حب من نار

4

عينيها فعينيه و قلبها تيخفق... وصل لاعلى درجات الخوف.. معدتها تقلباات و صدى خايب تيجي لوذنيها ...  نظرتو كانت اول مرة تشوفها فعينيه... كانت نظرة خايبة بزااف .. عندها بزاف ديال المعاني القاسيين لي هي ماقدراتش تفسرهم ...

سرطات ريقها ملي شافتو جاي لجيهتها... بلا مايهضر معاها شدها من ذراعها نفس الشدة المعتادة و زيدها قدامو طالعة مع الدروج ...

داز الوقت .. جالسة فالمقعد المخصص ليها فالدرجة الاولى و جنبها يحيى ... شادة فذراعها تتماصي فيه و عينيها تيضورو ...

خايفة بزاف  و السكوت اللي داير بيها مركب فيها الرعب... ضورات عينيها لجيهتو بان ليها متكي راسو للور و ساد عينيه ... ملامحو قاسية بزااف و غضب كبير كان تيشع من نظراتو ليها ...

تنهدات بأسى على حالتها.. عاد قالت غادي تفرح ولكن مبانت ليها حتا فرحة ... حتا كلمة زوينة معبرهاش بيها و حتا نظرة حنينة مكان ليها نصيب فيها ...
هزات ايديها تترعد و تشجعات حطاتها فوق من ركبتو .. هزات عينيها فيه لقاتو على نفس هيئتو .. حلات فمها و نطقات بشوية : يحيى ..

حل عينيه نيشان فوق ايديها لي محطوطة عليه .. خنزر فيها حتا حيداتها بالزربة مخلوعة من شوفتو ..

شدات ايديها عندها تترعد معرفاتش تفسر هادشي لي واقع ليها .. هزات عينيها فيه ملي سمعاتو هضر

يحيى: اش كاين

نور: ماقولتيش ليا فين غادين..

دور راسو للجيهة لاخرا تيعض على قنانفو و بسرعة رجع راسو لعندها حتا وقف بوجهو قدام وجهها: معايا غادي تعلمي تسكتي و تنفذي .. ملي نبغي نهضر غادي نهضر متحتاجيش تسوليني .

رجعات براسها اللور مخرجة عينيها .. ممتيقاش اش تتسمع و اش تتشوف قدامها ... لا هادي صدمة عمرها كانت على البال ... علاش تيتصرف معاها بهاد الطريقة .. علاش تبدل وهو لي كان تيرغب فيها تعاونو و تصبر عليه ...

هبطات راسها و دغيا هبطو دموعها ... صدرها تيطلع و يهبط و افكار خبيثة تيجيو لراسها .. علاش و علاش و علاش... اسئلة كثيرة ما عندها ليهم جواب ... هزات ايديها حطاتها على فمها حبسات شهقتها ... هنا عرفات و تأكدات ان الوجه الحسن لي شافت ماهو الا قناع ركبو فوق الحقارة ديالو باش يخدعها ...

كمشات ملامحها و راسها مهزاتوش .. هي ماشي مكلخة باش ماتعيقش بلعبتو المسخة لي لعبها عليها مزياااان ...

هنا تفسر و توضح ليها كلشي .. العقد لي دغيا صححو و رجعها مرتو فالوراق .. كلامو الحلو ليها لي عمرها حلمات غادي تسمعو شي نهار ...

سرطات ريقها ووجها ولا حمر ... كيف طيحاتو فخطة مدروسة هي و ختها و ولا راجلها بزز منو هاهو طيحها فخطة اكتر خبث و الانتقام غادي يكون مضوبل هاد المرة ...

دورات عينيها لجيهتو لقاتو على نفس حالتو متكي و ساد عينيه... عضات على قنانفها وهي تضور عينيها فالناس لي قلال جالسين جنبهم من الجهة لاخراا ...

هزات ايديها بشوية حلات السمطة و قلبها تيخفق ... مستحيل تخليه ينفارد بيها .. مستحيل تسمح ليه يهدم كبريائها لي سنين و هي تترمم فيه ...

وقفات بشوية وعينيها عليه خايفة  بزاف ... بغات تغبر من قدامو .. بغات الارض تشق و تبلعها و لا الغذاب لي غادي تشوف معاه ... عرفات حر الحب لي تيحس بيه غادي يتفدا فيها طال الزمان ولا قصاار ...