حب من نار

45

واقفين كاملين عند راسها وهي سخفانة متكية على البياس تضحك بشوية .. واقف حداها عمر هاز البنيتة فإيديه تيضحك فرحان مقاداهش الدنيا ... حروف كحلة و جمال سبحان لي خلقو فديك البنيتة ... تقول الباتول محطوطة تما .. نسخة على مها حتا من لون الشعر الاسود الناصع خداتو منهاا .. خدود كبيرة و عيون جميلة .. ... باسها بشوية و مدها لمو ..

شداتها كلثوم باستها بلطف و قرات عليها ايات قرآنية و رجعاتها لبلاصتها : صافي ماتبقاوش تهزو فيها حتا تبغي ترضع ..

نقزات نور من اللور كانت تتهضر مع قمر عاد قطعات: و انا ماهزيتهاش ...

كلثوم: اجي شوفيها من بلاصتها براكة عليها من اليدين و هي كمشة مسيكينة تمشي تفلعصوها ...

زينة: هههه الوليدات محميين من عند الله خليهم يحيدو الشوق .راه تسع شهور وهما يتسنااو ..

هما تيهضرو و عمر جالس عند راس مرتو فرحان .. محني عندها تيهضر معاها بشوية و ايديه فوق خدها: كيبقيتي احبيبة .. باش تتحسي.

الباتول: كرشي تضرني زيروها ليا بواحد السمطة ..

عمر: باش تدخل ليك .. انا ندوي مع الطبيبة و نشوف واش نحيدوها ..

الباتول : شفتي بنتنا تتحمق ..

عمر: تتشبه ليك بزااف .. شعرها كحل بحالك و عينيها بحالك .. خدات حروف الشلحات الحرات..

ضحكات بشوية و قالت: حتا نتا تتدي ليك .. فرحانة بزاف والله

باسها على راسها: فرحي احبيبة فرحي .. الله يدومها فرحة ..

الكل فرح و الفيلا عمرات ... الحاج غا يدور يدور و يمشي يقرا على البنيتة ايات قرآنية خوفا عليها من العين لان كاع لي تيشوفها تيتبهر بجمال ديك الطفلة سبحان لي خلقها ...

الدنيا عمرات و كلثوم و زينة ممخلينش من حقهم.. واقفين على كلشي بأيديهم و تيقادو و يوجدو للسبوع ديال اريج .. السمية لي ختارو كاملين و تافقو عليها ..الاسم فاللول عجب الباتول و حتا واحد ماعارض ولا تحكم فيها .. هي خلات ليهم الاختيار حتا هما و قالت اريج مجرد اختيار حتا نتوما اختارو ولكن اتافقو على اريج و سماو البنيتة و كلهم راضيين ...

تجمعو الحباب و الصحاب .. معارف الحاج عيسى و عائلة الحاج من البلاد ... سيفط عمر شخص حتا لبلاد خالة الباتول ولكن رفضات تخوي دوارها و سيفطات مباركاتها معا المرسول فقط ...

داز السبوع احسن من اي حفلة دازت فهاد الدار.. كلشي فرح و كلشي شطح و كلشي غنا و كلا ... الماكلة غا مشتتة و كلشي ديال الفريع .. البسطيلة بانواعها بجوج و اللحم مشوي و عاد لي سالاد و العواصر ...

كلشي ضحك و فرح ... نقشات الباتول ايديها فبيتها نقش خفيف و رفضات تنقش رجليها ... جالسة حداها نور من بعد ماسالات الهضرة مع قمر ابيل فيديو وراتها كلشي بحالا معاهم .. عارفا قمر متقدرش تجي على قبال حملها لي تطلب الله يتبتو ليها ....

شادا اريج فإيديها تضحك: ياختي تتحمق تبارك الله ماشاء الله... عرفتي شنو خفت نعينها ..

الباتول: غير بوسي تتشبعي .. بنتي محضية من عند الله ..

نور: متبقايش تخلي البشار يبقا يبوس فيها .. صافي لي عندو شي فم يجمعو ..

الباتول: اويلي نقولهم لاا .. واصلا جاو غا عيالات صحاب عمر .. حدهم طلو عليها و قليل لي باسها ..

بقاو داوين هضرة تجيب هضرة ... سالا السبوع التحت و الباتول تتسنا فالحنة تنشف ليها باش تشد بنتها ...

تحل الباب و دخل عمر تيضحك .. شاف نور جالسة و نطق: فين الباتول

نور: دخلات تغسل الحنة .. مشا كلشي ..

جلس حداها بتعب: كلشي مشا .. الحمد لله كلشي داز بخير ..

حط ايدو على بنتو تيداعبها ناعسة فحضن نور : نتي مغاتمشيش ؟

نور: بغيت نبات معاكم ..

عمر: و باتي ..

نور: صافي واخاا ..

خرجات الباتول من الحمام لابسة بينوار طويل و شعرها مطلوق وراها... شافتها نور وهي توقف مدات ليها اريج : انا مشيت .. الا بغيتيني عيطي ليا صافي ..

بتاسمات ليها و خرجات لابسة قميص... طلات على التحت بانو ليها السربايا تيجمعو فالدنيا... سهات فعقلها تتفكر فين يحيا و علاش مجاش للسبوع ..شحال وهي تتسنا فيه ولكن مجاش .. تنهدات و مشات لبيتها .. مشات نيشان هزات تيليفونها وهي تلقا عرام ديال ليزابيل منو وجلسات تتقول مع راسها اويلي انا يحسابليا ماداهاش فيا كل السيد من الصباح وهو يصوني ..

صونات ليه من الدقة اللولة جاوب: علاش ممتجوبيش .. فين مخشياا ..

نور: كنت مع الباتول فالبيت و نسيتو .. علاش ماجيتيش ..

يحيا: من الصباح تنعيط ليك بغيت نقولك غا انمشي نقضي شي غراض و نقدر نتعطل ساعا بان ليا ساليتو بكري ..

نور: ماشي بكري مهم اشمن غرض ..

يحيا: من بعد و تعرفي .. يالاه هبطي انا قربت حدا الدار..

نور: بغيت نبات هناا ..

يحيا: هبطي و دابا انور .. بلا مانعاود الهضرة

نور: عفاك نبات ..

يحيا: و اناا ماعجبتكش.. اتهبطي تمشي تباتي فدارك وسط فراشك .. يالاه انا نتسناك ..

قطعات معاه تتنهد.. ناضت بدلات حوايجها و هزات الساك لي جابت معاها .. ماشي بزاف باش ودعات مها و خالتها لي ولات تتبات معاهم تتعاون كلثوم.. خرجات على برا لقاتو وصل واقف متكي على الطوموبيل.. شافها وهو يزيد لعندها و شد من عندها الساك ..

مهضرش حل ليها الباب حتا ركبات .. حط داك الساك و ركب حداها دار السمطة و زاد ..