر يكون رجع فقرارو و مبقاش بغاها تكون مرتو تاع بصح .. ولكن كن رجع فقرارو مغاديش يقول لمو جيبيها معااك...

كاع هاد التساؤلات طاحو فعقلها و هي تتجمع فحوايجها فباليزة ... جمعات كاع الاساسيات و هي حازنة على راسها ماقدراتش حتا دير دهاز بحال كاع العرايس .. لا حنة لا عرس لا اشهار .. مزوجة زواج بحالا قاتلة روح و خايفة تقولها .. تنهدات فخاطرها تتقول لاهما هاكا و لا تبقا مشوية حياتها كاملة وهي تتشوف فيه بعيد عليها ...