حب من نار

47

حلات عينيها تترمش بالزربة ..رجعو ليها ذكريات الليلة لي فاتت ... بتاسمات بشوية و هي تتذكر لمساتو و هضرتو وهي بين ايديه...ماتنكرش و تقول مافرحاتش بلعكس .. فرحات بزاف و تتحس براسها مراا و اخيرا عندها احساس و عندها قيمة .. هاد المرة ماشي سكران و ماعيطش ليها بسمية مرا اخراا و ماكسرش قلبها وهي فعز شهوتها معاه .. تعامل معاها زوين و حسسها براسها غالية ... مازربش عليها و مافورصاش عليها و راعى لحملها و لجسمها الهزيل ...

ضورات وجهها على صوت رسالة جاتها.. شدات تيليفونها بين ايديها و حلات الرسالة و قراتها تتبتاسم: صباح الحب .. اجمل صباح و اجمل ليلة دوزتها فحياتي .. فطري و سيري مع الشيفور يديك تنقصي شعرك شي ساعة و نعيط ليك ♡

قراتو تتبتاسم و فرحات حيت مانساش طلبها واخا دازو عليه ايام ... ناضت من بلاصتها عريانة و دخلات للدوش كيف خلقاتها مها .. تتبغي تجمع الضحة و لكن تتزلق ليها... طلقاتها و ضحكات على خاطرها و تدعي الله ربي يكمل عليها فرحتها ...

دازو الايام تيطيرو و اريج تتكبر بسرعة تبارك الله .. كلشي مقابلها و مكاينش لي مشافهاش و مقالش مشاء الله ... الباتول رجعات لحياتها و روتينها مع بنتها فحين عمر مشغول فالبروجي الجديد ديالو ... بنا صال فيتنيس كبيرة خارج المدينة فطريق السيار ... مركز كبير باربع طوابق ... صال ل ميسكيلاسيون و صال لصحاب البوكس لي من اختصاصو ... لي صال ميكس و لي صال ديال عيالات بوحدهم ...

مركز زوين و نقي .. خصر فيه فلوس صحيحة ولكن ماندمش حيت من الاول دخل الفلوس و بدا تيبان الرواج و الاقبال على المحل كونو جا فالطريق.. كاع لي كان خدام و تيعكز يمشي ل لاصال رجع عندو فالطريق يطركو من طريقو يتريني و يمشي ...

دازو شهورا تيطيرو ...اريج تتكبر و الباتول فرحانة بمقابلة بنتها و حتا عمر و كلثوم و حتا الحاج معاونينها ... قمر فبلاد بعيدة حملها بدا يثبت و ضحكتها بدات تبان وهي تتلمح كرشها تتكبر تدريجيا ...
روح اخرااا واقفة فالبالكون لابسة كولون و بيجامة ديالو فوقانية ... شعرها رجع قصير حد عنقها .. شادا من كرشها و تتنهد و قلبها تيضرب ... شهرها وصل و الخوف بداها .. معرفاتش علاش احساس خايب جاها و تتحس بالظلمة قريبة منها و النور غادي و تيبعد عليها ...

حطات ايديها على قلبها تتنفس بشوية تتحاول تقاد دقات قلبها ... وقف عليها يحيا لابس تيشورت كحلة و شورط كحل ... دورها عندو تيضحك غا شاف لونها المخطوف وهو يجمعها و نطق: مالكي ..

حدرات عينيها دمعو ليها معرفاتش علاش ولكن نطقات تتنخصص: حاسة باحساس خايب .. حاسة بشي حاجة اتوقع خايبة ..ياربي السلامة اش هادشي..

جلسها فوق الكرسي فشلانة و سخفانة.. شربها الما : ششش تهدني مغادي يوقع والو .. تنفسي مزيان ..

شاف فيه تتبكي: قلبي غادي يسكت.. فيا السخفة .. يحيا مغاديش تخليني ياك واخا يوقع لي وقع

قرب ليها عنقها تيهدن فيها: صافي متفكريش بزااف نساي كلشي ايدوز مزيان تيقي فياا عمرني نخليك

تهز عليها تيحاول يضحكها و ينسيها حتا نطق: غدا نمشيو عند الطبيبة و نشوفو وقت الولادة راه تعطلتي تسع شهور قربات تكمل..

حركات راسها بلاا بالزربة: انا بخير مابغيتش طبيب .. ملي يجيني الوجع غادي نولد بحال الباتول ..

دور راسو تيتنهد معارفش لاش كل ماتيجبد ليها الطبيب تيتبدل لونها .. واش خوف ولا بصح مابغاتش تمشي .

نوضها تيهدن فيها و يرطب معاها حتا سرحها فالفراش و دخل حداها معنقها تيبوس فيها حتا غفات ... حط راسو جنب راسها و سد عينيه تيقلب على النعاس ...